I Rinanon te Kaitataan Imarenan te Mwaane ma te Mwaane—A na Kona Membwa n te Ekaretia ni Butimwaea Okiu?

By Bouke “Bob” S. Ecoma Verstege

Kamataata n te Tamnei mairoun Getty Images

Taeka mairoun te tia karaki: N na tibwaua au karaki bwa kaotan au kakaitau ibukiia taan kairiiri n te Ekaretia ao membwa ake a butimwaeai ma te kukurei, ni buokai n oki nakon au waaki ni kabane, ao n tia n ibuobuoki ni waaki ma ngai n riki bwa ana reirei Kristo.

N Turai 27, 2013, imwin weneakinan aorakina ae te Alzheimer (Te Mwamwaninga), raou ni maiu inanon 25 te ririki e a motirawa. Jay Eldredge bon te taokita n te buro ae kinaaki ao ni karineaki. Ti a tia ni mwakuri ni mitinare ibukin Ana Ekaretia Iesu Kristo Ibukiia Aika Itiaki ni Boong aika Kaitira ngke inanon kairakera ma ngkanne ti a manga raroa ma te Ekaretia ibukin te kaitataan imarenan te mwaane ma te mwaane.

Motirawan Jay, e ngae ngke e aki kantaningaaki, e bon kauruakinano. I namakina te uruaki n nano ao te maroa.

Ngke I buti n okira mweengau imwin katauraoan te taunimate, I namakina ana kakairi te Tamnei n te aro ae korakora ngaia are e a katea te kaa n iteran te kawai. I ataia bwa te Atua e taetae nakoiu, e weteai bwa n na oki nako Ina, ma I aki butimwaia. “Ko aki noorai ae I rawawata?” I taku n takarua. “I aki tauraoi n oki nakon te ekaretia ngkai moa.”

Ma ngkana e korakora riki au totoko, ao e na korakora riki ana kairoro te Tamnei, ni kaoai n oki nakon te ekaretia.

N na Kona ni Butimwaeaki?

I rang n raraoma n okiu nakon te ekaretia. I tuai n roko ni bootakin te toa inanon 25 te ririki. A na kona ni butimwaeai? Tao N a butimwaiia? Tera ae e na taekinna te bitiobi? I namakina te ingainga ao te aki rau ao n tiku n rawawata ma te nanokawaki.

Ma au koaua n te euangkerio e teimatoa inanon ririki akanne. Jay ao Ngai ti tangira te Ekaretia ao ana reirei ni kairi—n aron, te tangira ae kororaoi, nanoanga, ao te kakabwarabure. I ataia bwa Kristo bon au Tia Kamaiu ao bwa Ana Ekaretia bon Ana Ekaretia Iesu Kristo ibukiia Aika Itiaki ni Boong Aika Kaitira. I a kaman ataa anne ngke inanon rairakiu ao bwabetitoakiu n au ririki ae te 14. I tuai ni kakeaa moa taekan anne ngkai.

Tokina, imwin karekean te ninikoria ae riai, I tareboniia te Linwood Uoote i New Jersey, USA, ni kakaea tain te bootaki n toa ae moanaki iai.

Ngke e a roko te Tabati, ana mwakuri teuare buakaka e katukui angabuaka ni kawaiu are e na kona n tukai n roko n te taromauri. I rang kakaitau ngkai e teimatoa ni kauringai te Tamnei ae Raoiroi.

I namakina te nakonnano ngke I rin inanon te kateitei, ma te anene ni taromauri ni kaukuuki inanon te bootaki n toa e kakoaua nakoiu bwa I a manga roko ni mweengau. Te anene n taromauri “Come, Come, Ye Saints” (Boki n anene n taromauri, nambwa 30) e kaoa te Tamnei n ae rangin ni korakora n te aro are a bwaro ranin matau. I ataia n te tai anne bwa Tamau are i karawa E atai au kaangaanga ao te nanokawaki ae korakora are I namakinna.

Te anene n taromauri anne e riki bwa kanga kunan te Ekaretia, ma e a tia n riki bwa au anene n taromauri i bon irou naba.

“Nakomai,” te anene anne e kaoai. “E ngae ngke e taraa n rawawata te mwananga,aei, te akoi ibukim inanon am bong.”

E bon matoatoa mwanangau. Ma te akoi e roko irou n aron are e a tia ni beritanaki.

Bitiobi Darren Bird ao ni kabane kaain te taromauri a rangi n tamaroa ao a butimwaai. A butimwaeai n aron ae tariia inanon Kristo.

