Ad Kōjatdikdik, Ad Meram, Ad Kajoor

Jān Elder Ronald A. Rasband

Jān Doulul eo an Jon̄oulruo Rijilōk ro

Jān juon Jota ippān juon Ritōl Eoutiej ej kōm̧m̧an ilo mejatoto n̄an aolep rūkaki ro an kabun̄ ilo Pāp. 8, 2019.

Ke ikar ekkapit āinwōt juon Rijilōk, eo ejitōnbōro Būreejtōn Thomas S. Monson (1927–2018) ekar kwaļo̧k kar karōk bwe in erom̧ juon rikam̧ool ilo etan Jisōs Kraist ilo aolepān laļ in. Ikar jab bōke bajjōk eddo in. Ikar ekkatak im kejōkļo̧kjeņ elōn̄ alen kōn jeje ko rekwojarjar, kwaļo̧k kadkadin Irooj kōn et ko Etan im taitōļ ko an. Aolep men kein me inaaj kwaļo̧ki ippami rej jān eoon ko me rej kakeememej kōj kōn kōjatdikdik eo ad ej pād ilo E.

E ej Kōjatdikdik eo an Israel (Jeremaia 17:13), Iju Raan Erabōlbōl (Revelesōn 22:16), Seperd eo Em̧m̧an (Katak im Bujen Ko 50:44), Rikakpilōklōk (Aisea 9:6; 2 Nipai 19:6), Irooj in Aenōm̧m̧an ( Aisea 9:6; 2 Nipai 19:6), Rilo̧mo̧o̧r (Rom 11:26), Meram in Laļ (Jon 8:12), im Pris eļap n̄an men ko rem̧m̧an renaaj itok (Hibru 9:11). E ekajoor n̄an lo̧mo̧o̧ren (Alma 34:18; Katak im Bujen Ko 133:47) im E eo epād ippān aolep kajoor (Katak im Bujen Ko 61:1).

Wāween mour eo an Kraist, jenkwon jerbal ko an, im an jipan̄ rekitbuuj aolep men. E ej pād ijo n̄e jej m̧ōjņo̧ļo̧k n̄an wōnm̧aanļo̧k wōt. Im eļan̄n̄e jej tūppok, An “meram ej romaak ilo marok” (Katak im Bujen Ko 6:21) eļapļo̧k an meram jān m̧okta. Ej iakwe kōj ilo iien ko me jej meram im marok ie.

Erom̧ juon rikaļoor an Jisōs Kraist ejjab juon jerbal in kajidede. Iaļ eo an em̧ōj kōkaļļeiki ilo jejjet kōn jenkwon Neen. Ilo ad ļoor E, jej jino iakwe ta ko Ej iakwe. Ilo ad kōkāāl bujen ko ad Ippān kajjojo wiik ilo ad bōk kwojkwoj eo ekwojarjar, jej eddōkļo̧k ilo ad meļeļe kōn E āinwōt Ripinmuur eo an laļ (Katak im Bujen Ko 93:9), Jetōbōn M̧ool eo (Katak im Bujen Ko 93:9), im Naan eo (Katak im Bujen Ko 93:8).

Ro m̧ōtta rejitōnbōro, en̄in ej Rilo̧mo̧o̧r eo Ijeļā kake, eo me ij iakwe im kautiej e kōn aolepān buruō. Jān tum̧ūlaļ in būruō ij kwaļo̧k aō kam̧ool kōn E im em̧m̧an eo An im tūriam̧o. E ekar kallim̧ur, “Kom̧ij ro jera, im kom̧ naaj wōr ami jolōt Ippa” (Katak im Bujen Ko 93:45).

Jisōs Kraist ej uwaak eo n̄an būrabļōm ko im apan̄ ko me rej m̧ōttan idajon̄jon̄ ko an mour in. N̄an meļeļe mijen eo An im gospel eo An, iakwe eo ad n̄an E im tōmak eo ad ilo im kōjatdikdik ilo E ej letok n̄an kōj kajoor.