Ekōjkan Aō Bōk Kōmour jān Ko̧kkure an M̧ōm̧ in Kanniōk
Ikar mour kōn juon mour eo ekaamijak. Ak tokālik ikar ekkatak bwe ilo iien ko remaroktata, imaron̄ pedped wōt ioon Rilo̧mo̧o̧r eo aō.
Pija ko jān Getty Images, kar kōjerbale n̄an kwaļo̧k pija, pija jān model
Mour eo aō ekaamijak ekar ijjino ke ekar jiljilimjuon aō iiō im jino ekar bar m̧are. Elukkuun em̧m̧an ippām riab in jema me ekāāl. Ekar jouj im lukkuun jejjet n̄an baam̧le eo am. Ikar lukkuun en̄jake ejjeļo̧k uwōta n̄e ij pād tūrin. Aolep men rekar em̧m̧an m̧ae juon raan, ke aolep rekar lukkuun boub, ekar ko̧kkure eō ilo m̧ōm̧ in kanniōk.
Ikar jab meļeļe ta eo ekar kōm̧m̧ane n̄an n̄a. Ikar mijak, pok, im lukkuun jook. Ak ikar lukkuun mijak in ba n̄an jabdewōt. Ikar ļōmņak bwe inaaj ko̧kkure jem̧jerā eo im m̧ōņōņō eo an baam̧le eo am ekāāl im bwe ejjeļo̧k juon enaaj tōmak eō. Kōn menin ikar kālet bwe in ikōn̄ wōt.
Ekar kōmetak eō ilo iien eo wōt, ak emeemļo̧kjeņ eo aō kōn ko̧kkure ekar lukkuun kaddoik wōt kōļmenļo̧kjeņ eo aō. Āliktata ikar jino mijak n̄e juon armej enaaj lo inepata ilo turin meja im jeļā men ko rettino me ikar kajjieon̄ nooje m̧ool eo ilo aō riab m̧ōttā ippān riabin jema. Ekar lukkuun ļap an jouj n̄an n̄a, im ikar bar jino kōņaan e.
Ak ekar bar jino nana ļo̧k wōt aolep men. Ke Jinō ekar jino jerbal in bon̄, riabin jema ekar bar jino ko̧kkure eō. Ikar en̄jake an ejjeļo̧k rijipan̄ eō. Ikar kōņaan bwe in kwaļo̧k m̧ool, ak riab in jema ekar lukkuun em̧m̧an, im ikar ļōmņak aolep renaaj jait ippān. Kōn menin juon bon̄ ikar make iaaō, ikar akweļap n̄an Anij bwe en jipan̄ eō bwe in jab kwaļo̧k m̧ool.
Kwaļo̧k Būruōm̧
Juon raan ko̧kkure eo ekar lukkuun bōjrak. Ejjeļo̧k aō jeļā ejaam̧ bōjrak. Men̄e ekar jab bar kōmetak eō, ikar en̄jake aō ettonoon im jook. Ikar dike eō make. Jet iien ikar ļōmņak n̄an kālet mej bwe epidodo ļo̧k jān ta ko inaaj jelm̧aeiki. Ikar kōņaan wōt kwaļo̧k buruō, ak ikar mijak kōn ta eo me m̧ool emaron̄ kōm̧m̧ane.
Innem juon Jabōt ilo m̧ōnjar eo ke ekar 14 aō iiō, ikar ron̄jake juon katak kōn kōm̧m̧an kālet ko reļļap. Rūkaki eo aō ekar kapilōk kōm bwe kōm en jitļo̧k im jar im kar kallim̧ur bwe Anij enaaj kōkajoor kōj n̄an kōm̧m̧ani men ko rejim̧we. Ālkin jar, iļļakar ļōmņak kōn ta eo ekar ba. Ikar ļōmņak bwe n̄e ikar kajjitōk, Anij enaaj ke lukkuun jipan̄ eō kwaļo̧k būruō?
Raan eo tok juon ikar jitļo̧k n̄an peran bwe in kwaļo̧k n̄an jino kōn ko̧kkure eo. Ikar jab maron̄ leļo̧k aō ilo jikin jikuuļ kōnke ikar ļōmņak kōn ta eo enaaj kōm̧m̧ane. Ke ij tōparļo̧k m̧weo, ikar lukkuun nan̄inmej. Ikar bar jar kōn kajoor, ak ikar jab en̄jake aō pojak n̄an ba n̄an e.
