Mwakuri n Ibuobuoki rinanon Waaki ni Kakukurei te Ekaretia

Teuana te kawai ae ti kona ni buokiia raora ao kaain te uoote, kaain rarikira, ao raoraora bon rinanon waaki ni kakukurei n te Ekaretia. Ngkana tao ko bairea te waaki ni kakukurei ibukin kainnanon ke n te bwai are e tangiria temanna are ko buokiia ke ko kaoiia bwa a na iri waaki ni kakukurei ke taai n ibuoubuoki ibukiia tabeman, waaki ni kakukurei iaon ana karinan te uoote, titeiki, ke titeiki aika mwaiti a kona ni katauraoi kawai aika uaana ao ni kakukurei ni karekea te katiteuanaaki ao ni kakorakoraiia membwa.

Waaki ni kakukurei n te Ekaretia a kona naba ni karekei taai aika a mwaiti n ibuobuoki. N aron te katooto, waaki ni kakukurei a kona ni katauraoi taai ni mwakuri ni karikirake ake a kakabwaiaia tabeman ao ni karikirakea te reitaki ae tamaroa inanon te kaawa. Waaki ni kakukurei n te Ekaretia e kona naba n riki bwa te tai ni karoko irouia membwa ake aki kakaonimaki n te Ekaretia ao nakoia raoraoia man aaro tabeua ke raoraoia ake akea aia aro.

N raonaki ma aomata aika a mwaiti n ana waaki ni kakukurei te Ekaretia a karekea te tai ibukin te Uea ni kakabwaia ao ni kakorakora ara uoote, mwaanga, ke kaain rarikira, ao ara kaawa.

Katean Reitaki Aika Tamaroa

E nang roko te winta, ao David Dickson e aikoa ataia bwa tera ae nang karaoia ni kamanoia ana utu ni kabueeia.

David, buuna, ao natina aine aika uoman a bon tibwa mwaing naba nakon kaawan Fredonia, Arizona, USA, te buakonikai ae kiriin man tabukibuki ni katobibiaki n taian katati aika uraura ma ni korakora, te aroka ae titebo ma te buruukam, ao aroka aika manguroro baia.

Te mweenga are a kakabooa tikuia iai te utu ae Dicksons a katan iaon te kanaiai n te titoobu bwa buokan aia bwai ni kaura ai ao ni kabueeia. E waekoa n ataia David bwa rikorikoan te aia bon te rabakau ae riai ibukina bwa n tain te winta i Fredonia e bon kaonaki n te tinoo ao te aiti.

“Bon akea au aia ke au tao ke bon te rabakau bwa N na kanga ni kabongana teuana!” E taku David. “I aki ataia bwa tera ae N nang karaoia.”

Tabeman kaain te uoote a titirakina David ngkana e tau ana aia ibukiia ana utu ibukin buokaia n te winta ae nang roko. “E aki maan ataakina irouia bwa e aki tau ae irou,” e taku David. “A waekoa ni buokai imwiina kaain te kooram n unimwaane n riko aia. Ngkai I onrake n te kakaitau, I a butimwaea aia anganano.”

E a waekoa ni kunea David bwa te mwananga aei n nako n riko aia bon teuana ana waaki ni kakukurei te uoote ae e kaman baireaki, barongaaki raoi, ao ni karaoaki nanona. N ingabongin te Kaonobong teuana, David, kaain te kooram n unimwaane, ao tabeman kaain te uoote a nakon taian maunga n taian turaki ao te tureira.

“N te bwakantaai teuana, te kakaitau nakon aia bwai ni mwakuri ao rabakauia, kaain te uoote ibukin katauraoaia au utu n taian bwarikoriko n aia are a na kateimatoaira e kuri ni kaania uoua te winta,” e taku David. “Ma ae kakaawaki riki, I reiakinaki bwaai ni kabane ae I riai n ataia n riko aia i bon irou. N te tai are I kitana iai Fredonia, I ataia bwa N na kanga n taua te tao, ao I ibuobuoki n ana waaki ni kakukurei te uoote ake imwiina riki iaon te riko aia nakon ae I kona ni warekia.”

Ana waaki ni kakukurei te uoote n aron aikai aki tii karikirakea te reitaki ae tamaroa imarenaia kaain ana Ekaretia te Atua ma e karikirakea naba te reitaki ae tamaroa ma aomata nako inanon te kaawa.

“I uringa temanna te aine, ae tiaki kaain te Ekaretia, are e boou n te tabo,” e taku David. E riai ni kaura te aia man mweengana bwa e aonga ni kabueea. N te tai are ti ataa iai ana kaangaanga, ti kakoaua raoi bwa e tau ana aia ibukin kateimatoakina inanon tain te winta. E rangi ni karabwarabwa bwa e kuri n aki kona n taetae.”

