Faneva juon Mijenede
Faneva ekar reinabōj ļo̧k n̄an juon iaļ eļap boub ie inabōj in wōt m̧weo m̧ōn. Emaron̄ loe armej ro rej bwili waan bwilbwil ko ko elōn̄ pejtebōļ, raij, nuknuk, im m̧weik ko jet ie n̄an wia kaki. Ekar maron̄ ron̄ an wa ko pipiip im kidu ko rōrrōr. Innām ekar ron̄ bar juon ainikien.
“M̧am̧a, juon armej ej kaļaļļaļ!” Faneva ekar ikkūr. M̧am̧a ekar kōppelļo̧k kōjem̧ eo. Ruo likao rej ekkaņōk kopā suit im tai ko rekar jutak ilo nabōj in kōjem̧ eo. Faneva ejjan̄in kar ello armej rōt kan rej ekkaņōk nuknuk rōt kan m̧okta ilo jukjukin pād eo ej pād ie ilo Madagascar.
“Kōm mijenede ro jān Kabun̄ eo an Jisōs Kraist im Armej ro Rekwojarjar ilo Raan Ko Āliktata,” juon iaer ekar ba. “Jej katakin armej kōn Jisōs. Jemaron̄ ke kwaļo̧k juon ennaan ippam̧?”
Faneva ekar lukkuun m̧ōņōņō ke M̧am̧a ekar kadeļo̧n̄ er n̄an lowaan m̧weo. Aolepān baam̧le eo rekar koba ippān doon n̄an ron̄jake kōn Jisōs Kraist im wāween An Kabun̄ eo kar bar ejaake juon alen ioon laļ in.
Ālkin raan eo, mijenede ro rekar loļo̧k baam̧le eo an Faneva elōn̄ alen. Rekar bōktok juon bok etan Bwebwenato ko jān Bok in Mormon. Faneva ekar em̧m̧an ippān riit ippān baam̧le eo an!
Juon raan inaaj erom̧ juon mijenede im kwaļo̧k kōn Bok in Mormon n̄an ro jet, Faneva ekar ba n̄an e make.
Bar juon iien ke mijenede ro rekar bar itok, rekar katakin baam̧le eo an Faneva kilen jar. Faneva ekar ekkatak bwe emaron̄ kōnono ippān Jemedwōj Ilan̄ jabdewōt iien, ilo jabdewōt jikin.
Juon raan inaaj erom̧ juon mijenede im katakin armej kōn jar Faneva ekar ļōmņak.
Juon raan mijenede ro ekar wōr juon aer kajjitōk eaorōk.
“Kwonaaj ke ļoor waanjon̄ak eo an Jisōs Kraist im peptaij?” juon iaer ekar kajjitōk.
Faneva ekar en̄jake m̧ōņōņō ilo buruōn. “Aaet!” ekar ba.
“Aaet!” būratōr eo an im M̧am̧a ekar ba.
Baba ekar bar ejjan̄in pojak n̄an peptaij. Ak ekar em̧m̧an ippān eļan̄n̄e aolepān ro ilo baam̧le eo an re peptaij. Im rekar aolep peptaij! Faneva ekar peptaij jān juon iaan mijenede ro me rekar katakin er kōn Jisōs.
Juon raan inaaj erom̧ juon mijenede im jipan̄ armej bwe ren peptaij, Faneva ekar ļōmņak.
Juon iaan men ko em̧m̧antata ippa ilo aō erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata kar etal n̄an Būraimere. Faneva ekar em̧m̧an ippān m̧akūtkūt im ioon elōn̄ m̧ōttan rekāāl. Ak men eo ekar em̧m̧antata ippān ej al al ko an Būraimere. Juon Jabōt ilo Būraimere, rekar al al ko kōn kwaļo̧k gospel eo.
“Ikōņaan erom̧ juon mijenede kiiō,” Faneva ekar al. “Ijjab kōņaan kōttar m̧ae irūttoļo̧k.”
Imaron̄ jino kōm̧m̧ane jerbal in mijenede kiiō, Faneva ekar kile. Ijjab aikuj kōttar m̧ae juon raan!
Jān iien eo, Faneva ekar reilo̧k n̄an wāween ko me kar kwaļo̧k gospel eo. Ekar kajjieon̄ erom̧ juon waanjon̄ak em̧m̧an. Ekar karuwaineneik tok armej n̄an Kabun̄ in. Ekar jipan̄ ro rūtūrin. Ālkin jejjo iiō ko, ekar rūttoļo̧k jon̄an ekar jino etal ippān mijenede ro n̄an katakin armej ro ilo bukwōn eo. Ilo jejjo bar iiō, ekar etal im mijen e make—ioon elōn̄ armej ro rekāāl im kwaļo̧k gospel eo, āinwōt mijenede ro rekar kwaļo̧k gospel eo ippān.