Kaiokai ma te Atua, rinanon Kristo

Te taeka ae “Waaki, Waaki, Ngkami aika kam Raoiroi” e anganai korakoran nanona, e ngae n anne, I namakina bwa Tamau are i Karawa e kairai bwa n na kanga ni waaki.

Ti na kunea te tabo are e katauraoia ibukira te Atua,

Raroa nako i Mainiku,

Ike akea ae na kammarakaki ke ni kamaakaki;

Ikekei a na kakabwaiaki Aika Itiaki.

I nako mainiku ao ni kabooa nweengau i Fountain Hills, Arizona, USA, ike I kaaitibo ma Bitiobi Jerry Olson. Ngke I bubuti bwa N na kaaitibo ma ngaia ao ni kamauria ni baina, te Tamnei e anganai te namakin bwa te mwaane aei e na buokai ni uotai rikaaki nakon ana waaki ni kabane te Ekaretia.

Ngke I moana kakawaran bitiobi ao ni moana kaiokau ma Tamara are i Karawa, I kakoauai kakai n tamnei aika mwaiti. I kaoti bwaai ni kabane nakon te bitiobi, ike e bon rang kakaitau. E taku bwa e a tia ni buokia n ataa te tabo are I mena iai mai imwaina ao ae I mena iaa ngkai rinanon reitakiu ma te Atua. E taekinna naba nakoiu bwa aio ai tibwa ana moan tai are e karekea ana tai n ibuobuoki nakon temanna are kaitataan ma raona ni mwaane, ao e bubuti ibukin au nanorinano ao au kabwarabure ngkana e taekina ke ni karaoa te bwai ae kaunai inanon waakin te marooro.

I karabwa ibukin ana kokoaua ao n taku, “Eng, aio bon au moan tai naba. Ti uaia n reiakiniira.”

Ngaia ae I a moana te mwananga ae tamaroa ao n iraorao!

N te tai ae waekoa iai au babaire ae n na karaoia bwa n na kanga n riki bwa te membwa. I butimwaai tamaroan marooro aika a tataroakinaki ma naano aika tamaroa ao ni moana te mwakuri.

Kamataata n te Tamnei iroun Jenna Palacios

Kabebete ibukin te kaangaanga inanon te Tembora

Imwina, ngke I iriira te reirei anne ao ni mwakuri korakora ni kaan nakon Kristo, I karekea kaokan au nakoanibonga ao kakabwaia man te tembora ao ni butimwaea weteau ni beku n te kooram ni unimwaane. Inanon te tembora ae tabu, ngke I reitaki ma Tamau are i Karawa, E kaotia nakoiu bwa mwaitira tangiraia natina Irouna. I namakina te kabebeteaki n au kaangaanga ao nanou ae korakora ni Kakukureia.

Te namwakaina imwina, e weteaki te bitiobi ae boou, are I a tia ni karikirakea te iraorao ae tamaroa ma ngaia. Bitiobi Larry Radford e ata te bwai ae riki irou ao e kaitauai n au ibuobuoki n te kooram n unimwaane, ike e taku bwa I a tia ni beku ma te tangira ao te nano ae koaua tiaki ti ibukin te kooram naba ma—ae kakawaki riki—ibukin te Atua. Ana taeka n akoi ao ana kaunganano e buokai n namakinna bwa te Uea ao raou Aika Itiaki a kukurei n au mwakuri n ibuobuoki.

I kakaonimaki ngkai ni karaoa ana mwakuri te kiraaka n te uoote.

I ataia Bwa Antai Ngai

Karekean kaitataan imarenan te mwaane ma te mwaane ao n riki ni kakaonimaki bwa te membwa n te Ekaretia bon Te kawai ae aki beebete. Ma ngkana I katukui ni kabane au onimaki ao au koaua iroun te Atua, I kona n namakina kakorakorau Irouna. Taan kabuakaka a na bon taetae bwa I a tia n aki koaua nakon are bon ngai ke are I a kauniia te LGBT+ komunite.

I mataata n uniia, ao ni koauana I bon aki kona ni karekei kaekaaia ni kabane. I tii kona n taetae man oin au taneiai are I rinanona. Ao te taneiai anne are e a tia n reireinai aei: Ngai natin te Tamara are i Karawa te mwaane, natin te Atua. Anne raoi ao tii te kanikina are l taua irou. N aron mwiina, I aki kataia ni kariaia ana kanikina te aonaaba ni kabwarabwaraai. I maaku bwa e na tiana au konabwai ao rikirakeu ae akea tokina.

