Eksena sa Pagkatawo ni Jesukristo nga gihimo sa usa ka Silingan
Ang tagsulat nagpuyo sa Texas, USA.
“Kay ngari kanato usa ka bata matawo” (2 Nephi 19:6).
Nakaiktin si Rose sa iyang pagbangon samtang mitambo sa bintana. Ang ilang mga higala moabut na sa bisan unsang taknaa!
Sa matag tuig sa panahon sa Pasko, si Rose ug ang iyang pamilya modula sa eksena sa Pagkatawo ni Jesukristo. Kanunay silang magdapit og mga tawo sa pagtambong ug moapil kanila. Niining higayona ilang gidapit ang ilang mga silingan ug mga misyonaryo! Si Rose nalipay tungod kay ang ilang mga silingan adunay usa ka batang masuso nga himoon nga ang batang masuso nga si Jesus.
Hapit na maandam ang tanan. Gikuha na ni mama ang mga pagkaon gikan sa oven. Ang mga manghud nga lalaki ni Rose nanghipos na sa tanan nilang dulaan. Gikuha ni Ellen ang mga igsusul-ob. Ug si Rose pa gani ang mipapilit sa dako, dalag (yellow) nga bitoon ngadto sa bongbong aron idayan-dayan.
“Rose,” mitawag si mama gikan sa kusina. “Makatabang ka ni Ellen nga maandam ang mga igsusol-ob?”
“OK, Ma!” Miadto si Rose aron motabang sa iyang igsoon, kinsa nagdala og gisapwang nga mga habol.
“Aduna na tay mga habol, mga tualya, ug mga sinina gikan sa aparador,” miingon si Ellen. “Makagamit pa gani kita niining bukag nga kunohay usa ka pasungan.” Iyang gitunol ni Rose ang dakong bukag. Gibutangan ni Rose og humok nga habol sa sulod niini alang sa batang masuso.
“Perpekto,” miingon si Rose.
Ang manghud ni Rose nga si Jack mikuha sa abuhon (gray) nga habol ibabaw sa iyang ulo ug nagkiningkoy. “Pwede be ako ang himoong asno?”
Mikatawa si Rose. “Dili pwede! Gusto ka mahimong usa ka Mago, hinumdumi?”
“O oo!” miingon si Jack. Iyang gikuha ang korona nga dulaan ug gibutang kini sa iyang ulo.
Dayon dihay nanuktok sa pultahan.
“Ania na sila!” Miingon si Rose. “Akong ablihan.”
Sa wala madugay ang balay napuno sa malipayon nga mga tawo. Mitabang si Rose sa tanan nga makailis sa ilang mga igsusol-ob. Ang sister nga mga misyonaryo mao ang mga magbalantay sa karnero. Iyang mga igsoong lalaki ug igsoong babaye mao ang mga Mago. Ang matahum nga batang masuso mao ang batang Jesus, ug ang iyang mga ginikanan mao si Maria ug Jose.
Gisul-ob ni Rose ang humok, puti nga kalo. Siya mao ang karnero.
Sa katapusan ang tanan nakailis na ang tanan ug andam nang magsugod. Si Elder ug Sister Yancey, usa ka magtiayon nga misyonaryo gikan sa ilang ward, miabli sa Bag-ong Tugon ngadto sa istorya sa Pagkatawo ni Jesus. Gibasa nila og kusog ang mga bersikulo. Ang tanan milihok sa ilang bahin.
Sa katapusan sa istorya, ang tanan nanganta og “Mahilum nga Gabii.” Mibati si Rose og kainit ug kalipay. Nasayud siya nga gibati niya ang Espiritu Santo. Daw si Jesus duol kaayo sa iyang kasingkasing.
Human sa kanta, nagpasalida si mama sa video nga “Samuel and the Star [Si Samuel ug ang Bitoon].” Nag-ampo si Ellen. Dayon gipagawas nila ang mga pagkaon. Ang tanan nalingaw sa panag-istoryahanay.
“Unya, unsa ang inyong paborito nga bahin?” Nangutana si Sister Yancey.
“Ganahan ko sa pagkanta,” miingon si Ellen. “Ug makigdula sa batang Jesus.” Giyugyog ni Ellen ang batang masuso diha sa iyang paa. Nakigdula siya kaniya hangtud nahuman ang musika.
“Ganahan ko sa pagdala sa mga gasa ni Jesus,” miingon si Jack. Nagsul-ob pa gihapon siya sa pagpakaaron-ingnon nga korona.
“Ikaw, Rose?”
Gituyhad ni Rose og maayo ang iyang mga bukon. “Ganahan ko sa tanan!” miingon siya sa usa ka makusog nga tingog. “Apan labaw sa tanan, ganahan ko nga ang tanan nia dinhi nga nagsaulog ni Jesus. Tungod kay mao kana ang pasabut sa Pasko.”