Joteen in eo, ikar kakarōkrōkļo̧k aō ippān jinō ke ej kōmat m̧ōn̄ā in jota. Ikar jab jeļā ta eo in ba, ak ke ij kalimjōk mejān, ikar lo peran n̄an aō jino kwaļo̧k būruō. Ke ij jinoe, aolep men ko eto aō kar ņooji ium̧win elōn̄ iiō ko rekar waļo̧k.
Jino im n̄a kom̧ro kar jijet ilo kawūj ko im jar ippān doon. Ālkin wōt, kōm kar kepaake branch būreejtōn eo im ko̧o̧ļe būliijmāān. Riabin jema ekar bōk eddo kōn bōd ko an kōn ta eo ekar kōm̧m̧ane n̄a eō, im kar letok kōjparok eo ikar aikuji—ijamin bar lo mejān kiiō.
Iaļ eo n̄an Bōk Kōmour
Ilo iien eo, ekar pen aō kwaļo̧k en̄jake eo aō n̄an ro ewōr aer mālim im an ro m̧ōtta kajjitōk ewi riabin jema, ak kōn jipan̄ eo an baam̧le eo aō, ikar jab make iaaō. Ippān doon, jekar walōn̄tak kōn juon unin tōl kāāl an baam̧le eo: “Imaron̄ kōm̧m̧an men otemjej ilo Kraist eo ej kakajoor eō” (Pilippai 4:13). Baam̧le eo am rekar kwaļo̧k aer iakwe im jutak ilikū, ejjab to, kōm kar jim̧or bōk kōmour.
Jinō im n̄a kom̧ro kar loļo̧k jikin bōk kapilōk ko retijem̧ļo̧k, eo me eļap an jipan̄! Rikapilōk eo aō ekar men eo me eļap aō kar aikuji. Ekar jipan̄ eō meļeļe kōn en̄jake ko aolep me ikar en̄jaki im ekar jipan̄ eō meļo̧kļo̧k emeemļo̧kjeņ ko renana. Ikar jab kile ewi jon̄an aō kar metak m̧ae ikar jinoe en̄jake aō bōk kōmour.
Ikar jab ļōmņak e metak eo enaaj kar jako kōn wōt aō kwaļo̧k būruō, ak ikar jab barāinwōt kile jon̄an iien (im kijenmej) eo enaaj bōk n̄an kōmour. Ium̧win juon iien eaitok, ikar en̄jake an jej tokja. Ikar aikuj bar ekkatak n̄an bar iakwe eō make.
Ikar lo aenōm̧m̧an eo eļap ke ikar oktakļo̧k n̄an Rilo̧mo̧o̧r im Jema Ilan̄. Kile bwe Er relukkuun jeļā jon̄an en̄jake eo aō im ekar letok kajoor im kōjatdikdik. Ikar kōjatdikdik Ioer ilo iien ko remarok. Ium̧win elōn̄ iien ko emeemļo̧kjeņ ko rekar jino jakoļo̧k, im ikar lukkuun en̄jake aenōm̧m̧an kōn iakwe eo an Rilo̧mo̧o̧r.
Juon iaan em̧m̧an ko ilo iaļ in kōmour kar kile bwe ekar wōr juon aō ilju im jekļaj emeram. Ke kar ko̧kkure eō, ikar jab pijaikļo̧k an em̧m̧an jokkun mour eo aō. Ikar en̄jake rub bōro aolep iien. Ak kōn jipan̄ im kōmour, ikar lo men ko n̄an erreim̧aanļo̧k wōt n̄ani. Ikar jino bwebwenato ippān leddik ro jet ro rekar metak kōn kain rōt in, im ikar barāinwōt kālet n̄an etal im mijen. Kwaļo̧k naan in kam̧ool eo aō ippān ro jet ekar kōkajoor eō.
Kadkadū ejjab itok jān ta eo riab in jema ekar kōm̧m̧ane n̄an n̄a. Ijjab mour kōn ta eo riabin jema ekar kōm̧m̧ane n̄an n̄a. Jet raan rekar eppen, ak kōn aolep men, Irooj ekar kōkajoorļo̧k eō, im Ijeļā Enaaj wōnm̧aanļo̧k wōt im jipan̄ eō. Ikar oktak jān juon eo kar ko̧kkure n̄an juon eo em̧ōj an bōk kōmour.