Tera Kakaawakin te Ara?

Tuun 29–Turai 5

Imwiin rairakiia, Reimwanaite ake a kakaonimaki a tangira araia ae boou bwa a na kaokoroaki iai mai irouia Reimwanaite ake tabeman ao ni kanikinaea rairakiia nakon Iesu Kristo. A aranaki n te ara ae aomata aika Aentaai-Nibwaai-Riaai (taraa Aramwa 23:16–17). Ti kaokoroira n te bong aei man katokaan aran Iesu Kristo iaora.

Te Kanikina n Rairakira

N tain te bwabetito ti berita ma te Atua bwa ti na katokaa iaora aran Kristo. Ni katoatai are ti anaa iai te toa, ti kaboua te berita anne. Tera ae ti berita iai bwa ti na ururingnga ao ni karaoia ngkai ti katoka Arana iaora? (Taraa Motiaea 18:8–9; Reirei ao Berita aika Tabu 20:77.)

Ana Tia Kakoaua Kristo

Abotoro bon “taan kakoaua aika onoti n aran Kristo n te aonaaba ni kabane” (Reirei ao Berita aika Tabu 107:23). Ti kona naba ngaira n riki bwa ana tia kakoaua Kristo. Ti na kanga n tei ma te burabeti ao abotoro n riki bwa taan kakoaua n aran Kristo nakoia aomata ake a katobibira?

Oin te Korakora

Bon te tai aei, Beretitenti Russell M. Nelson e a tia ni kauringiira bwa ti na taekina aran te Ekaretia n arana ae eti: Ana Ekaretia Iesu Kristo Ibukiia Aika Itiaki ni Boong aika Kaitira. E berita bwa te mwaaka e na bwaro iaoia aika Itiaki ngkana ti karaoia (taraa “Aran te Ekaretia ae Eti,” Riaona, Nobembwa 2018, 89). Tera tabeua bwaai aika ti kona ni karaoi ni kabongana raoi riki aran te ekaretia ae eti ni buokiia tabeman ni karaoa naba anne?