Rūm̧m̧an Ded ro
An̄n̄urlep ej Āinwōt Ke Jum̧ae?
Rijeje eo ej jokwe ilo Texas, USA.
Juon meļeļe eo em̧m̧an kōn an an̄n̄ūrlep maron̄ jipan̄ kōj lōke menin, juon raan, Irooj enaaj kanemkwoj kōj jān kōm̧akoko.
Ilo iien ko jej jebwābwe, an̄n̄ūrlep ej juon men eo me ej kainepataik kōj im emaron̄ ukōt mour ko an jet armej. N̄e jej kōjerbal juon men etōr jān jon̄an n̄an ko jān men ko reppen jej iooni ilo mour in, āinwōt m̧ōn̄ā, uno ko taktō ko rej litok, social media, ruruwe, alooj pija ko renana, riab, ikkure kōn jāān, ak ļā jān jon̄an kōmourur, emaron̄ pidodoļo̧k ad dāpdep wōt ilo men ko jej an̄n̄ūri.
Ilo aō alooje armej ro rem̧m̧an, eļap iakwe ippāer, en̄taan kōn an̄n̄ūrlep, jab baj luuji wōt jibadbad ko kōn kāālet ko rebōd--ikar oktakļo̧k n̄an jeje ko rekwojarjar im n̄an lale kein meļeļe ko rekāāl tata ikkijeen an̄n̄ūrlep n̄an em̧m̧an aō meļeļe.
Wūjooj ko Renana an An̄n̄ūrlep
Lukkuun etale an̄n̄ūrlep emaron̄ āinļo̧k wōt kea kōn juon jikin kallip. Jejjab juļo̧k wūjooj ko renana juon wōt kōttan im kōjatdikdik bwe ededeļo̧k. Jejeļā enej bar lōn̄ wūjooj ko renana renaaj eddōk, kōn menin kea im kintak aolep iien wūjooj ko renana n̄an kōjparok mennin eddōk ko.
Eļan̄n̄e jej apan̄ kōn an̄n̄ūrlep, jemaron̄ ebbweer n̄e jej nan̄inmej jekdo̧o̧n ālkin ad ukweļo̧k im kappukot jipan̄. Jemaron̄ bwilōn̄ im illu bwe mellijon̄ kein eļaptata aer kajoor ālkin juon tōre in lukkuun m̧ōņōņō im lukkuun būrom̧ōj ilo mour ko ad. (Āinwōt eļapļo̧k wūjooj ko rej itin eo̧n̄ ālkin an wōt ak ālkin juon lan̄ ekajoor.)
An̄n̄ūrlep ņae Jum̧ae ilo Kōņaan
Ikar lo bwe Setan ej kōjerbal an̄n̄ūrlep āinwōt “kein kam̧ool” bwe jej jolete ikdeleel ko renana, bwe jekar baj kōtmene wōt būrom̧ōj jān jinoin, ak bwe Irooj em̧ōj an bōjrak in jipan̄ kōj. Eo enana ej kōjerbal jook n̄an kabbweer kōj, kwaļo̧k ke jekdo̧o̧n ewi jon̄an ad ukweļo̧k, enaaj itok wōt kabo ko.
Elōn̄ un ko unin an armej mour kōn an̄n̄ūrlep, ak an̄n̄ūrlep ekkā an jino ilo am̧ kajjieon̄ juon men n̄an kam̧ōņōņōik eok make “aikuj ko reļļap im rejjab tōprak.”1 Aaet ilo an jum̧ae maron̄ tōl n̄an an̄n̄ūrlep im an̄n̄ūrlep ko emaron̄ kōm̧m̧an jerawiwi, ekkā an aer waļo̧k ak kilepļo̧k ilo m̧ōjņo ijjeļo̧kin jum̧ae ilo kōņaan.2
Eļap kam̧m̧oolol, jejeļā bwe m̧ōjņo emaron̄ bar letok iien ko rem̧m̧an n̄an ekkatak kōn jouj im ejaake tōmak eo em̧wūlaļ ilo kajoor in kōmour eo an Jisōs Kraist.3
M̧ae iien raar Anemkwoj jān Kōm̧akoko
Jej lo ļōmņak ko n̄an etale im ko jān kein lokjak in an̄n̄ūrlep jān ruo kurup in armej ro ilo Bok in Mormon: Armjej ro an Limai im armej ro an Alma.
Kūrup kein jim̧ōr ekar pād ilo kōm̧akoko ilo juon iien aitok. Jim̧or rekar kile bwe “ekar ejjeļo̧k iaļ bwe ren kōtļo̧k er jān peier” jān kōm̧akoko (Mosaia 21:15). Jim̧or, ilo jejjet in iien, rekar oktaļo̧k n̄an Irooj im kajjitōk jipan̄.
