Usa ka Surprisa sa Pasko
Ang tagsulat nagpuyo sa Colorado, USA.
“Have a happy fam’ly Christmas! … Wrap your hearts in love this year” (Children‘s Songbook, 51).
Nasagmuyo dihadiha dayon si Anna sa dihang misulod siya sa kwarto ug nakita ang Christmas tree. Ang pampainit sa tubig sa ilang balay mibuto, ug nagbanaw ang tubig sa salog. Naningkamot pa gihapon si Papa sa paglimpyo sa katag. Ang pipila ka mga regalo ilawom sa Christmas tree hingpit nga nangabasa.
Si Anna ug ang iyang manghud nga mga lalaki mikuha og mga tualya ug misulay sa pagpauga sa mga regalo. Apan wala gayud kini magsilbi. Ang mga regalo nadaot gayud sa tubig.
Ang pamilya ni Anna nagsinati og lisud nga panahon. Iyang papa walay trabaho karon. Iyang mama hapit na manganak, ug pirme maglain iyang lawas. Ug karon wala na silay mga regalo alang sa Pasko.
Nianang gabhiona samtang si Anna nangandam na sa pagkatulog, nakadungog siya ni Mama ug Papa nga nag-istoryahanay sa kusina.
“Unsa man ang atong buhaton?” Nangutana si Mama. Murag naghilak siya. “Kita walay igong kwarta alang sa bayranan sa balay, ug karon kita gani walay mga regalo alang sa mga bata.” Si Anna mibati og kahadlok ug kabalaka.
“Makakita ra kita og paagi,” miingon si Papa.
Misulod si Anna sa kusina. Gituy-od ni Mama iyang mga kamot ug hugot nga migakos kaniya. Uban sa iyang mga bukton nga naglibut sa tiyan ni Mama, nabati ni Anna nga milihok ang batang masuso. Mipahiyum siya. “Kita adunay usa ka bag-ong bata nga masuso nga moabut. Kanunay kang nag-ingon nga ang usa ka bata nga masuso usa ka milagro.”
Mipahiyom og balik si Mama. “Husto kana. Kita adunay daghan nga angay pasalamatan.”
“Anaa nato ang usag usa,” miingon si Papa. Gihagkan niya ang ibabaw sa ulo ni Anna. “Ma-OK ra unya ni.”
Samtang nagpadulong sa iyang kwarto, nakadungog si Anna nga naghilak ang iyang mga igsoong lalaki. Milingkod siya sa higdaanan ni David.
“Subo kaayo ang tanan,” hilum nga miingon si David.
“Ug kita dili na makakuha og mga regalo,” miingon si Robbie, nga nagbakho.
“Ma-OK ra unya ni,” Miingon si Anna pag-usab. “Tan-awa unya.”
Sa wala pa siya mihigda, miluhod si Anna ug nangutana sa Langitnong Amahan kon unsay iyang mabuhat alang sa iyang pamilya. Siya walay kwarta aron ipalit og mga regalo, apan siya gihapon anaay mainiton, makahupay nga pagbati sa iyang kasingkasing.
Pagkasunod buntag, nagpabilin siya sa higdaanan nga naghunahuna sulod sa pipila ka minuto sa wala pa nangandam alang sa pag-eskwela. Dayon usa ka ideya ang misantup kaniya! Nianang hapona nagdali siya og pauli ug mibuhat sa iyang mga buluhaton ug homework. Dayon nagkuha siya og pipila ka papel ug lambo ug pipila ka mga marker ug sticker nga iyang nakuha alang sa iyang adlawng natawhan. Gidala niya kini tanan sa iyang kwarto ug gisirad-an ang pultahan.
Hapit makakatawa si Anna sa dihang naghunahuna siya kon unsa kaha ka kasurprisa ang iyang pamilya. Una gipilo niya ang papel ug gihigot kini gamit ang lambo aron makahimo og upat ka mga booklet. Gipili niya ang usa ka bitoon nga sticker aron ibutang sa booklet ni Mama ug usa ka planeta alang kang Papa. Gibutang niya ang usa ka iro alang sa booklet ni David ug usa ka rocket alang kang Robbie.
Dayon nagsugod og drowing si Anna. Alang kang Mama midrowing siya og hulagway sa iyang kaugalingon nga nanilhig sa salog. Midrowing siya og hulagway sa iyang kaugalingon nga nagluto og panihapon uban ni Papa, usa ka hulagway niya nga nagdula og football uban ni David, ug usa ka hulagway niya nga nagbasa og libro kang Robbie. Kini nagkinahanglan kaniya og pipila ka adlaw sa pagpuno sa matag booklet og mga hulagway.
Sa katapusan, Bisperas na sa Pasko, ug mainampingong gibutang ni Anna ang iyang mga booklet ilawom sa Christmas tree.
Pagkasunod buntag, gihatagan niya ang matag tawo sa iyang pamilya og usa ka booklet. “Ganahan ko niini nga mga hulagway,” miingon si David. “Ganahan ko nga magdula og football.”
“Dili lamang kini mga hulagway,” miingon si Anna nga adunay kahinam sa iyang mga mata. “Kini mga coupon! Ang tanang mga hulagway nagpakita og mga butang nga akong buhaton alang kaninyo.”
“Kini mao ang labing nindot nga regalo nga ikaw makahatag kanamo,” miingon si Mama samtang siya mitan-aw sa iyang mga booklet. Mapasalamaton si Anna nga ang Langitnong Amahan mitabang kaniya sa paghunahuna og himo og mga coupon sa Pasko. Usa ka bag-ong bata nga masuso ang umaabot, ug uban sa tabang sa Langitnong Amahan, ang tanan gayud ma-OK ra.