E rang wanawana Tatan. E ataia bwa man kabonganaan kanikinaa, e kona ni bwenaira n aron te komunite ao n aron te Ekaretia.

Ma n te taratara anne n au iango, te rinerine are I karaoia e aki boboto iaon au kaitataan ma raou ni mwaane ma iaon arou n riki bwa a na reirei Kristo ni koaua ma te kaitataan imarenan te mwaane ma te mwaane. E taku Nibwaai:

“O te Uea, I a tia n onimakiniko, ao N na onimakiniko n aki toki. N na aki katoka au onimaki iaon te iriko. …

“… I ataia bwa e tituaraoi n angaanga te Atua nakoia akana a butiia. Eng, e na anganai Atuau ngkana I bubuti n ae riai; mangaia are N na tabeka bwanaau nakoim; eng, N na tang nakoim, Atuau, ae bwaan au raoiroi. Nooria, e na waerake bwanaau nakoim n aki toki, au bwa ma Atuau ae e aki totoki” (2 Nibwaai 4: 34-35).

Tangiraia Raou Aika Itiaki

Inanon okirikaakiu, I namakina te tangira mairouia au taan kairiiri ao raoraou aika Itiaki, ni ikotaki ma naake iai naba te namakin a ai aekakiu ake a roroko n te taromauri ao naake a aki naba I kunea te tabo are I kona ni marurung iai. I kunea ibuakoia anuan Kristo are I a tia n aki toki ni kairekerekea ma au onimaki: nanoanga, nanorinano, atatai, ao, iaona ni kabane, te tangira.

Ngke I ikakorakora iaon kawaiu ma au Tia Kamaiu, I namakina te mwaneaki ao te rau ngke I rairikaaki Nakoina, n ataia bwa I aki nakonako n te kawai anne n tii ngai. Tabeman bitiobi a bon mena irarikiu. Kaain au kooram. Tititati inanon au uoote. Riki iai te ataeinimwaane n au uoote ae tuangai ngkana I kona ni katabua n anganna te nakoa n ibonga. Ana kakao ae akoi e kakorakoraai ni waaki. E noorai n aron te mwaane are iai ana nakoanibonga te Atua ao are e kona ni kabongana te nakoanibonga anne ni buokiia tabeman.

Taai ni beku ao n tataro ma raoraou Aika Itiaki e a tia n tabekairake ao—ni waaki ma mwaitin kakabwaia ake I a tia ni karekei mairoun te Uea—buokai n rinanon te tangira, atatai, ao te butimwaeaki ae I kainanoi.

E taku te Tia Kamaiu “I bon aki kitaningkami ni motiki romi: I a okiringkami.” (Ioane 14:18). Taeka akanne a koaua. I kainanoa te karaunano, ao E roko nakoiu, e raka mwaitina nakon are I a tia ni kantaningaia.

Te Tabo ni Katantan

“Ana tabo ni katantan te euangkerio e koaua bwa e bon tau buburana ibukiia aomata ni kabane ma nanoia n iriira te Uea. E ngae ngke temanna e taku ke e namakinna bwa e aki boraoi nakon anne, I iangoa Bob Verstege ao au kantaninga bwa a na kona ni kaitibo ma ngaia ao ni beku ma ngaia. Te Tari Verstege bon te banna ni katooto n nakonako bwa tera ana Mwakuri ni Kamaiu Iesu Kristo are e kona ni karaoaki ngkana e kamwakuraki. Ngkai te bitiobi, I tabekakirake, reireinaki, ao ni kaungaaki mairoun te mwaane ae a nanorinano ni katoa tai.”

Bitiobi Larry Radford, Fountain Hills Ward, Scottsdale Arizona North Stake

Membwa-Aika Kakaonimaki

“Temanna are e irii berita aika tabu ao kainibaire ao reirein ana euangkerio Kristo—e ngae ngke a na tabeakini mwakuri ni kaitataan imarenan te mwaane ma te mwaane—koauana bon akea bukina bwa a na aki bwanin rokoia [ke] n riki bwa membwa aika bwanin n te Ekaretia ao n taui wewete ao n taetae ao n rin n te tembora ao ni beku ikanne. Ao tibwanga ao kakabwaia tabeua ake a kona n roko man kainakin te Ekaretia nakoia.”

Unimwaane D. Todd Christofferson man te Kooram n Abotoro n te Tengaun ma Uoman, “LGBT People Who Live God’s Laws Can Fully Participate in the Church” (witeo), ChurchofJesusChrist.org/topics/gay.