Jerbal in Karejar ilo ad kōjerbal Būrookraam̧ an Ajri im Jodikdik ro

Karuwaineneik ro jet n̄an eddōkļo̧k im jipan̄ er m̧aanļo̧k elukkuun aorōk ilo jerbal in karejar.

Iien ko rem̧m̧an reļļap n̄an kōm̧m̧an jerbal in karejar ilo ad kōjerbal Būrookraam̧ an Ajri im Jodikdik ro. Bōlen ewōr nejūm̧ ajri ro im jodikdik ro ilo m̧weo im̧ōm̧ make. Bōlen kwoj juon ritōl ilo būrookraam̧ eo ak kwoj jerbal in karejar n̄an baam̧le ko me ewōr nejier ajri im jodikdik. Ak bōlen kwar jeļā kajjien jet iaan ajri im jodikdik ro (me rej aikuj jutak ilo etadwōj). Jabdewōt jekjek ko komaron̄ pād ie, elōn̄ wāween ko n̄an kōjerbal būrookraam̧ eo ak pedped in katak ko n̄an kōjeraam̧m̧an mour ko an ro jet.

Eddōkļo̧k Jim̧or Ippān Doon

Ilo jentōr eo an Ajri im Jodikdik ro ej juon jibadbad n̄an kajjieon̄ kajjojo raan n̄an erom̧ eļapļo̧k āinwōt Rilo̧mo̧o̧r, eo me ekar lukkuun wāppen ilo an kar jerbal in karejar. Elōn̄ iaan ro me rekar bōk koņaer ilo būrookūraam̧ eo rekar ekkatak bwe jej eddōkļo̧k ilo elōn̄ eria ko ilo mour eo am̧, en em̧m̧anļo̧k am̧ kōm̧m̧ane jipan̄ ak jerbal in karejar n̄an ro jet.

Ak kōn būrookraam̧ an Ajri im Jodikdik ro, kōjeraam̧m̧an ro jet ejjab aikuj kōttar m̧ae kwaar ekkatak juon men. Jerbal in ekkatak make ej letok iien ko rem̧m̧an n̄an jerbal in karejar.

N̄an juon likao me etan Prophet eo ej jokwe ilo Ghana, ej kōm̧m̧an juon kōttōpar ilo Ajri im Jodikdik ro n̄an ekkatak wāween n̄an kōjan̄jan̄ piano ekar ijjino eo wōt. “Ej aō kōttōpar n̄an barāinwōt jipan̄ armej ro jet jeļā ta eo ij ekkatak kake,” Prophet ej ba.

Men̄e ejjan̄in erom̧ juon rūkaki, kōttōbar eo an ekar m̧ōj an ļapļo̧k n̄an juon men eo eļap jān jon̄an eo ekar antooneļo̧k. Ekar wōr kiiō 50 rijikuuļ rej bōk kūlaaj piano ko ilo im̧ōn jar eo ippāļo̧k Prophet. Im eo me je katakin Prophet im ro rijikuuļ ro jet 50? Alexander M. im Kelvin M., jim̧or 13 aerro iiō. “Jej kōņaan kwaļo̧k jerbal in jouj n̄an armej ro jet,” Kelvin ej ba.

Jilu raan ilo juon wiik ruo jodikdik rej katakin kūlaaj in piano ilo ejjeļo̧k wōņāān n̄an aolep ro rej itok im ekkatak. Elōn̄ bar iaļ in kōjeraam̧m̧an ko n̄an kūlaaj in piano eo. Jejjo iaan rijikuuļ ro kar kwaļo̧k kadkadier n̄an Kabun̄ in kōn kūlaaj in piano tokālik rekar ekkatak kōn gospel eo im kar kālet n̄an peptaij.

Ilo ad kōm̧m̧an kijejeto n̄an kōkm̧anm̧anļo̧k kōj make, jemaron̄ jerbal in karejar n̄an ro jet ilo ad karuwaineneik er n̄an kobatok ippād.

Juon Wāween eo Ewājepdik n̄an kōm̧m̧an Jerbal in Karejar

Āinwōt juon stake Būraimere būreejtōn, Sabrina Simões Deus Augusto jān Curitiba, Brazil, ekar lo wāween wōnm̧aanļo̧k im eddōkļo̧k an juon make ilo m̧ōttan ko an būrookraam̧ eo ej kōjeraam̧aan ajri im jodikdik ro ilo stake eo an. Ak ekar barāinwōt lo elōn̄ wāween ko rellōn̄ n̄an kōjerbal ta eo ekar ekkatak kōn wōnm̧aanļo̧k im eddōkļo̧k ilo ijjitōn̄ eo an āinwōt juon rikarejar kōrā.

“N̄e ij jeļā juon taļōn,” Sister Augusto ekar ba, “Imaron̄ kōjerbal taļōn eo n̄an kōjeraam̧m̧an juon eo ij jerbal in karejar n̄an e.”

