Mōnjar ko——Jikin ko n̄an Kautiej im Kabun̄jar
Jān Bisop Dean M. Davies
Rikakpilōklōk eo Kein Kajuon ilo Bisporik eo Eutiej
Jetōb an Irooj ej pād ilo m̧ōnjar ko ad im enaaj im̧we kōj ilo ad tōl kōj make ilo kautiej im̧aan Mejān.
Juon m̧ōtta eo ewūjlepļo̧k ekar kwaļo̧k n̄an n̄a juon en̄jake ke ekar kakūrm̧ool juon ijjitōn̄ n̄an karōki aolep jea ko im kakko̧nko̧ne stake center eo m̧okta jān iien kweilo̧k eo eļap an stake. Ālkin 30 minit in kar bōk aolep eddo kein, ekar kile bwe kar e armej eo āliktata ekar pād wōt ilo m̧ōnjar eo. Ijjeļo̧kin an en̄jake an make iaan ilo an ekairiir im rool, ijoke, ekar kile bwe ejja en̄jake in aenōm̧m̧an eo wōt me ekar en̄jake ilo iien kweilo̧k eo eļap ekar pād wōt ippān im ekar ļapļo̧k wōt.
Ke ekar dedeļo̧k an kōm̧m̧an jerbal in ijjitōn̄ eo an im diwōjļo̧k jān m̧ōnjar eo, ekar ioon bar juon membōr eo ekar kalimjōke e ilo elōn̄ unin. Ke ij kile ta eo m̧ōtta ekar kōm̧m̧ane, membōr in ekar jibwetok e kōn pein im ba, “Būratōr, Irooj ej lo men kein reddik kwoj kōm̧m̧ani n̄an e, im Ej reilaļ tak im m̧ōņōņō kaki.”
Iiō ko tokālik ke ikar jerbal āinwōt juon bisop, ejja in m̧ōtta wōt ekar lo bwe e make ekar bar make iaan ilo m̧ōnjar eo an ward eo an. Ālkin an kune tōma ko ilo m̧ōnjar eo, ekar pād jidik ke allōn̄ ej romaak ilo wintō eo ilo jikin jar eo im̧aan ak lokatok eo.
Ejja en̄jake in aenōm̧m̧an eo me ejeļā kake ekar itok ioon, im ke ekar jijet laļļo̧k turin im̧aan in wōt m̧ōnjar eo im kejōkļo̧kjeņ kōn iien ko rekwojarjar me ekar en̄jake ilo iien eo—elōn̄ allen an kar lale im kalimjōke an pris ro ruje bilawe ilo tebōļ in kwojkwoj eo, iien ko raorōk ke ekar en̄jake Jetōb Kwojarjar ej pād ippān ke ekar kwaļo̧k ilo juon kweilo̧k eļap an ward eo an, iien peptaij ko me kar tōli, jon̄an oran kuwaer ko me ekar ron̄jaki, im elōn̄ im lōn̄ naan in kam̧ool ko jān ro uwaan ward eo me rekar un̄n̄ūr e eļap ilo tum̧ūļaļ in. Kar jijet make iaan ilo m̧ōnjar eo emarok, ekar en̄jake obrak kōn en̄jake kein ilo mour eo an im ilo mour ko an membōr ro ilo ward eo, im ekar badikdik kōn kam̧m̧olool.
Eo m̧ōtta ekar lukkuun jim̧we im māletlet ilo an katakin bwe jikin ko rekwojarjartata ioon laļ in rej tampeļ im m̧ōko m̧ōd, kōn en̄jake kein ruo rej iookļo̧k katak in me repād itulōn̄, ekar bar jino an meļeļe bwe piktok ekwojarjar in m̧ōnjar ko ad. Kōnke em̧ōj aji kōn mālim eo an priesthood, mō kein em̧ōj aer erom̧ jikin ko me Irooj ej lutōkleplep ioon revelesōn ko n̄an armej ro an im eo me “kajoor in āinwōt anij ej waļo̧k.” kōn kain̄i ko me rej bōk jikier (lale Katak im Bujen Ko 84:20).