Armej ro an Limai rekar pād ilo kōm̧akoko kōn un ko rejerawiwi. Ilo aer jab kappukot jipan̄ eo an Irooj, rekar tariņaeik ro rekar jum̧aeikier “ilo illu” jilu alen. Rekar luuji kajjojo tariņae ko. Ke rekar jino ettā buruōer, “Irooj eaar rum̧wij n̄an ron̄ kūr eo aer … [ak E] eaar ron̄ jan̄ ko aer, im jino kapidodo būroun riLeman ro bwe ren jino kameraikļo̧k eddo ko aer” (Mosaia 21:5; eoon eo eaorōk kar kobaiktok). Rekar jeraam̧m̧an kōn an kar ļapļo̧k an ettā buruōer, ak “Irooj eaar jab lo ekkar bwe En kōtļo̧k er jān kōm̧akoko” m̧ae jet iien tokālik.
Armej ro an Alma rekar pād ilo kōm̧akoko jekdo̧o̧n aer mour jim̧we, ak rekar “lutōkleplep burueer n̄an [Anij].” Jekdo̧o̧n rekar jeļā kōn ikdeleel ko rejim̧we, Anij ekar kōtļo̧k iien ikōtaan kōm̧akoko im aer anemkwoj. Ilo aer kar wōnm̧aanļo̧k wōt im pedped ioon E, Ekar kallim̧ur bwe Enaaj “kōmeraik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālikimi, em̧ool n̄e kom̧ij pād [wōt] ilo kōm̧akoko.” N̄an ukōtļo̧k, raar “ajeļo̧k er ilo itok-limo im kōn ineem̧m̧an n̄an aolepān ankilaan Irooj” (Mosaia 24:12, 14, 15).
Jim̧or kōrup ko rekar anemkwoj āliktata. Im em̧ōj barāinwōt kallim̧uri kōj bwe eļan̄n̄e jej oktakļo̧k n̄an Irooj ilo kōm̧akoko ko ad, je “maron̄ jutak āinwōt rikam̧ool n̄an [Eō] tokālik” im kom̧ naaj “jeļā kōn m̧ool in bwe N̄a, Irooj Anij, ij loļo̧k armej ro Aō ilo en̄taan ko aer” (Mosaia 24:14)—im aer an̄n̄ūrlep!
Kom̧in Mōņōņō
Eļan̄n̄e kwoj apan̄ kōn an̄n̄ūrlep, keememej bwe kōn jipan̄ eo an Irooj, iien in emaron̄ lukkuun em̧m̧an bwidej eo n̄an katōk m̧wil ko āinwōt an Kraist. Ilo an ļapļo̧k am̧ ettā bōro, kwonaaj maron̄ ekkatak kijenmej, tūriam̧o̧, niknik, im ettā.
Loļo̧k ritōl ro an priesthood im ro remaron̄ lewaj jipan̄, im kōjerbal elōn̄ kein jipan̄ ko me Jemedwōj Ilan̄ ekar litok n̄an jipan̄ eok pukot anemkwoj. Pedped ioon Irooj; āinwōt am̧ ļoor E ilo tiljek, E emaron̄ ukōt apan̄ in kwoj jelm̧aeiki me ekaburom̧ōjm̧ōj im ekallulu n̄an juon iien em̧m̧an ekajoor n̄an kōkāāl kōj ilo mour in jetōb.4
Juon Rikwojarjar ilo Raan ko Āliktata m̧okta jān Australia, ke ekar keidi mour eo m̧okta n̄an kiiō, ekar ba: “Mour eo aō m̧okta [ekar] juon āne jem̧dān kōn wūjooj ko renanat, ekar pen an eo̧n̄ wūt ko ilubwiljin wūjooj ko. [Ak] kiiō em̧ōj an lukkuun jako ujooj ko renana, im wūt ko rej jino eo̧n̄ ilo jikin ko aer.”5
Ilo am̧ im n̄a niknik ilo kintak wūjooj ko renana im karreoik jikin kallip eo im oktakļo̧k n̄an Irooj ilo mellijon̄ ko ad, jenaaj bōk kōjeraam̧m̧an eo kar leļo̧k n̄an armej ro an Alma: “Kom̧in aenōm̧m̧an, bwe ilo ilju Inaaj kōtļo̧k kom̧ jān kam̧akoko” (Mosaia 24:16).
Wōnm̧aanļo̧k in kintaki wūjooj ko renana—iien m̧admōd eo enaaj wōr tokjen!