Dawata ang Gasa
Ang pagtuon sa pulong sa Dios, pagserbisyo, paghinulsol, ug pag-adto sa templo makatabang kanato nga mobati sa gugma sa Dios niini nga Pasko.
Usa ka gabii sa Nobyembre miabut ko sa balay nga nakadiskubre nga ang akong mga anak miusab sa ilang kwarto ngadto sa usa ka kahibulongan nga lugar [wonderland] sa Pasko. Mga Christmas tree, nagkidlap-kidlap nga garland, mga higot sa mga suga, ug papel nga mga snowflake ang miadorno sa mga suok, mga frame sa higdaanan, mga bongbong, ug kisame. Usa ka hinimo nga halinganan nga kompleto sa mga troso, mga suga, ug mga medyas ang mikompleto sa talan-awon. Kana nga talagsaon nga talan-awon sa Pasko nakapainit sa among panimalay ug mga kasingkasing.
Lain sa akong paboritong mga talan-awon sa Pasko mao ang gihulagway ni propeta Nephi. Ang amahan ni Nephi, si Lehi, mipaambit og usa ka damgo diin nakakita siya og usa ka matahum nga kahoy kansang bunga mipuno sa iyang kalag og hingpit nga kalipay (tan-awa sa 1 Nephi 8:12). Si Nephi nagtinguha nga siya usab makakita unta sa kahoy nga gihulagway sa iyang amahan. Agig tubag sa pag-ampo, si Nephi gipakita og usa ka panan-awon. Ang asoy ni Nephi niana nga kasinatian mao ang, alang kanako, usa ka matahum nga istorya sa Pasko. Siya misulat:
“Ug nahinabo human ako makakita sa kahoy, ako miingon ngadto sa Espiritu: Ako nakakita sa imong gipakita ngari kanako nga kahoy nga bililhon labaw sa tanan.
“Ug siya miingon ngari kanako: Unsa ang imong gitinguha?
“Ug ako miingon ngadto kaniya: Aron masayud sa kahulugan niana …
“… Ug ako nakakita sa dakbayan sa Nazaret; ug diha sa dakbayan sa Nazaret ako nakakita sa usa ka birhen. …
“… Ug siya miingon ngari kanako: Tan-awa, ang birhen nga imong nakita mao ang inahan sa Anak sa Dios, sumala sa kahimtang sa unod.
“… Ug ako mitan-aw ug nakakita sa birhen pag-usab, nagkugos og bata diha sa iyang mga bukton.
“Ug ang anghel miingon ngari kanako: Tan-awa ang Kordero sa Dios, oo, gani, ang Anak sa Amahan sa Kahangturan!” (1 Nephi 11:9–11, 13, 18, 20–21).
Nagtuo ko nga kini importante nga sa dihang si Nephi mihangyo nga masayud sa kahulugan sa kahoy, gipakita siya sa unang Pasko. Ang Espiritu nangutana dayon kon si Nephi nakasabut sa kahulugan sa kahoy. Si Nephi mihatag niining dinasig nga tubag:
“Oo, mao kini ang gugma sa Dios, nga makatag sa tibuok kalibutan diha sa mga kasingkasing sa mga anak sa mga katawhan; busa, mao kini ang labing madanihon sa tanan nga mga butang.”
Ang Espiritu midugang, “Oo, ug ang labing hingpit nga kalipay ngadto sa kalag” (1 Nephi 11:22–23).
Pinaagi niini nga kasinatian, si Nephi nakakat-on nga ang butang nga labing madanihon ug makalipay sa atong mga kalag mao ang pagbati sa gugma sa Dios pinaagi sa Iyang Anak, si Jesukristo. Kana mao ang tinuod nga gasa sa Pasko. Apan, daghan kanato ang nanglimbasog sa pagbati sa gugma sa Dios sa atong kinabuhi—bisan atol niining panahon sa pagsaulog. Ang mosunod mao ang upat ka sugyot sa mga butang nga atong mabuhat aron madawat ang gasa sa gugma sa Dios niining panahon sa Pasko.
1. Pagtuon sa Pulong sa Dios
Pagsugod o pagbag-o og regular nga pagtuon sa kasulatan ug sa mga pulong sa buhing mga propeta. Diha sa panan-awon ni Lehi, siya nakakita og “usa ka gunitanan nga puthaw” (1 Nephi 8:19) nga nagpaingon ngadto sa kahoy. Kadtong kinsa nakasinati sa gugma sa Dios migunit sa gunitanan, kanunay migunit niini, ug mipadayon paingon sa unahan hangtud sila mikaon sa bunga sa kahoy (tan-awa sa 1 Nephi 8:30). Si Nephi nakakat-on nga kini nga gunitanan nagrepresentar sa pulong sa Dios (tan-awa sa 1 Nephi 11:25).
