Dali, Sunod Kanako: Basahon ni Mormon
Unsaon nako nga makatinguha og espirituhanong mga gasa?
(Disyembre 14–20)
Ang espirituhanong mga gasa gihatag sa Dios pinaagi sa Espiritu Santo alang sa atong kaayohan (tan-awa sa Moroni 10:8). Matag usa kanato gipanalanginan og espirituhanong mga gasa gikan sa Dios, ug adunay daghan nga mga gasa nga atong madawat.
Pipila sa espirituhanong mga gasa giila diha sa mga kasulatan (tan-awa sa Moroni 10:9–16; Doktrina ug mga Pakigsaad 46: 13–25); daghan ang wala. Sa unsang paagi nga kamo makaila ug makapalambo sa espirituhanong mga gasa nga gihatag sa Dios kaninyo? Sa unsang paagi nga kamo makapalambo og ubang mga gasa? Aniay pipila ka ideya nga makatabang kaninyo:
Pangutana
Pag-ampo ug pangutana sa Dios kon unsa nga espirituhanong mga gasa ang Iyang gipanalangin kaninyo o unsa nga gasa ang kinahanglan ninyong paningkamutan sa pagpalambo. Motabang Siya kaninyo. Ang inyong patriyarkal nga panalangin tingali usab makapadayag sa inyong espirituhanong mga gasa. Kon wala pa kamo makadawat sa inyong patriyarkal nga panalangin, ikonsiderar ang pagpakig-istorya sa inyong bishop o branch president mahitungod sa pagdawat og usa.
Pagtuon
Ang espirituhanong mga gasa nagkinahanglan og paningkamot aron makadawat niini. Samtang naningkamot alang sa usa ka piho nga gasa, ikonsiderar ang pagkat-on og dugang mahitungod niini gikan sa mga kasulatan, sa inyong patriyarkal nga panalangin, o sa mga pakigpulong sa kinatibuk-ang komperensya. Makapangutana usab kamo sa uban mahitungod sa ilang mga kasinatian.
Paglihok
Ang pagkat-on mahitungod sa espirituhanong mga gasa makatabang, apan kinahanglan ninyo nga gamiton kana nga kahibalo. Kon magpakita kamo og hugot nga pagtuo diha ni Jesukristo, maghinulsol, ug motuman sa inyong mga pakigsaad, kamo mahimong angayan nga makadawat og espirituhanong mga gasa. Usab, pangita og mga sitwasyon diin magamit ninyo ang inyong espirituhanong mga gasa. Hinumdumi nga kini nga mga gasa dili lang makabenepisyo kaninyo, apan sila usab makabenepisyo sa uban (tan-awa sa Doktrina ug mga Pakigsaad 46:26). Sa unsang paagi nga magamit ninyo ang inyong espirituhanong mga gasa aron sa pagtabang sa uban?