Te Kakoaua ao te Rairaki

Iroun Unimwaane David A. Bednar

Kaain te Kooram n Abotoro n te Tengaun ma Uoman

Man te marooro n te maungatabu ni kabuta n Okitobwa 2012.

Te reirei ae moan te kakaawaki imarenan te koaua ao te rairaki e kakoauaaki n aia mwakuri ni mitinare natin Motiaea aika mwaane.

“Ke a mwaiti ake a kairaki nakon ataakin te koaua, man aia kabwarabwara Amon ma tarina, n aron tamnein te kaotioti ma te taeka ni burabeti, ao mwaakan te Atua are e karaoi kakai irouia—eng, … n aron ae maiu te Uea, ao n aron ae a mwaiti Reimwanaite ake a kakoaua aia kabwarabwara, man rairaki nakon te Uea, a bon aki manga tannako.

“Bwa a riki bwa te botanaomata ae raoiroi; ao a kawenei aia bwai ni buaka ake a kakaitara iai, ao aki manga buaka ni kaitaraa te Atua. …

“Ao ngkanne, naakai ake a rairaki nakon te Uea:” (Aramwa 23:6–8).

Uoua bwaai aika a kabwarabwaraaki ni kiibu aikai: (1) te atatai n te koaua, are e kona n nanonaki bwa te koaua ae reke iroum, ao (2) te rairaki nakon te Uea, are ni mataatau te rairaki nakon te Tia Kamaiu ao Ana euangkerio. Ngaia are, te korakora ni botakin te koaua ao te rairaki nakon te Uea e karekea te matoatoa ao n aki kona ni kamwaingaki ao e katauraoa te kamanoaki n te maiu n tamnei.

Te koaua bon te ataibwai n tamnei n te koaua are e reke man mwaakan te Tamnei ae Raoiroi. Te rairaki ae reitinako bon te kakaonimaki ae teimatoa nakon te koaua ae kaokaki are ti karekei—ma te nano ae tauraoi ibukin mwakuri aika a raraoi. Ataakin te euangkerio bwa e koaua bon aan te koaua. Te teimatoa ni koaua nakon te euangkerio bon aan te rairaki ae kakaawaki. Ti riai n ataia bwa te euangkerio e koaua ao ni bwaina te kokoaua nakon te euangkerio.

Ni kararoai ‘bwaai ni buaka ni kakaitara’ n aron te tinanikubeka, te kamoamoa, te aki ongeaba e kainnanoa riki ae tii kakoauaana ao ataakina. Namakinan te eti ao ae kaairua, te nanorinano, te rairannano, ao te tatauraoi n anganano a roko imwain kitanan ara bwai ni buaka ni kakaitara. Tao ngkoe ao ngai iai iroura ngkai ara bwai ni buaka ni kakaitara are e tukiira n rairaki ni koaua nakon te Uea? Ngkana iai, ti riai n raira nanora ngkai.

I berita bwa ngkai ti moanna n ataa te koaua ao n rairaki nakon te Uea, ti na teimatoa ni matoa ao n aki kamwaingaki ao n aki kona ni bwaka.