Mga Pangutana & Mga Tubag
Pipila sa akong mga higala dili maayo nga mga impluwensya. Mahimo ba nga maghigala gihapon kami?
Litrato gikan sa Getty Images, giposingan sa mga modelo
Pagpaambit og Maayo nga mga Butang
Kon sila ang akong mga higala, akong katungdanan ang pagtabang kanila nga mahimong mas maayo, sa pagpaambit sa ebanghelyo ug sa tanang mga panalangin nga akong nadawat pinaagi sa pagsunod niini. Kon sila dili mopakita og interes niadtong maayo nga mga butang, mahimong hinay-hinay nga magsugod og kawala ang akong pakighigalaay kanila. Bisan tuod og lisud kini, usahay mao kana ang labing maayong butang nga buhaton.
Matheus T., 16 anyos, Minas Gerais, Brazil
Mosulti nga Walay Kahadlok
Ang akong mga higala nasayud nga ako nahisakop sa Simbahan. Nag-istoryahanay kami kon unsay husto nga buhaton ug unsay dili. Karon kon kauban nako ang akong higala, magpakabuotan siya sa usa ka dalaygon nga paagi, ug kana nakapalipay kanako. Nagtudlo kini kanako nga kinahanglan ko mosulti nga walay kahadlok.
Diego R., 16 anyos, Siyudad sa Mexico, Mexico
Magmahimong mas Maayo nga Impluwensya
Ako adunay mga higala kinsa dili maayo nga mga impluwensya, apan kana wala magpasabut nga dili ko makig-istorya kanila. Gitagad nako sila uban sa pagtahud ug pagkamabination. Wala ko naghukom o nagsaway kanila. Nasayud ko nga ang mga higala makaimpluwensya sa atong paagi sa paghunahuna ug paglihok ug gani makatino sa tawo nga kita mahimo. Kutob sa akong mahimo, magpaambit ko sa ebanghelyo kanila ug magdapit kanila sa mga kalihokan sa Simbahan.
Saireth V., 18 anyos, Morelos, Mexico
Unahon ang Dios
Ayaw kasagmuyo kon ang inyong mga higala dili modawat sa inyong maayong ehemplo. Adunay gamay kaayo nga kalainan tali sa pagkadalo ug sa pag-atiman sa kaugalingon. Dili ninyo kinahanglan ipaubos ang inyong mga sumbanan o ibaliwala ang inyong mga gituohan alang sa uban; nagpuyo kita aron sa pagpahimuot sa Langitnong Amahan, dili ni bisan kinsa. Pag-ampo ug pagsiksik sa mga kasulatan alang sa giya, paminaw sa mga pag-aghat sa Espiritu Santo, ug labing importante, ayaw tuguti nga ang kalibutanong mga butang makahisalaag kaninyo gikan sa higpit ug pig-ot nga dalan.
Riley E., 15 anyos, Manila, Philippines
Pagbarug sa mga Balaang Dapit
Akong nakat-uanan gikan sa akong mga lider sa Simbahan nga kinahanglan kitang mobarug sa mga balaang dapit, bisan paman kon kita mag-inusara. Padayon nga magpuyo sa mga sumbanan nga gitakda sa inyong kinabuhi ug sa inyong kasingkasing. Sulayi sila sa pag-imbitar ngadto sa usa ka leksyon o miting sa sakrament. Makadala kamo sa kahayag sa ebanghelyo bisan asa kamo moadto! Ug labaw sa tanan, ipakita ang gugma sa Manluluwas alang sa matag usa kanila
Allanis O., edad 18, Setúbal, Portugal