Ana Rinerine Lila
E maeka te tia korokaraki i Corrientes, Argentina.
“Rabwatau bon te tembora are e anganai Tamau” (Aia Boki n Anene Ataei, 153).
Lila e tangiria n rinea ae eti.
“Ai tain koroboki aika a tabu!” E taku Lila.
Lila e tatangiria ni wareware nakon tarina ae uarereke, Anita, ao mwanena te teei, Svetan. E a uakaan ana tai Llla ni bwabetito! Ni katauraoana, e tangiria ni wareki koroboki aika a tabu ni katoabong.
Lila e kauka ana boki ni karaki ni koroboki aika a tabu nakon te moan iteraniba. Ánika ao Svetan a kauangi ni kaniia bwa a aonga n noori tamneina.
“Kakauongo raoi bwa N na manga titirakini ngkami imwiina (ngkana e bane au wareware),” e taku Lila. Imwiina e a waaki ni wareka te moan mwakoro.
“Imwain ae ti bungiaki, ti maeka i karawa,” e wareware Lila. “A tuai ngkanne n reke rabwatara. Bon tamnei ngaira.”
Lila, Ánika, ao Svetan a tarai tamneia aomata aika a kunnikainiia n te mainaina.
“Tauraoi nakon ami moan titiraki?” Lila e rairaki nakon Ánika. “Kam nako mai ia imwain ae kam bungiaki?”
Ánika e uboi baina. “Karawa!”
“Eti anne,” e taku Lila. “Ao e nako mai ia Svetan?”
“E roko naba mai karawa,” e taku Ánika. Svetan e ngarengare ao e karina ana timoi i wiina. Lila ao Ánika a ngare. Svetan bon ngaia te kabanea ni kakateke n teuana n ririki i Argentina!
“Ara utu ni kabane a roko mai karawa,” e taku Lila. “Iesu ngaia naba. E roko bwa e buokiira bwa ti aonga ni manga maeka riki ma Tamara are i Karawa.” Lila e kotea tamnein Iesu iaon te iteraniba.
Imwiina ngke e tia ni wareware, Lila e teimatoa n iangoia bwa ai tera arora ngke ti tiku ni maeka ma Iesu i Karawa. E tangiria ni kan riki n ai Arona. E tangiria n tainako n rinea ae eti!
Te bong are imwina n te reirei, e a kokoa biroton Lila (ni kaota te un) ngke e tataninga n te rain ibukin te kaingabong. Ai aron ae e a kan kana te empanadas ngke Señora Ruiz e itii nako aon ana raurau. A rang boi kangkang!
Imwiina Señora Ruiz e kabwaroa niman Lila te miriki n te mwangko. Uu oo, e iango Lila. Te miriki e taraa n roo riki nakon are bon teina. N tabetai n ana reirei a renganna ma te koobe ke te ii nakon nimaia.
“Iai te ii ke te kobee ae renganaki ma te miriki n te bong aei?” E titiraki Lila.
Señora Ruiz e kateitea baina. “Teutana te kobee,” e taku. “Ko bon aki kona n ataia ngkana ko nimma.”
Lila e iango tabeua te tai. E uringnga arona ni kan riki n ai aron Iesu ao n rinea te eti. E ataia bwa nimakin te kobee bon te bwai are a taekinna burabeti bwa e na aki karaoaki.
“I aki, e rabwa. I aki mooi n te miriki n te bong aei,” e taku Lila. E moangare nakon Señora Ruiz. Imwiina e tekateka n amwarake.
N te tairiki anne, Lila e buoka Papi n irei bwainnamwarake n te umwanikuuka. E bon teimatoa n iangoi karaki inanon koroboki aika a tabu. E iangoa naba taekan te miriki.
“Papi?”
“Eng?” E taku Papi.
“Bukin tera e tangiriira Tamara are i Karawa bwa ti na karekei rabwatara?”
E iango Papi ngkai e kaitiaka teuana riki te raurau. “E koaua, E anganiira rabwatara bwa ti aonga n riki n ai Arona,” e taku. “Rabwatam bon mweengan tamneim. Anne te bwai ae ti nanonna ngkana ti taekinna bwa rabwatara bon taian tembora.”
E katoutoua atuna Lila. E anenenea te kuna iaon anne n tabetai n te Moanrinan! “Ngaia anne bukina Tamara arei Karawa e tangiriira bwa ti na kawakin rabwatara?”
“Bon anne raoi,” e taku Papi.
“N te bong aei, a rengana te miriki n te kobee,” e taku Lila. “I aki nimma, eng. I kataia n tararua au tembora.”
“I rangi ni kakatonga iroum,” e taku Papi. E kamwaui baina n te taara ao e inga ma Lila.
Lila e koona Papi ni kamatoa. E kukurei bwa e kawakina rabwatana are e a tia n anganna Tamana are i Karawa. ●