Ekar Jipan̄ Kōmour Eō
Eo m̧ōtta ekar ron̄ ke ikar nan̄inmej im ekar jilkintok juon bajōļ ekar make kōm̧m̧ane eļaptata n̄an n̄a.
Kōmeļeļe jān Joshua Dennis
Eto aō ļōmņak e n̄a make aolep iien āinwōt juon armej eo eāājmour. Kōn menin ikar ilbōk ke ikar rūj tok juon jibbon̄ im en̄jake an lukkuun kenaak ubō im āinwōt n̄e ettin bokkoļo̧k. Ikar kōkairiir n̄an aujpitōļ, ak ālkin elōn̄ awa in kakkōlkōl ko, taktō ro rekar jab maron̄ lo nan̄inmej eo aō. Rekar karool eō n̄an m̧weo, men̄e ikar en̄taan wōt kōn eļap metak. Kōn menin ekar jino iien aeitok tarin jiljilimjuon allōn̄ in aō metak im loļo̧k taktō, deļo̧n̄ ilo aujpitōļ, im ļap in metak me ijjan̄in kar en̄jake ilo mour e aō.
Ikar lukkuun jino būrom̧ōj im inepata. Ikar aikuj n̄an joļo̧k kūlaaj ko ao ilo college im bar ro̧o̧lļo̧k im jokwe ippān jinō im jema. Ikar jab maron̄ etal ippān ro m̧ōtta. Ekar lukkuun kōmmetak n̄an kōm̧m̧an jabdewōt kain itok limo ko aō. Ikar en̄jake bwe aolep men me ij kea kaki—kōjatdikdik ko aō, jem̧jerā ko aō, taļōn ko aō—rekar peddakilkil, im kiiō m̧ōttan kein kōn kar n̄a eo m̧okta ekar lukkuun pen n̄an bar bajōļ e ak kōmouri. Ikar jino bwūlōn̄: Ekōjkan an Jemedwōj Ilan̄ kar maron̄ kōtļo̧k menin bwe en waļo̧k n̄an n̄a? Ekar jab iakwe eō ke?
Ālkin bar juon iien ekōmmetak im ekalulu n̄an loļo̧k taktō, aolep men ikar kōņaan kōm̧m̧ane kar nukuj ānbwinū āinwōt juon bo̧o̧lim jan̄. Ak ke ikar tōpar m̧weo, ikar lo juon men ij kab loe ilo tōņaak eo ilo tum̧aan in m̧weo: juon bo̧o̧k in juuj em̧o̧r em̧ōj tāpe im em̧ōj tāipi im likūt eta ie.
Juon leta ioon bo̧o̧k eo ej kwaļo̧k ke bo̧o̧k in ekar itok jān juon iaan ro m̧ōtta. Ekar ron̄ ke ikar nan̄inmej im ekar kōņaan kam̧ōņōņōik eō. Ke ikar kōpelļo̧k bo̧o̧k in juuj eo, ikar loe bwe ekar obrak kōn m̧ōttan wūj ko. Ekar juon bajōļ kōm̧m̧an jān e make eļaptata n̄an n̄a.
Ke ikar bajōļi ippān doon, ikar jino jan̄. Bajōļ eo ekar kwaļo̧k jekjek in eta, kar jepooļe kōn ennaan ko rem̧m̧an kōn iakwe im naan in kōketak. Ikar en̄jake bwe m̧ōttan ko rejepelōklōk kōn n̄a make rekar jipan̄ kōmour eō ke ikar aiin ippān doon menin letok eo jān eo m̧ōtta.
Juon iien ekadu tokālik, ikar jino ebbōk uno n̄an kadikļo̧k nan̄inmej ko ippa im ekar jipan̄ taktō jeļā ta nan̄inmej eo. Jekjek eo ikar pād ie ejeja im kar maron̄ kōmouri, im kōn uno ko rekkar, ikar bar jepļaak n̄an ājmour eo aō jinoin.
Jekdo̧o̧n n̄e ikar mour, ikar jab meļo̧kļo̧k ta eo ikar ekkatak jān menin. Kōn menin letok eo em̧m̧an jān eo m̧ōtta, ikar jeļā bwe eļap iakwe eō im bwe Jemedwōj Ilan̄ ekar jab meļo̧kļo̧k eō. Ālkin allōn̄ ko in aō en̄taan, ij kam̧m̧olool kōn jouj an eo m̧ōtta im iakwe eo an Jema Ilan̄, ikar bar mour juon alen lukkuun mour.