Juon iien Kōraelep Ij Make Iaaō
Rijeje eo ej jokwe ilo Utah, USA.
Kali ekar kōņaan juon m̧ōttan.
“The Holy Spirit whispers with a still small voice” (Children’s Songbook, 105).
Kali ekar etal n̄an jikin m̧ōn̄ā in raelep eo im reito reitak. Aolep ajri ro rekar kajju ettōr ļo̧k n̄an ro m̧ōttāer im aiin doon ilo tebōļ ko. Ruum eo ekar lukkun kauwaron̄ron̄ kōn ainikien limo im m̧ōņōņō im ettōn̄. Ej kab kar kein karuo raan in jikuuļ, ak āinwōt aolep im lōn̄ m̧ōttāer rej jijet turier ijjeļo̧k wōt Kali.
Ekar dāpij kein ijjūb eo an nien m̧ōn̄ā in raelep eo kijen im etal n̄an juon iaan tebōļ ko. “Imaron̄ ke jijjet turūm̧?” Kali ekar kajjitōk.
Juon leddik ebūroro bōran im eaitok ekar reilo̧k n̄an e. Ekar kōraat im kajiboluuli bōran. “Jaab. Elōn̄ armej ej jijjet ije,” ekar ba.
“EM̧M̧AN.” Kali ekar em̧akūt n̄an bar juon jea ejjeļo̧k kobban im likūt nien men eo kijen ioon tebōl eo.
“Kwojjab maron̄ jijjet ijin! Ij dāpij jea in n̄an bar juon armej,” juon ļaddik ej kaņōk jiln̄ūj maroro ekar ba. Ekar jipedļo̧k nien men eo kijen n̄an būļoor eo. Ro m̧ōttan rekar ettōn̄.
Kali ekar jilļo̧k im bar bōk nien men eo kijen. Kali ekar ito itak ilo jikin m̧ōn̄ā in raelep eo im jijet ilo juon jea ejjeļo̧k kobban. Ekar lo juon armej me ej jokwe turin m̧weo im̧ōn im ekar kajjieon̄ iakweiki, ak ekar reiļo̧k n̄an bar juon jikin. Kali ekar kajjememe. Etke aolep rekar jab kōņaan m̧ōttāiki eō?
Kali ekar jilļo̧k im lale wōt men eo kijen. Ekar jab kōņaan m̧ōn̄ā. Ekar ir mejān, kiil nien men eo kijen, im etal.
Em̧ōj an aolep kadede ikkure ippān ro m̧ōttāer. Kali ekar jijjet make iaan ilo jikin jijjet ko im lale an ajri ro jet ikkure im m̧ōņōņō ilo an jab ikkure ippāer. Innem Kali ekar kile bwe juon ļaddik jon̄an wōt iiō eo an ekar jijet make iaan ioon wūjooj ko. Ekar kaņōk juon an jiln̄ūj yellow, im koļan bōran rekar ijutaktak.
Kali ekar reijokokoļo̧k. Ekar lo juon kurup in leddik jān kūlaaj eo an rej ikkure poorjikuwāār. Ekar kōņaan bwe rej kūri bwe en kobaļo̧k ippāer im ikkure.
Kali ekar bar reilo̧k n̄an ļaddik eo. Ekar jilļo̧k kōn bōran, im ittūm̧ wūjooj ko iturin neen. Kali ekar keememej juon men Jinen ekar ba jet iien: Lale ajri rōt en me rej make iaer.
Kali ekar kajjememe. E ekar barāinwōt ajimakeke. Ejjeļo̧k en ekar kajjieon̄ erom̧ ro m̧ōttan!
Innem Kali ekar ļōmņak kōn iien eo ekar peptaij iiō eo ļo̧k. Ekar kallim̧ur n̄an ron̄jake Jetōb Kwojarjar Bolen Jetōb Kwojarjar ekar jipan̄ e keememej ta eo Jinen ekar ba n̄an e. Bolen Jetōb Kwojarjar ekar kajjieon̄ ba n̄an e bwe en ikkure ippān ļaddik eo me je jiln̄ūj yellow.
Kali ekar reilo̧k im jutak. Juon en̄jake em̧m̧an ekar pād iburuōn. Ekar etal im jijet turin ļaddik in ilo wūjooj ko.
“Iakwe,” ekar ba.
“Iakwe,” ekar bar kadikdik wōt an ba.
“Kōļar ta eo em̧m̧an tata ippam̧?”
“Um.
“Jejjet. Em̧m̧an ippa kōļar piin̄,” Kali ekar ba. “Ewōr ke menin mour en em̧m̧an tata ippam̧?”
Ļaddik eo ekar kajim̧weik jidik an jijjet im reilo̧k n̄an e. “Aaet. Elukkuun em̧m̧an ippa dinosaurs.”
“O, bar n̄a. Menin mour eo em̧m̧an taa ippa ej triceratops.”
Ļaddik eo ekar ettōn̄ dikdik.
Innem ekar jan̄ bell eo. Kali ekar jutak im bar iakweiki ļaddik eo. Ekar ettōn̄ dikdik ke ej rool ļo̧k n̄an kūlaaj ruum̧ eo an make iaan. Ekar jab bolen wōr m̧ōttan eo epaake, ak ekar en̄jake m̧ōņōņō ilo an jeļā bwe kam̧ōņōņōik juon armej ilo iien kakkije eo.