Siya Mao ang Kahayag
Ang tagsulat nagpuyo sa Utah, USA.
Liboan ka milya gikan sa panimalay, nakat-on ko og usa ka leksyon gikan sa gagmay kaayong mga kahayag nga trinilyon ka milya ang kalay-on.
Paghulagway pinaagi ni Gabriele Cracolici
Tingali kini katingalahan kon paminawon, apan kanunay ko nga maghinam-hinam alang sa Pasko sa akong misyon, gatusan o gani liboan ka milya gikan sa naandan nga drama sa pamilya ug mga makabalda nga mga komersyal. Ang Pasko mao ang kabahin ni Kristo, ug unsa pay mas maayong paagi kay sa pagtabang sa uban nga moduol ngadto Kaniya?
Usa ka gabii sa Disyembre, ang akong kompanyon ug ako padulong nang mamalik sa among apartment human sa usa ka adlaw sa misyonaryo nga buhat sa La Paz, usa ka lahi kaayo nga dapit sa mga utlanan sa Siyudad sa Laoag, Philippines. Naglingkod ko sa sidecar sa usa ka traysikol nga nihuot og maayo tupad sa akong kompanyon nga unom ka tiil ang katas-on, ug kontento ra gyud ko sa kinabuhi. Mabugnaw nga hangin ang among nabati, nagpahinumdom nako (hapit) sa daghang Pasko nga minglabay nga puno sa snow didto sa amo—apan lahi ra gihapon ang katugnaw sa akong naandan sa Disyembre.
Samtang nagsakay kami paingon sa kabaryuhan, ang akong mga mata nagtan-aw ngadto sa langit. Sa ibabaw, layo gikan sa kahayag ug kasaba sa siyudad, adunay mga liboan ka mga bitoon nga makita. Apan nagkagamay nga mga bitoon ang makita samtang nagkaduol na kami sa sentro sa lungsod, hangtud nga ang kinahayagan nalang ang makita.
Naghunahuna ko mahitungod sa kahayag gikan sa mga bitoon ug ni Jesukristo. Naghunahuna ko sa mga bitoon nga nagpahibalo sa Iyang pagkatawo ug si Kristo Mismo, ang “masidlak nga bitoon sa kabuntagon” (Pinadayag 22:16). Siya mao ang labing masidlak nga bitoon, ang nagasidlak nga ehemplo alang kanatong tanan. Ug bisan pa niana, sama niadtong mga bitoon nga akong nakita samtang nagsakay sa traysikol, bisan Siya masalipdan sa mahayag nga polusyon. Magkadaghan ang kalinga, magkadaghang minugna nga kahayag, magkaminus nga makita ang natural nga kahayag. Sa gawas sa usa ka probinsya sa Pilipinas, ang uban nga mga bitoon makita pa gihapon bisan gikan sa taliwala sa lungsod, apan sa mga dagkong siyudad sama sa Manila, dili ka makakita og usa ka bitoon sa gabii. Ang kahayag gikan sa mga pahinumdom, mga negosyo, ug mga panimalay tanan misalipod sa kahayag sa layo nga mga bitoon.
Ang samang butang mahitabo kon atong palibutan ang atong kaugalingon sa mga kalinga ug mga artipisyal nga mga kahayag. Kini nahimong mas lisud nga makita ang kahayag ni Kristo.
Tinuod gayud kini sa mga panahon sa Pasko. Sayon ra nga mapalabihan ang mga kalihokan sa mga holiday ug mahimong magkapuliki ang atong kaugalingon sama kaguliyang sa Manila atol sa oras sa pagdali-dali [rush hour]. Adunay mga regalo nga pangitaon, party nga planohon, mga kard nga sulatan, ug dili maihap nga mga pasundayag, ug mga kalihokan nga tambungan. Kon kita mobati nga wala na kitay usa ka bakanting panahon sa paghangad, tingali dili na gani kita makaamgo kon unsa na ka hanap ang kahayag ni Kristo diha sa atong mga kinabuhi.
Sa atong pagpasiga sa atong mga panimalay ug mga punoan sa kahoy, kita dili makalimut sa pagpasiga sa Kahayag ni Kristo diha sa atong mga kasingkasing. Tingali gusto kita nga mohunong sa mga kapistahan sulod sa usa ka gutlo aron sa paghinumdom kon unsa ang atong gisaulog. Ang Pasko Mahitungod ni Kristo. Siya mao ang kahayag, ug kon atong minusan ang mga kalinga ug mohangad, makakita kita Kaniya, nagmakanunayon gayud ug nagasidlak aron ang kalibutan makakita.