Mōnjar ko koba ippān m̧ōko im̧ōd rej kakūrm̧ool kallim̧ur eo kōn lan̄lōn̄ eo me Armej ro Rekwojarjar remaron̄ en̄jake ilo Raan in Jabōt. Ej erom̧ juon jikin eo ijo kobain kabun̄jar ko an membōr ro rej kōm̧m̧an bwe būruōer ren “būrueer ren kuk ippān doon ilo bōrokuk im ilo iakwe n̄an doon.” (Mosaia 18:21) im n̄an Rilo̧mo̧o̧r. N̄an kōj n̄an kwaļo̧k kam̧m̧oolol im kautiej kōn lutōkleplep in kōjeraam̧m̧an ko an jetōb me rej itok n̄an kōj ilo mōnjar ko ad, jej aikuj deļo̧n̄i jikin kein n̄an kabun̄jar kōn juon m̧wil eo em̧ūlaļ im eļap kautiej ko ie.
Meļeļein Kautiej
Ilo imminene ko ad ilo m̧ōnjar ko, naan in kautiej em̧ōj an erom̧ meļeļein bar juon naan ikōn̄. Ilo an menin aikuj bwe en mera ainikien ko ad ilo m̧ōnjar eo, jeļā in kōn kautiej ej likjab n̄an lo lukkuun meļeļein naan in. Kautiej emaron̄ lukkuun bok likļo̧k n̄an naan in Latin revereri, meļeļein n̄an “jutak ilo mijak ak bwilōn̄.”1 Jemaron̄ ke lo juon naan me eļapļo̧k an em̧m̧an an kōmeļeļeik en̄jake ko an jetōb ko ad n̄e jej lukkuun kejōkļo̧kjeņ kōn ta eo Rilo̧mo̧o̧r ekar kōm̧m̧ane n̄an er kajjojo?
Em̧ōj kakeememej eō kōn naan ko an al eo eaiboojoj jej al kaki ilo m̧ōnjar ko ad: “Ij lokjen aō kin eļap an Kraist yokwe n̄a.”2 En̄jake in ekabwūlōn̄lōn̄ kōn kam̧m̧olool, nōbar, im ļo̧kjeņaō emenin aorōk n̄an kautiej, im ej kōjebwebweik kōj n̄an kōjekdo̧o̧n jabdewōt kain kajin ak m̧wil eo me emaron̄ kadikļo̧k en̄jake kein ilo kōj ak ro jet.
Pija in juon kōrā ilo lokatok eo jān Tiffany Myloan Tong
Mōnjar ko im Raan in Jabōt
Jān revelesōn eo ekāāl, jejeļā bwe m̧ōttan eo ioļapļap tata ilo ad kabun̄jar ilo Jabōt ej n̄an “ilo̧k n̄an m̧ōnjar eo im ajiļo̧k aolep kwojkwoj ko am ilo raan eo ekwōjarjar [an Irooj]” (Katak im Bujen Ko 59:9). “m̧oko m̧ōn kabun̄ jar” eo me jej koba ippān doon ie ilo Jabōt rej m̧ōnjar ko rekwojarjar.
Būreejtōn Russell M. Nelson ekar jipan̄ kōj n̄an meļeļe eļapļo̧k kōn ekkeijel eo ad epaak tata ikōtaan kautiej n̄an Rilo̧mo̧o̧r im en̄jake ko ad n̄an Raan in Jabōt. Ilo an kar kwaļo̧k en̄jake eo an kōn kautiej Jabōt, Būreejtōn Nelson ekar kakobaba, “Ikar ekkatak jān eoon ko me rej tōl im m̧wil ko aō ilo Jabōt ej kwaļo̧k juon kōkaļļe ikōtaaō im Jema.”3
Āinwōt an kadkadid im m̧wilid ilo Jabōt rej juon kōkaļļe in wūjlepļo̧k ko ad n̄an Irooj, kadkadid, m̧wilid, im barāinwōt nuknuk ko ad jej kanōki ilo an m̧ōnjar eo An emaron̄ kwaļo̧k jon̄an kautiej eo jej en̄jake n̄an Rilo̧mo̧o̧r.
