Banna ni katoto n te Ninikoria
Te Wewete ae Kakubanako nakon te Mition
E moangare Edwin Dharmaraju ngke e otinako man te marae ni wanikiba ao iaan otantaai. E kona n noori taian aroka bwaam n tei ni uaerinan n te kawai ao e aroka boin renganan amwarake n te mwakete ae uakaan. Ngaia ma buuna, Elsie, a mena i Inria! A tia ni maeka i Samoa, ma ngkai a okira mweengaia.
Edwin ao Elsie a aki tii roko ni kawara te tabo, kanga n anne. A kaman tia ni weteaki bwa a na mwakuri bwa mitinare ibukin Ana Ekaretia Iesu Kristo ibukiia Aika Itiaki ni Boong aika Kaitira. E namakina te nako n nano Edwin. Ma e ataia bwa e na buokiia Tamaia are i Karawa. A rang kaman tia ni buokaki iroun Tamaia are i Karawa.
Edwin ao Elsie a bungiaki i Inria. Ma Edwin e moan ongo taekan te Ekaretia ngke e reirei n te United States. E nako n taromauri ikekei n te taina. E wareka naba ana Boki Moomon. Ma ngke e a oki nako Inria, e a mwaninga taekan te Ekaretia.
Tabeua te ririki imwiina, Edwin ao Elsie a namakinna ae a riai ni mwaing nako Samoa. Edwin bon te tia rabakau n te tiaeanti ibukiia maan aika kawakawa, ao e reke ana mwakuri n te aba iaon karaoan te kakae. Bon mai ikanne are a kaitibo iai ma mitinare Edwin ao Elsie. Ngke e a manga moan wareka riki ana Booki Moomon Edwin, iai te bwai ae e namakinna ae rangi ni kakaawaki. Elsie e wareka naba ana Boki Moomon. A rineia bwa a na bwabetitoaki, n raonaki ma natiia mwaane ao aine.
Imwiin kaainakin te Ekaretia, te bwai ae rangi n tangiria Edwin bon ana utu ake a tiku i Inria bwa a na reiakina taekan te euangkerio. Te kangaanga bwa bon akea mitinare i Inria ae a na reireiniia! Edwin ao Elsie a korea aia reta nakon ana etekuata te Ekaretia ni butiia ngkana a kona ni kamwanangaia mitinare nako Inria.
Te bwai are e riki imwiina bon te kakubanako ae bubura. Beretitenti Spencer W. Kimball e weteiia bwa a na riki bwa mitinare i Inria!
Ao ngkai, aikai ngaiia.
Aia moan tabo ae a tiku iai i Inria bon ana auti tarin Edwin. Ana karo ma naan tarin ao mwaanen Edwin a mena naba ikekei. N te tai ae waekoa, Edwin ao Elsie a waaki n reireiniia. A kukurei aia utu n reiakina taekan te euangkerio.
Tabeua te wiiki imwiina, a ikotaki Edwin ma ana utu ni katobibia te tabo n uaua n te katawanang irairikin ana auti tarina. E a tia ni kaitiakaki te tabo n tebotebo, ni beeniaki, ao n kaonrakeaki n te ran ae boou. A bane ni bwai mainaina te koraki. Aine a kunnikainiia n te sari are toka nako aon angaia. Mwaane a bwainiia n te tiaekete ae mwaamwaa ao te kawaerake ae mwarairai.
E tei Edwin inanon te tabo n tebotebo ma tamana. “Samuel David,” E taku Edwin, n reken te kariaiakaki are I anganaki mai iroun Iesu Kristo, I bwabetitoiko n aran te Tama ao te Nati, ao te Tamnei ae Raoiroi.”
E namakina te kukurei Edwin ngke e bwabetitoa tamana. E a namakina riki te kukurei ngke e bwabetitoa tinana imwiina. Imwaain tokin te bong, e a tia Edwin ni bwabetitoiia 18 aomata!
Te bong are imwiina, Edwin ao Elsie a toka n te turein inanon onoua te aoa. A mwaiti aia utu ae a kawariia ao n reireiniia taekan te euangkerio. Edwin e bwabetitoia aman riki ana utu n te karaanga ae uakaan.
N te kabane, Edwin ao Elsie a kabanea 16-te aoa n toka n te turein ni kawariia ana utu Elsie. Taman Elsie bon te tia kairiiri n teuana te Ekaretia. E tuai bwabetitoaki, ma e taku n ana iango bwa ana Boki Moomon bon te boki ae tamaroa. E ibuobuoki n raira ana Boki Moomon nakon te taetae n Telugu, teuana mai buakon te taetae i Inria.
Ngke e bane aia mition Edwin ao Elsie, iai membwa aika bon tau aika boou ibukin waakinan ana moan mwaanga te Ekaretia i Inria! A kukurei Edwin ao Elsie ngke a oki nako Samoa. A kakaitau ngke e kamwanangaia Tamaia are i Karawa n nako ni mitinare! ●