Makadapit kita sa Ginoo sa atong kinabuhi pinaagi sa pagtuon sa Iyang mga pulong. Ang atong pasalig dili kinahanglan nga dako kaayo. Kon ang mga higala mangutana kon unsa ka dugay sila kinahanglan magtuon sa mga kasulatan, kanunay kong motubag, “Pagbasa hangtud nga mabati ninyo ang Espiritu; dayon tingali mabati ninyo nga magpadayon.” Dili ang gidaghanon sa mga minuto, mga bersikulo, o mga kapitulo nga atong basahon ang importante. Ang mas importante mao ang kasinatian nga atong gitinguha nga mabatonan uban sa Espiritu samtang kita magtuon. Ang Ginoo mopanalangin kanato sa matag ginagmayng paningkamot nga atong himoon.
Ang pagtuon sa Dali, Sunod Kanako alang sa Disyembre naglakip sa basahon ni Moroni ug sa usa ka espesyal nga kapitulo nga giulohan og “Pasko.” Unsa ang mas maayong oportunidad sa pagsubsob sa atong kaugalingon sa mga kasulatan kay sa pagtuon sa mga pag-ampo sa sakramento ug sa mga pulong sa mga propeta sama ni Moroni samtang sila maghatag og gamhanan, personal nga pagsaksi ni Jesukristo?
Mahimo usab natong tun-an ang mga pulong sa buhing mga propeta pinaagi sa pagbasa sa kinatibuk-ang komperensya nga isyu sa Liahona o pinaagi sa pagpaminaw sa ilang mga pakigpulong diha sa Gospel Library. Sama sa gunitanan nga puthaw sa damgo ni Lehi, ang atong gibag-o nga pagtuon sa mga pulong ni Kristo makagiya kanato sa pagsinati sa gugma sa Dios niini nga Pasko.
2. Pagserbisyo
Tingali ang labing gihandum nga Pasko sa akong pagkabatan-on mao ang tuig nga ang among pamilya miapil uban sa mga iyaan, mga uyoan, ug mga ig-agaw sa paghatag og sinina, pagkaon, mga dulaan, mga antiyohos, ug mga gamit sa panimalay [appliances] ngadto sa usa ka lokal nga pamilya nga nanginahanglan. Dili gayud ko makalimot nga apil ko sa dakong grupo sa mga tawo nga midala sa Pasko sa ilang panimalay. Kana nga pagbati mipadayon og dugay human milabay ang Pasko ug ang mapasalamaton nga mga pagpahayag sa inahan ug sa iyang upat ka anak nagpabilin sa akong panumduman. Ang pagserbisyo sa kana nga pamilya mitugot sa gugma sa Dios nga “makatag sa tibuok” (1 Nephi 11:22) nakong kasingkasing.
Ang atong pagserbisyo sa uban dili kinahanglan nga dako o komplikado. Samtang nagserbisyo isip usa ka bishop, akong nakat-unan nga adunay daghan sa atong mga ward ug mga komunidad kinsa, sa bisan unsang adlaw, mobati nga nag-inusara, nabalaka, o nabug-atan. Ang usa ka tawag sa telepono, manggihunahunaon nga mensahe sa text, mabination nga sulat, linuto sa balay nga pagkaon, makig-uban sa paglakaw-lakaw sa kasilinganan, o ang usa ka tanyag sa pagtabang sa mga anak sa usa ka tawo mahimong usa ka pinadala sa langit nga milagro ug tubag sa pag-ampo.
Kon kita mangutana sa atong Langitnong Amahan, “Aduna bay usa ka tawo nga akong matabangan karon?” mahimong adunay usa ka ngalan o nawong nga mosantup sa atong hunahuna, ug ang mga pag-aghat sa Espiritu Santo makatabang kanato nga makasabut kon sa unsang paagi kita makapanalangin niana nga tawo. Samtang kita molihok niadto nga mga pag-aghat, masinati nato ang pipila ka bahin sa gugma sa Dios alang kanila ug alang kanato.
Ang “Dan-agi ang Kalibutan” nga inisyatibo sa Simbahan nagsugyot og yanong mga buhat sa serbisyo sa pagtabang sa uban nga mobati sa gugma sa Dios. Kon ang Espiritu moaghat kaninyo sa pagdawat sa gasa sa gugma sa Dios diha sa inyong kinabuhi pinaagi sa pagserbisyo karong Pasko, ang Dan-agi ang Kalibutan makatabang kaninyo sa pagsugod (bisitaha ang ComeuntoChrist.org).