Mōnjar ko im Kain̄i ko
Elder Jeffrey R. Holland jān Doulul eo an Jon̄oulruo Rijilōk ro ekar kōļapļo̧k meļeļe eo ad kōn katak in, ej kwaļo̧k:
“Ilo kakkobaba n̄an kōļapļo̧k iien n̄an pedped in m̧weo ekkatak gospel eo, ad kabun̄jar ilo Jabōt … kōkm̧anm̧anļo̧k kwojkwoj eo ekwojarjar an Irooj āinwōt an kwojarjar, mije ilo kabun̄jar kajjojo wiik. Jej aikuj keememej ippād make bwe Kraist eaar mej kōn bōro erub n̄an ineek make jerawiwi ko im būrom̧ōj ko an aolep armej.
“Toon wōt ad leļo̧k ad n̄an en̄taan in, ej juon iien n̄an ad kautieje.”4
Eaorōk n̄an keememej bwe jikin eo em̧ōj jitōn̄e n̄an iien kein reļļap n̄an kwaļo̧k kautiej n̄an Rilo̧mo̧o̧r ej ilo m̧ōnjar eo. Ilo kakkobaba kōn kautiej me jej en̄jake ilo iien kain̄i ko kajjojo wiik ilo iien kwojkwoj ko, en̄jake in kautiej im jeļā ņae rej ļapļo̧k n̄e jej ļōmņak kōn kain̄i ko jet an priesthood im kōjeraam̧m̧an ko kōm̧m̧ani ilowaan m̧ōnjar eo, leļo̧k āt im kōjeraam̧m̧an ajri ro, peptaij im kapen ko, kain̄i ko an priesthood, im set apart ko n̄an kūr ko. Kajjojo iaan kain̄i im kōjeraam̧m̧an kein remaron̄ boktok lutōkleplep an Jetōb Kwojarjar eļan̄n̄e ro rej bōk koņaer im ro rej pād rej itok kōn juon m̧wil in kautiej.
Pija jān James Iliff Jeffery
Mōnjar ko im Kabun̄ Jar
Raan in Jabōt ej letok n̄an kōj iien ko rem̧m̧an n̄an kabun̄jar n̄an Irooj ilo iien ekkatak ko aer ilo m̧ōko im āinwōt juon jarlepju ilo iien kwojkwoj im kweilo̧k ko jet. Jān raan ko jinointata ilo Kabun̄ in, Armej ro Rekwojarjar rekar m̧ōņōņō ilo aer koba ippān doon im kalimomo im ejaake jem̧jerā in jeimjen jeimjati. Mōnjar ko ad rekar ļōmi kōn jikin ko eļap meļaer n̄an kabwe bwe m̧akūtkūt ren kōm̧m̧an ie ilowaan wiik eo. Jejamin luuji an erreim̧aanļo̧k kōn kōttōbar ko an būraimere kōn m̧ōnjar kein, ijoke, ej n̄an letok juon jikin kabun̄jar.
Kabun̄jar im kautiej rej ekkeijel ippān doon. “N̄e jej kabun̄jar n̄an Anij, jej kepaake E kōn iakwe ilo kautiej, ettā, im inōknōk. Jej kile im bōk E āinwōt juon ad Kiin̄ eutiejbōtata, Rikōm̧anm̧an an laļ otemjej, Jemed eo jej iakwe im iakwe eo an ej n̄an inedeeo.”5
Unleplep in kōttōbar in kabun̄jar rej aikuj im̧we kadkadid ilo m̧ōnjar ko men̄e jej bōk koņaad ilo m̧akūtkūt ko jet ak iiaio. Kea ej aikuj bōk jikin n̄an kadikļo̧k pok, ettoon, ak jorrāān ko n̄an jabdewōt men ko ilo m̧ōnjar ko itok jān m̧akūtkūt ko an Kabun̄ in, im jerbal ej aikuj bōk jikin n̄an karreoik im kōm̧m̧ani ilo iien ko n̄e kain rōt kein rej waļo̧k.
