Aki Raraomaeakin Aia Kangaanga
N te bong anne, Kendra, Brent, ao Tyson bon banna ni katooto aika koaua n aron Kristo n te mwakuri n ibuobuoki.
Kamataata n te tamnei iroun Trent Gudmundsen
Ti bon bane n rinanon taai aika nakoraoi ao aika nakobuaka inanon maiura, ma 2013 bon te ririki ae matoatoa ibukiia ara utu. Ti rinanon onobwai aika aki kantaningaaki man bobuaka n te mweenga ao karaoan te kaa. Kainnabau, ae Ryan, e bua ana mwakuri, ao natira te mwaane ae te bina e bungiaki ma taian kangaanga ao n riai ni kabanea tabeua te wiiki n te tabo n tararua ibukiia ataei aika tibwa bungiaki. I rinanon naba te korakai imwiin te bung. Kangaanga aikai, n raonaki ma nakoara ni karo ibukiia natira aika aman, e a karika ara kangaanga n te mwane ao n te iango.
E a reke ana mwakuri ae boou Ryan, ma e mwakuri inanon aoa aika mwaiti ao ni kitana te mweenga ni katoa wiiki. Natira te mwaane ae nimaua ana ririki, ae Wesley, e a moanna n tabeaianga nanona n nanakon tamana n angin te tai. E aki toki n uti n te bong man te mibuaka.
Ara utu ni kaan a boutokaai n aron aia konaa, ma I bon teimatoa n namakina te kua ao ni marooa n angin te tai. I ataia bwa Tamau are i Karawa e tangiriia ao e kinaia au utu, ma kanga ti a namakina te nano rawawata.
N te bwakantaai teuana, ngke e kitana te mweenga Ryan n nako ni mwakuri, I anaia natiu man aia reirei n nikiriia ni mweengara ao n tataro ma te korakai ibukin buokara. Rimwi n te tairiki anne, kaain rarikiu ae Kendra e a karebwerebwe iaon ara mataroa. E ataa ara kangaanga ao n titiraki bwa I uara. Akea au kantaninga ae N na ngurengure nakoina, ao bon ngaia te kabanea n aomata ae N na butiia ibukin buokau. Kainnabana, ae Brent, e a tia ni kekeiaki ma aorakina ae te kaentia inanon aua te ririki n nako.
I tuanga Kendra bwa akea au kangaanga, ma e bon ti titiraki riki. Ma raninmatau, I a tuangnga aron korakaiu. Ngke I tuangnga aron tabeaiangan nanon Wesley ma mibuakana, e titiraki ngkana N na tangira Brent bwa e na kakabwaiaa Wesley.
Teutana te tai imwiina, Kendra, Brent, ao natiia te karimoa, ae Tyson a roko n ara mataroa ao ni kunnikainiia n aia bwai n taromauri. E rangi ni mamaara rabwatan Brent. I kakoaua bwa e bon bane korakorana n rokona n ara auti. E kakabwaia Wesley, ao Tyson e kakabwaiaai.
N te bong anne, Kendra, Brent, ao Tyson bon banna ni katooto aika koaua n aron Kristo n te mwakuri n ibuobuoki. A aki raraomaeakin oin aia kangaanga bwa inanoia a bon tangiriira ao a nanoangaira. I namakina te kakabwaiaaki bwa e kaeka au tataro Tamau are i Karawa n te kawai ae rau. E mate Brent uoua te wiiki imwiina.
N te bong anne inanon mweengara, e riki Brent bwa te tia kakoaua ibukin te Atua rinanon kamwakuran te nakoanibonga n te raoiroi (taraa Motiaea 18:9). Irou, e bon tabu ana mwakuri n ibuobuoki nakon ara utu bon teuana mai buakon kabanean ana mwakuri iaon te aba.