Ang Ebanghelyo: Usa ka Angkla sa Panahon sa Kausaban

Sa 2020 kami nakalahutay og mga kalamidad ug usa ka tibuok kalibutan nga pandemya. Atong natun-an ang Basahon ni Mormon pinaagi sa Dali, Sunod Kanako uban sa atong mga kaigsoonan nga anaa sa duol ug lagyo. Nagkahiusa kita tibuok kalibutan diha sa pagpuasa ug sa hugot nga pagtuo.

Sa nag-usab-usab nga kalibutan, kita makaangkla sa atong mga kalag ngadto sa atong Manluluwas, si Jesukristo, ug sa Iyang gipahiuli nga ebanghelyo. Manghinaut kami nga kini ug ang ubang mga artikulo niining isyu makatabang ninyo nga mobati sa diwa sa Pasko, ang Espiritu sa Ginoo:

• Si Elder D. Todd Christofferson nagtudlo nganong kita nagkinahanglan og Manluluwas (tan-awa sa pahina 12).

• Sa “Pagpaambit sa Kahayag sa Manluluwas sa Pasko,” mosugyot kami og pipila ka mga ideya alang sa pagpangalagad panahon sa Pasko (tan-awa sa pahina 8).

• Si Jakob Jones misulat kabahin sa upat ka gasa nga atong mahatag sa Ginoo aron sa pagdapit sa gasa sa Espiritu Santo ngari sa atong mga kinabuhi (tan-awa sa pahina 28).

• Sa sayong bahin niining tuiga, ang Unang Kapangulohan miaprobar sa pagmantala sa tulo ka bag-ong magasin sa Simbahan, sugod sa sunod bulan: usa alang sa mga hamtong, usa alang sa mga batan-on, ug usa alang sa mga bata. Kining mga magasin anaa sa daghang mga pinulongan, naghatud sa ebanghelyo ngadto sa mga Santos sa Ulahing mga adlaw sa tibuok kalibutan. Pinaagi niining bag-ong mga magasin, magpadayon kita nga makapaminaw sa tingog sa Ginoo pinaagi sa Iyang mga sulugoon ug makakonektar sa matag usa isip mga sakop sa tibuok kalibutan nga Simbahan. (Magkat-on pa og dugang diha sa pahina 6.)

Malipayong Pasko gikan sa mga kawani sa Liahona