Te mwakuri n ibuobuoki i Fredonia e kakoauaki bwa a bane ni mano aomata nako ao n abuee n tain te winta.

Karoko Irouia Tabeman ni Buokiia

Inanon karaoan au mwakuri ni mitinare i Romania, Meg Yost ao toana aki toki ni kawara te utu ae tuai man taromauri n te tai ae rangi ni maan. “Te utu ae Stanica a mena ibuakoia kaain moan te Ekareti i Romania,” e taku Meg, “ao ti tangiriia.”

Ngke e a roko te tai ni babaire ao ni barongai ana waaki ni kakukurei te mwaanga, a baireia taan kairiiri bwa te mwaanga e na riai ni karaoa “Te Tairiki ibukiia Bwaeoniia.” Aio e na riki bwa te tairiki ibukin bukamaruaia bwaeoniia ake a rangi n ninikoria n rianna rinanon te United States ni karokoia i Salt Lake Valley. E riki naba bwa te tai n anga karineaia bwaeoniia n te Ekaretia i Romania.

“Ti taku n ara iango bwa e na riki bwa te kawai ae nakoraoi ibukiia tabeman kaain te aro ni kaoti aia koaua ibukin rairakiia ao a kanga n tia n noora rikiraken te Ekaretia i Romania,” e taku Meg. “Ti waekoa n iangoia bwa te utu ae Stanica a riai ni kairaki iai. Ti kaoiia bwa a na iri, ao a rangi ni kukurei!”

N tairikin te waaki ni kakukurei, a teimatoa n tuai ni kaoti te utu ae Stanica ngke e a boo te tai ni waaki.

“Ti raraoma bwa ti taku bwa a nang aki roko,” e taku Meg. “Ma ngke a bo te tai, ao a rin n te mataroa. Te utu ae Stanica a kaota aia koaua ae nang tikiraoi ibukin te euangkerio ao te Ekaretia. E reke naba aia tai n rena ma tabeman kaain te aro ake a bon tuai man nooria n te tai ae rangi ni maan.”

Kaain te mwaanga a katangainai baia ao ni butimwaiia te utu ae Stanica. N te Tabati are imwiina, e rangi ni miimi ma ni kukurei Meg n noora Titita Stanica n te taromauri.

“Ngke I kawara te mwaanga tabeua te namwakaina imwina, e bon teimatoa n roroko!” E taku Meg. “I taku bwa reken te tai ni kaota ana koaua ao n namakina te kairaki ao ni kainnanoaki n te mwaanga e rangi ni buokaki iai.”

4 Iango ibukin te Mwakuri n Ibuobuoki rinanon Waaki ni Kakukurei n te Ekaretia

Bairei waaki ni kakukurei ake a na buoki kainnano: Waaki ni kakukurei bon kawai aika moan te nakoraoi ni katoki mwaitin kainnano aika kakaokoro. A tia ni baireaki ibukin katokan kainnano aika onoti ibukin te aomata ke te kurubu. A riai naba ni buoka katokan kainnanoia naake a iri waaki, ngkana tao te kainnano anne te kaai n ikikina raoi, n reiakina riki taekan te euangkerio, ke n namakina te Tamnei.
Kaoiia aomata ni kabane: Ngkai ko bairei waaki ni kakukurei, karaoa te waaki ae onoti ni kaoiia naake a na reke kabwaiaia man iriiran te waaki. Katikua n am iango kaain te aro aika boou, kaain te aro aika aki bati ni kakaonimaki, kairake, kairake n ikawai aika tuai ni iein, aomata aika aki toamau rabwataia, ao aomata tabeman man aaro tabeua. Anga te kakao ma nanoia ae a tangiria n am iango, ao kabwarabwara bwa e aera ngkai ko tangiria bwa a na roko.
Kaunga te iriiri: Naake ko kaoiia a na karekea riki ae mwaiti man taian waaki ni kakukurei ngkana e reke aia tai n iria. Teuana te kawai ni kaungaia aika roko bon karekeaia membwa ni kamanenai aia bwaintangira, rabakauia, ao aia tarena n tain te waaki ni kakukurei.
Ti butimwaai ngkami ni kabane: Ngkana a ira te waaki ni kakukurei raoraom, karaoa am kabanea ni kona ni karaoa ae a na namakina te butimwaeaki. N aron naba anne, ngkana iai aomata ae ko nooria ma ko aki kinaia, iraorao nakoia ao butimwaaia naba!