Kaokoro ma Ti Katiteuanaaki
E maeka te tia korokaraki i Georgia, USA.
“Kariaia bwa a na taromauri ni kanga, te tabo ra, ke are a rineia” (Taekan te Onimaki 1:11).
Ellie ao ana utu a nako ni kawariia naan ai tariia ma mwaneiia man ana itera tinaia aika a maeka i kiraroa. Ellie e rangi ni kukurei! E tuai man nooria naan ai tarina ma mwanena n te tai ae maan.
Imwain te mwananga, ana karo Ellie a tangiria ni kan taetae iaon te bwai teuana.
“Ngkana ti ikotaki ma ara utu, ti aki toki n tataro imwain te amwarake. N tabetai ti kakarabakauakina taekan te taromauri, eti?” E titiraki Tamau.
“Eti!” E taku Ellie.
“Tamaroa, ana iai te bitaki teutana iaon te mwananga aei,” e taku Tinau. “Ai tinami ao ai tamami aikoa nanako n taromauri. Ao aki tangiria ngkana aomata a taekina taekana nakoia.”
E mata nuun Ellie. “Bukin tera aaki?”
“Ti aki atai bukina ni kabane,” e taku Tamau. “Ma a rang tangiriira. I taku bwa a aki tangiria ni kauntaeka ma ngaira ke ni kamaraki ara namakin. Ngaia are a tia n tuangiira bwa ti na aki taekina taekan te taromauri nakoia.”
E katoutoua atuna Ellie.
“Ti kona ni wareki koroboki aika tabu ngkana ti mena ikekei. Ma ti na karaoia n te tabo ae onoti,” e taku Mom.
“Ao ngkana ti nang amwarake?” Tarin Ellie ae ikawai e titiraki.
“Ti a tataninga ao n nooria,” e taku Mom. “Ngkana aki tataro imwain ae ti amwarake, ti kona ngaira n tatabemaniira n tataro inanora.”
“Ngaia anne,” e taku Ellie. “I kona ni karaoa anne!”
Te bong are imwina, ana utu Ellie a rin n aia kaa. A buti ni karokoa e bwakanako te tai n te bong. Ngke a roko n aia auti naan ai tariia ma mwaneia, ai tinan ao ai taman Ellie a buokiia ni kaotinakoi aia baeki man te kaa. Ngkanne a bane n nako ni matu.
Te moaningabong are imwina, Ellie e karaoa ana tataro imwain nakona n amwarake n te umanikuuka. E namakina te nakonnano n nooraia ana utu. Ma ngkanne ai tinana e tekateka irarikina ma moangarena n iraorao iaon moana.
“Tabeman mai buakora a na nakon ana tabo ni karao ira ai tarim n te bong aei. Ko kan iri?” e titirakina Ellie.
“Te tabo ni karao ira?” E titiraki Ellie.
“Eng! Ngkoe ma tarim ko kona ni karaoa iram ngkana ko tangiria.”
E moangare ao e katoutoua atuna. E taraa ni kaunga!
Imwin te kaingabong, a toka n te bwati nakon te tabo ni karao ira. Ellie e tangiria ni matakuakina ai tarina ngke e mwakuri. Tabonibaina e mwainging n okirikaaki ao e waerake ngke e koom ao e bibiri. Imwin tian iraia te koraki, a manga karaoa aongkoa karaoan taraakia n te kiraati n te tabo ni karao ira ao a ngarengare n taraakin moamoaia ae boou.
Te bong are imwiina, e rang korakora te karau. Ngaia ni kabane te koraki a iangoia n tiku n te auti n takakaro iaon te baba n takakaro. Ellie ao temanna ai tarina ae kairake a toka n te tiim ni kaaitaraia uoman ataeinimwaane aika ikawai. A bon kangoongo imarenaia ngkana a kabubuti waaia n raraunia te baba n takakaro.
“Ti moanna!” Ellie e takarua ngkana e kabuta waana iaon te baba n takakaro. Ngaiia ni kabane a uboi baia ieta ni kaota kaungaakia—riki ai mwaneia ake a ikawai, are aongkoa a ngure n taekan te konaaki.
Imwiin tabeua te bong, e a roko te tai n oki nakon mweengaia. Ngke Ellie e tamwarake ibukin aia kaa, ao e ongo aia kaboo ana utu.
“Ti na bon mitinii ngkami!”
“Manga waekoa n oki!”
“Ti rang tangiri ngkami!”
Ellie e moangare ao e kaboo ngke e butinako aia kaa. E rang kaunga. E ngae ngke a kaokoro aia onimaki ni bwaai, a na bon teimatoa n riki bwa te utu ae kukurei. ●