Unleplep in Aō Peptaij
M̧okta jān aō peptaij, ikar jijet make iaaō im jar bwe ro m̧ōtta ren itok āinwōt juon menin kabwilōn̄lōn̄.
Kōmeļeļe jān Julia Yellow
Ke ikar dik ikar jokwe ilo juon jikin ettoļo̧k jān taun ilo Taipei, Taiwan, ikar jab jeļā kōn mijenede ro. Kōn menin kar jinointata in aō ikar ioon er, ikar lukkuun kōņaan jeļā kōn ennaan eo aer. Ekar jab bōk eļap iien m̧okta jān aō kar kijoroor in ļoor katak ko aer im mour kōn gospel eo ilo mour eo aō. Ikar en̄jake bwe menin ekar juon iaļ n̄an n̄a bwe in maron̄ jeļā eļan̄n̄e m̧ool ke elōn̄ Anij.
Ilowaan wōt juon allōn̄, em̧ōj katakin eō kōn gospel in im kien ko me rekar katakin kaki m̧okta jān aō kar peptaij. Aenōm̧m̧an ekar jok ippa kōn jar, ikar bōk revelesōn eo aō make jān aō ekkatak jeje ko rekwojarjar, ikar jan̄in joļo̧k juon iien jar ilo iien kweilo̧k ko an Kabun̄ in. Ikar kālet bwe ij aikuj peptaij.
Men eo epentata ikar jelm̧aeiki kar būrabļōm ko me rekar deļo̧n̄etok jem̧jerā eo aō ippān jet iaan ro m̧ōtta kōnke rekar jum̧ae aō kobatok ilo Kabun̄ in. Ikar jar n̄an ņa mejļan būrabļōm kein, ak jemjerā eo am ekkar jab em̧m̧anļo̧k.
Ikar karuwaineneik ro m̧ōtta n̄an peptaij eo aō, ak rekar kajejtokjen kajjitōk eo aō. Ikar jab lukkuun jeļā ta eo in kōm̧m̧ane. M̧okta jān peptaij eo aō, ikar jijjet make iaaō ioon kauj eo ilo jikin deļo̧n̄ eo an m̧ōnjar eo, jar bwe ro m̧ōtta ren itok āinwōt juon menin kabwilōn̄lōn̄ bwe in maron̄ ba n̄an er kōn oktak ko rem̧m̧an ikar kōm̧m̧ane ilo mour eo aō im kam̧ool n̄an er bwe ikar kōm̧m̧ane juon kālet eo ejim̧we ilo aō peptaij.
Ro m̧ōtta rekar jab itok, ak ke ikar leļo̧k aolepān būruō n̄an Anij, ikar en̄jake juon im̧we. Ilo iien eo, ikar en̄jake juon iakwe eļap jān Jemedwōj Ilan̄. Ikar jeļā bwe E ekar pād ijeņ im ekar lukkuun ron̄jake jar eo aō.
Ikar lukkuun kōņaan peptaij kōnke kōn ilubwiljin aolep men ko rem̧m̧an me rej waļo̧k ilo mour eo aō, ak ilo iien eo, ikar lukkuun meļeļe unleplep in aō peptaij.
Im̧we eo ikar en̄jake ekar āinwōt juon ainikien Irooj ej kōnono ilo jouj im tōl eō, im ba, “Kwojjab aikuj lukkuun kam̧ool jabdewōt men n̄an jabdewōt armej. Kwoj aikuj kam̧ool e n̄an n̄a bwe kwoj kōņaan itok n̄an ippa im pād wōt ilo m̧ool ilo gospel in ilo aolepān mour eo am̧.”