Ajri im jodikdik ro remaron̄ katakin bwe kautiej im kea kōn m̧ōnjar ko rej ilōn̄ļo̧k kweilo̧k ko an Jabōt. An membōr ro bōk koņaer ilo karreoik m̧ōnjar ko—eļaptata ippān doon an jinen im jemān ajri ro im ajri ro ilo aer bōk koņaer—ej juon wāween eo em̧m̧antata n̄an kōļapļo̧k en̄jake in kautiej n̄an m̧ōnjar ko rekwojarjar. Em̧ōj kam̧oole kōn en̄jake eo an m̧ōttan n̄an karreoik stake center eo an ālikin kweilo̧k eo eļap an stake, lukkuun m̧akūtkūt in kea kōn im̧ōn jar ej wāween kabun̄ im karuwaineneik Jetōb an Irooj.
Pijaan membōr ro rej jutak inabōj jān Massimo Criscione
Mōnjar ko im Rilo̧mo̧o̧r
Ium̧win tōl in kanaan eo an Rikanaan Nelson, ej kwaļo̧k aorōkin kijejeto ko me kar kōm̧m̧an n̄an kalikkar bwe etan Jisōs Kraist ejjab likjab n̄e jej ba etan Kabun̄ eo an. Ilo ejja wāween in wōt, jejjab aikuj kōtlo̧k bwe Rilo̧mo̧o̧r en joļo̧k jān unleplep in ad kabun̄jar—ekoba jikin ko jej kabun̄jar ie.
Jeminene in ba tampeļ āinwōt m̧weo im̧ōn Irooj, eo me ej lebōļ eo ejejjet im eaorōk. Emaron̄ pidodo ad meļo̧kļo̧k, ijoke, kajjojo m̧ōnjar ko ad kar aje kōn mālim eo an priesthood āinwōt juon jikin ijo Jetōb an Irooj emaron̄ pād ie im ijo ajri ro nejin Anij—jim̧or ro rej membōr im jab membōr—remaron̄ itok “n̄an jeļāļo̧kjeņ eo kōn aer Ripinmuur.” (Mosaia 18:30).
Kar kōjeļļā eo raan ko ļo̧k kōn jibadbad in n̄an kea kōn m̧ōnjar ko kōn pija ko me rej ilo kautiej kwaļo̧k kōn Rilo̧mo̧o̧r im m̧akūtkūt ko rekwojarjar an mour eo An im ālkin mour in kar ļōme n̄an mijōk, kejōkļo̧kjeņ, im leļo̧k būruōd n̄an E. Ilo am̧ deļo̧n̄e m̧ōnjar kein n̄an kweilo̧k ak m̧akūtkūt, jej m̧ōņōņō in karuwaineneik eok n̄an bōjrak jidik, etale, im kejōkļo̧kjeņ kōn uno jin̄n̄a kein, n̄an lali ippān ajri ro nejim, im kōtļo̧k bwe ren kōļapļo̧k en̄jake ko aer kōn kabun̄jar im kautiej n̄an Anij.
Kallim̧ur Mokta rikanaan Habakkuk ekar kwaļo̧k, “Jeova ej ilo tempel eo An e kwōjarjar; aolepen laḷ en ikōn̄ iṃaan.” (Habakkuk 2:20). Jen keememej bwe Jetōb an Irooj ej pād ilo m̧ōnjar ko im enaaj un̄n̄ūr būruōd kajjojo n̄an jon̄an eo jej tōl kōj make ilo kautiej im̧aan Mejān.