Mas Magpaduol: Paghigugma sama sa Gibuhat sa Manluluwas
Ang mga tagsulat nagpuyo sa Utah, USA.
Daghan kaayo kita og makat-unan gikan sa ehemplo sa Manluluwas sa pagpakigdait sa uban.
At the Well [Diha sa Atabay], ni Crystal Close
Isip mga miyembro sa Simbahan kinsa mga homosekswal kanunay kaming modangup ngadto sa ehemplo sa Manluluwas alang sa tabang sa pagsabut kon unsaon sa labing maayong paagi maka-ugmad og mga relasyon uban sa mga miyembro sa Simbahan ug sa uban. Usa ka adlaw kami naghunahuna mahitungod kon sa unsang paagi ang Manluluwas mihangyo kanato nga “maghigugmaay ang usa sa usa; maingon nga ako nahigugma kaninyo” (Juan 13:34). Nakaplagan namo nga makapainteres nga wala Siya moingon nga “tungod kay ako nahigugma kaninyo” apan hinoon “ingon nga ako nahigugma kaninyo.” Kini mihimo kanamo sa paghunahuna mahitungod kon sa unsang paagi ang Manluluwas nahigugma sa katawhan. Sa unsa nga mga paagi Siya mipakita og gugma?
Mihukom kami sa paggahin og panahon sa pagtuon sa Bag-ong Tugon, nga pihong mangita sa mga istorya kon giunsa pagpakigdait sa Manluluwas sa ubang mga tawo atol sa Iyang mortal nga pangalagad. Isip usa ka bana ug asawa kinsa nakasinati og pagkaibug sa sama og sekso, gusto namong piho nga mas makasabut kon sa unsang paagi si Jesus mitratar niadtong kinsa daw wala masulod sa depinisyon sa kasagaran sa katilingban. Ania ang pipila ka sumbanan nga among namatikdan.
Si Jesus Miatubang sa mga Kalainan sa Kultura uban sa Pagkamabination
Kita nagpuyo sa usa ka panahon sa dakong sosyal ug politikal nga panagbangi, sama sa nasinati sa Manluluwas sa Iyang kinabuhi. Pipila sa mga isyu sa Iyang panahon kay dugay na ug nakagamot na pag-ayo sa mga tinuohan sa kasaysayan ug kultura.
Sama pananglit, ang Ginoo tuyo gayud nga mibiyahe latas sa Samaria, usa ka dapit nga gilikayan sa mga Judeo tungod sa usa ka panag-away nga nagsugod sa miaging gatusan pa ka tuig. Sa dihang si Jesus nakahimamat og usa ka babaye ug mihangyo kaniya sa pagkawos og tubig, siya ingon og mitubag isip usa ka relihiyoso ug politikal nga “lain”—nagpasabut sa kalainan tali Kaniya isip usa ka Judeo ug sa iyaha isip usa ka Samarianhon. (Tan-awa sa Juan 4.) Si Jesus, agig tubag, mitagad niini nga babaye isip anak nga babaye sa Dios. Ang Iyang reaksyon sa pagpakigsulti sa iyaha sa mahigugmaon ug matinud-anong paagi usa ka talagsaong ehemplo alang sa matag usa kanato. Usa ka komon nga estratehiya sa kaaway mao ang pagsulay sa pagbulag kanato ngadto sa managlahi nga mga grupo, nakigbatok sa usag usa diha sa panagsangka. “Apan ang Ginoo nagatan-aw sa kasingkasing” (1 Samuel 16:7).
Sayon ra ang paggamit sa leksyon niini nga istorya sa atong katilingban karon. Samtang magpadayon kita sa tibuok natong inadlaw-adlaw nga mga kinabuhi, lakip sa mga miting ug mga kalihokan sa Simbahan, kita makahimamat og mga tawo gikan sa lain-laing mga background. Tingali pipila gani ang nganlan sa kalibutan isip politikal o kultural nga mga kaaway. Imbis nga mag-focus kon unsa kaha ang magbulag kanato, kita makapili sa pag-focus kon unsay komon nga aduna nato isip mga anak sa langitnong mga ginikanan ug magkat-on sa pagpakigsulti sa uban sa mahigugmaong paagi, sama sa gibuhat sa Manluluwas.
Sa dihang ang Manluluwas mibisita sa mga katawhan sa Amerika human sa Iyang Pagkabanhaw, Siya mitudlo nga “[ang] yawa … mao ang amahan sa panagbingkil, ug siya nagkutaw sa mga kasingkasing sa mga tawo sa panagbangi uban ang kasuko, sa usag usa” (3 Nephi 11:29). Ang mga katawhan naminaw Kaniya, ug sa sunod nga henerasyon, nakahimo sila og katilingban diin “walay adunahan ug kabus, ulipon ug gawasnon, apan silang tanan gihimo nga mga gawasnon, ug nag-ambit sa langitnon nga gasa” (4 Nephi 1:3).
Si Jesus Nagpaduol Imbis nga Magpalayo
Si Jesus aktibong naningkamot nga mas magpaduol ngadto sa uban, sa emosyonal nga paagi ug gani sa pisikal nga paagi sa pipila ka higayon, imbis nga mogamit og mga pangatarungan sa pagpalayo sa Iyang Kaugalingon gikan niadtong kinsa kanunay nga gitamay ug gisalikway.