Sister Augusto ekar katakin juon iaan sister ro aō n̄an eo em̧ōj jitōn̄e bwe en katakin e kilen kōm̧m̧an chocolate truffles. Sister in kiiō ej kōm̧m̧an im wia kake truffle n̄an jipan̄ kōmour wōt bajōt eo an baam̧le eo an. “Allōn̄ ko tokālik, ikar jeraam̧m̧an ke bar juon sister ekar katakin eō kilen kōm̧m̧an bilawe honey bwe in wia kake, ” Sister Augusto ekar ba. “Kōļapļo̧k im kwaļo̧k taļōn ko ad emaron̄ kōjeraam̧m̧an mour ko an ro jet im kam̧ūlaļļo̧k jem̧jerā ko āinwōt rikarejar kōrā ro.”

Ewi wāween an Būrookraam̧ an Ajri im Jodikdik ro Maron̄ Jipan̄ Eok Jerbal in Karejar?

Karuwaineneik ro jet n̄an bōk koņaer ilo būrookraam̧ an Ajri im Jodikdik ro.

Komaron̄ karuwaineneik baam̧le ko an jodikdik im ajri ro kwoj jerbal in karejar n̄an er n̄an bōk koņaer ilo būrookraam̧ an Ajri im Jodikdik ro. Emaron̄ itok limoer n̄an bōk koņaer ilo m̧akūtkūt ko, wōnm̧aanļo̧k im eddōkļo̧k an juon make, ak barāinwōt ekkatak gospel eo āinwōt m̧ōttan ko ilo būrookraam̧ eo. (N̄an meļeļe ko reļļapļo̧k kōn jerbal in karejar kōn Itok, Ļoor Eō lale “Jerbal in karejar kōn Itok, Ļoor Eō,” ilo Jeptōm̧ba 2020 Liaona.)
Jutak likier kōn kōttōbar ko aer.

Āinwōt juon rikarejar m̧aan ak kōrā n̄an baam̧le ko me ewōr nejier jodikdik, kwoj pād ilo juon jerbal em̧ōj kōjeņoļo̧ke n̄an kwe n̄an jutak likier kōn kōttōpar ko me remaron̄ jerbal m̧aanļo̧k kaki ilo būrookraam̧ eo an Ajri im Jodikdik ro. Āinwōt an kōttōpar ko aer make, eļan̄n̄e kwojeļā ta ko rej itok limoer ie, komaron̄ leļo̧k jipan̄ ilo elōn̄ kain wāween ko. Menin emaron̄ bōk wāweeen kappukot kein jerbal ko kwoj kappukoti, jerbal āinwōt juon riekajet n̄an lale aer kōm̧m̧an kukiij, ak erom̧ juon rijipan̄ ilo juon eria ijo ewōr am̧ jeļā kake. Kwojeļā ke wāween jāniji oil eo ilo juon wa? Kiij nuknuk eo epotak? Kwoj ke juon eo etijem̧ļo̧k ilo intōrpiu n̄an jerbal ko? Komaron̄ kwaļo̧k jeļā eo am̧ ak kapeel ko ewōr ippam̧ eļan̄n̄e rej itok limoer ie.
Karuwaineneik ro jet n̄an m̧ōttanļo̧k kōttōpar eo am̧ n̄an wōnm̧aanļo̧k im eddōkļo̧k.

Wōnm̧aanļo̧k im eddōkļo̧k an juon make ejjab n̄an wōt ajri im jodikdik ro. Komaron̄ bōk koņaam̧ ilo būrookraam̧ eo make jekdo̧o̧n jete am̧ iiō. Ilo am̧ joļo̧k iien kōkm̧anm̧anļo̧k eria ko in mour eo am̧ ilo mour in jetōb, iiaio, ānbwin, im jeļāļo̧kjeņ, enaaj em̧m̧anļo̧k am̧ kōpooje eok n̄an jerbal in karejar n̄an kajjojo, jekdo̧o̧n wōn eo kwoj ioone. Im āinwōt Prophet ilo Ghana, komaron̄ kōjeraam̧m̧an ro jet ilo am̧ karuwaineneik er n̄an bōk koņaer ippam̧, men̄e ejaake kūlaaj in piano, etal n̄an kūlaaj in kōmourur ānbwin, ak ekkatak juon kajin ippān doon.
Kōm̧m̧an bwe jerbal in karejar en juon kōttōbar.

Ļōmņak n̄an joļo̧k iien kajjojo raan n̄an jerbal in karejar. Menin emaron̄ jilkinļo̧k juon text ak bōjrakļo̧k im lale ejet aolep kain ak karōk juon iien ippān doon. Emaron̄ kitbuuj bōk iien n̄an kōkaļļeik kaļanta eo kōn raan in ļotak ko an ro kwoj jerbal in karejar n̄an er ak ļoor er ilo social media n̄an kappukot ta eo reitok limoer kake ak rej kab tin kōm̧m̧ani raan kein. Emaron̄ bar joļo̧k ļalem wōt minit n̄an ļōmņak kake kōn ta eo juon armej ej aikuji emaron̄ tōl n̄an ļōmņak ko rem̧m̧an me komaron̄ kōm̧m̧an juon oktak.