3. Maghinulsol
Ang ikatulo nga pagdapit mao ang pagdawat sa gasa sa Manluluwas nga paghinulsol. Si Elder Lynn G. Robbins sa Seventy mitudlo: “Ang paghinulsol anaa kanunay nga gasa sa Dios ug makahimo nato sa pag-agi gikan sa kapakyasan ngadto sa kapakyasan nga dili mawala ang bisan unsa nga kadasig. Ang paghinulsol dili Iyang alternatibo nga plano sa higayon nga kita mapakyas. Ang paghinulsol mao ang Iyang plano, nakahibalo nga kita makasala.”1
Kini nga kinabuhi lisud. Samtang maningkamot kita paingon sa atong tumong sa kinabuhing dayon, kitang tanan magkulang ug magkinahanglan sa matubsanong gahum sa Pag-ula ni Jesukristo. Usa sa mga rason nga ang Manluluwas andam nga mipili sa pagsinati sa silot sa atong mga sala kay aron Siya makatanyag kanato sa gasa sa paghinulsol. Miantus na Siya alang sa atong mga sala. Ang nahabilin mao ang atong pagpili kon modawat ba kita sa Iyang pagdapit:
“Busa, kinsa kadto nga maghinulsol ug maduol ngari kanako ingon sa usa ka gamay nga bata, kaniya Ako modawat, kay ingon niana ang gingharian sa Dios. Tan-awa, kay ingon niana Ako motugyan sa akong kinabuhi, ug modawat niini pag-usab; busa paghinulsol, ug duol ngari kanako kamo nga mga lumulupyo sa yuta, ug maluwas” (3 Nephi 9:22).
Nagtuo ko nga kitang tanan nagdala og pipila ka palas-anon sa sala, dako o gamay, nga ang Espiritu nag-aghat kanato sa pagdiskarga. Makatabang ang atong mga bishop ug mga presidente sa stake. Ang Manluluwas adunay mabination ug mapasayloon nga kinaiya, ug Siya nagpaambit sa susama nga mga pagbati sa Iyang mga sulugoon. Sila nahigugma kanato ug makatabang kanato nga mamaayo pinaagi sa Pag-ula sa Manluluwas. Kita sa matag usa makadawat sa tanyag sa Manluluwas nga moduol ngadto Kaniya ug hingpit nga mamaayo karong Pasko.
4. Bisita sa Balay sa Ginoo
Pipila sa mga higayon diin gibati nako ang gugma sa Dios sa hilabihan mao ang diha sa Iyang balaang mga templo. Didto, ang akong pinalanggang asawa ug ako nasilyo sa usag usa alang sa karon ug sa kahangturan. Miadto ko didto nga nagtinguha og giya alang sa mga desisyon ug sa pagpangita og kalinaw atol sa mga panahon sa kaugtas. Sulod sa templo, ang langit daw mas duol, ug ang pagpadayag ingon og mas dali nga moabut.
Kabahin sa mga ordinansa sa Melchizedek nga Pagkapari, nga naglakip sa mga ordinansa sa templo, ang Ginoo miingon, “Diha sa mga ordinansa niana, ang gahum sa pagka-diosnon gipakita” (Doktrina ug mga Pakigsaad 84:20).
Samtang moapil kita sa mga ordinansa sa templo, kita mahimong makaila sa Dios, ug ang kalinaw ug gahum sa usa ka diosnon nga kinabuhi mapakita sa atong mga kinabuhi.
Si Presidente Thomas S. Monson (1927–2018) misaad, “Kon motambong kita sa templo, dunay moabut nato nga matang sa pagkaespirituhanon ug pagbati sa kalinaw nga molabaw pa sa bisan unsang pagbati nga moabut sa kasingkasing sa tawo.”2
Kon taudtaod na sukad nga kamo mibati og kalinaw, unsa kaha kon tugotan kining panahon sa Pasko sa pagtimaan sa sinugdanan sa nabag-ong pasalig nga motambong sa templo kon kini moabli na pag usab? Kon kamo wala pa makadawat sa inyong kaugalingong pagtuga, ang inyong ward o mga lider sa branch makatabang kaninyo sa pagpangandam. Kita usab makabati sa gugma sa Dios samtang kita mangita ug mosumiter og mga ngalan aron ang atong katigulangan makadawat sa mga panalangin sa templo.
Ang Tinuod nga Gasa
Ang pulong sa Dios, kinasingkasing nga pagserbisyo, paghinulsol, ug pag-apil sa mga ordinansa sa templo mao ang tanan nga mga oportunidad sa pagdawat sa tinuod nga gasa sa Pasko. Ang Apostol Juan misulat, “Kay gihigugma gayud sa Dios ang kalibutan, nga tungod niana gihatag niya ang iyang bugtong Anak” (Juan 3:16). Niini nga Pasko, nag-ampo ko nga ang matag usa kanato magiyahan pinaagi sa Espiritu sa pagpili niadtong mga butang nga makatabang kanato nga makasinati sa talagsaon nga gasa sa gugma sa Dios pinaagi sa Iyang Anak, si Jesukristo.