”Ewōr ke Am̧ Bok Būļu me Elōn̄ Jeje Ioon Kōļar Gold?”
Jet iien ālkin aō kar joļo̧k bok eo, ikar kōņaan jeļā ta eo ilowaan.
Kōmeļeļe jān Greg Newbold
Iiō ko remootļo̧k, ikar bōk juon bok būļu me elōn̄ jeje ioon kōļar gold jān mijenede ro rej jerbal ilo ijo jikin ritariņae ro ijo ikar bōk kaminene kōn jerbal eo aō ilo United States Navy.
Ke ikar jinoe riiti bok eo, juon armej ekar ba n̄an n̄a ke eriab kōnke ekar kape jān Baibōļ. Menin ekar kōm̧m̧an menin aō pere aorōk in bok eo, ak ikar dāpiji wōt. Ikar riiti jidik, likūt ilo laļ tata ilo pāākpāāk eo, innem meļo̧kļo̧ke.
Juon jim̧a iiō tokālik, ikar kālet n̄an karreoik pāākpāāk eo aō. Ikar lo bok eo ak em̧ōj an jako itok limo eo aō kake, kōn menin ikar jotoļo̧k. Ak jet iien tokālik, ikar bar kōņaan jeļā kōn ta eo ilowaan bok būļu eo me ewōr jeje ioon kōļar gold. Ij kiiō tōmak bwe en̄jake in ekar itok jān Jetōb, “eo ej tōlļo̧k n̄an kōm̧m̧an em̧m̧an” (Katak im Bujen Ko 11:12).
Ilo 2005, juon m̧ōtta ij kab jeļā kajjien ekar karuwaineneik tok eō n̄an ron̄jake mijenede ro. Kar jinoin, ekar wōr aō kajjitōk im pere ta eo rekar katakin, ak mijenede ro rekar peran im rekar letok uwaak ko me rekar lukkuun meļeļe im mālij ippa.
Ke ikar kile bwe mijenede rein rekar āinwōt ro me ikar ioon er iiō ko m̧oktaļo̧k, ikar ikdeleel in kajjitōkin er, ”Ewōr ke Ami Bok Būļu me Elōn̄ Jeje Ioon Kōļar Gold?”
“Aaet, ewōr ippamim!” juon iaaer ekar uwaak. “Kar ņa etan Bok in Mormon!”
Ikar lukkuun m̧ōņōņō in bar bōk juon aō Bok in Mormon. Ilo m̧ool, ikar lukkuun itok limoū kake ikar riiiti elōn̄ļo̧k jān juon kōttan ilowaan wōt ruo wiik! Ke ikar riiti im jar kake, ikar jeļā bwe ej naan an Anij.
Elder Rubén V. Alliaud jān Jiljilimjuon̄oul eo ekar ba juon men ilo kweilo̧k eo eļap me ej iookļo̧k en̄jake eo aō kōn Bok in Mormon: “jabdewōt ro rej riit ro rej kallim̧ur in lukkuun m̧ool in ekkatak kake [Bok in Mormon], kōn jetōb in jar, naaj jab ekkatak wōt kōn Kraist ak naaj ekkatak jān Kraist —eļaptata eļan̄n̄e rej kōm̧m̧an kālet ‘kajjion̄ jelōt ewānōk an naan in Anij’ [Alma 32:5] im jab kōwaane ilo jajeļo̧kjeņ kōn wōt jab tōmak jān ta eo ro jet rekar ba kōn men ko rekar jan̄in riiti.”1
Ilo ad riiti Bok in Mormon, jar, im lōke Jetōb, em̧ōj aō lo men ko reļļap rej kūrm̧ool ilo mour eo aō.