Sama pananglit, si Jesus kausa nakahimamat og tawo nga nadaot ang kamot. Tungod kay kadto mao ang Igpapahulay, dihay relihiyusong mga gidili nga nagpugong sa unsa nga trabaho ang kinahanglang buhaton nianang adlawa. Imbis molikay sa usa ka tawo nga nanginahanglan og tabang hangtud nga moabut ang usa ka oportunidad nga madawat sa sosyal nga paagi, si Jesus mipili sa “pagbuhat og maayo” diha-diha dayon (Mateo 12:12). Gidapit Niya ang tawo nga ipatuy-od ang iyang kamot. “Ug gituy-od niya ang iyang kamot ug hingulian kini, naayo ingon sa usa” (Mateo 12:13).
Susama nga mga istorya ang gisubli sa tibuok nga kasulatan. Si Jesus miila uban sa kalooy sa usa ka babaye kinsa gikonsiderar nga hugaw (tan-awa sa Lucas 8), miabiabi ug miayo sa usa ka tawo kinsa nakadungog og mga tingog ug misamad sa iyang kaugalingon (tan-awa sa Marcos 5), ug miayo sa usa ka tawo kinsa sayop nga gihusgahan sa uban (tan-awa sa Juan 9:1–7). Usa ka sumbanan nga atong makita sa tibuok nga kasulatan mao nga kon “mituyhad si Jesus sa kamot” (Mateo 8:3), kini sa kasagaran aron sa pag-awhag ug paghigugma sa uban ug sa paghatag og pagkaayo ug kalinaw.
Tingali usa ka imbitasyon gikan niini nga mga istorya mao nga kita mas makapaduol niadtong kinsa tingali lahi kanato. Sama pananglit, motapad ba kita sa usa ka tawo nga nagbisita sa simbahan, bisan kon sila wala nagsinina og sama sa uban? Mohatag ba kita og luna alang kanila aron makaapil sa usa ka panag-istoryahanay sa hallway? Mopahiyom ba kita ug mangumusta ug mabinationg mangutana sa pagpaningkamot nga mas makaila kanila ug motabang kanila nga mobati nga nalakip?
Ug tingali mas importante, unsaon nato nga makapalambo og mas suod nga emosyonal ug espiritwal nga relasyon sa uban, nga magpaambit og kalinaw ug gugma sama sa gibuhat sa Manluluwas? Nasayud kita nga mapanalanginan kita sa Dios kon maningkamot kita nga makigdait—ilabi na niadtong kinsa daw lahi kanato.
Si Jesus Midapit og mga Tawo aron Magpaambit og Pagkaon
Atol sa among pagtuon sa Bag-ong Tugon, natandog kami kon kapila ang Manluluwas mipaambit og pagkaon sa uban. Sa makadaghang higayon, gisaway Siya tungod sa mga tawo nga Iyang gipili nga gahinan og panahon.
Sa usa ka ehemplo, si Jesus mitawag isip usa sa Iyang mga disipulo og usa ka tawo nga ginganlan og Mateo, kinsa usa ka “maniningil sa buhis”, o usa ka tawo nga nagrepresentar sa naghari nga gobyerno niadto nga panahon (tan-awa sa Lucas 5:27; Giya ngadto sa mga Kasulatan, “Publikano”). Ang mga maniningil sa buhis sa kasagaran gikasilagan sa katawhan nga Judeo. Mao nga sa dihang si Mateo mipahigayon og usa ka dako nga kasaulogan alang kang Jesus ug sa Iyang mga disipulo, ang mga escriba ug mga Pariseo—kadtong gipakaingon nga nagsunod sa mga sugo sa Dios—mireklamo. “Nganong makigsalo man kamog pangaon ug panginom uban sa mga maniningil sa buhis ug sa mga makasasala?” nangutana sila. Si Jesus mitubag, “Ang mga maayog lawas wala magkinahanglan sa mananambal; kondili ang mga masakiton” (Lucas 5:30–31).
Jesus and Disciples in the Kidron Valley [Si Jesus ug ang mga Disipulo didto sa Walog sa Kidron], pinaagi ni Balage Balogh, Art Resource
Kini usa ka gamhanang ehemplo kon sa unsang paagi ang Manluluwas mipili nga dili maimpluwensyahan sa dayag nga mga panagway o kalibutanong mga dungog. Hinoon, Iyang gitutukan ang mga panginahanglan, bili, ug potensyal sa matag indibidwal. Usa ka makapahinam nga pagkaamgo ang miabut kanamo samtang kami nagbasa mahitungod ni Jesus nga nagpaambit og pagkaon uban ni Mateo ug sa uban. Kita dili gayud makaimpluwensya sa usa ka tawo kon kita walay maayong relasyon kanila. Gawas kon kita mogahin og panahon nga makaila kanila ug sa paghigugma ug pagdawat kanila kon asa sila sa ilang panaw, kita tingali adunay gamay ra kaayo nga epekto sa ilang kinabuhi.
Tingali nakadungog kamo sa panultihon nga “Higugmaa ang makasasala; kasilagi ang sala.” Naggahin ba kita og igong panahon sa unang bahin niana nga pagdapit? Si Jesus nagsulti kanato nga “maghigugmaay sa usag usa” (tan-awa sa Juan 13:34) ug sa pagpasaylo “kapitoan ka pito” (tan-awa sa Mateo 18:22). Imbis nga mogahin og panahon sa pagsulay sa pagtino ug pagdumot sa sala sa laing tawo, atong magamit kana nga enerhiya sa pagpalambo og mga relasyon sa atong mga kaigsoonan.
Ganahan kami mogamit sa panultihon nga “Higugmaa ang makasasala; dapita sila sa panihapon!” Tungod kay kitang tanan nakasala “ug nakabsan sa himaya sa Dios” (Mga Taga-Roma 3:23), kini maghatag gayud kanato og daghang mga oportunidad sa pagserbisyo sa uban pinaagi sa mahigugmaong giandam nga mga pagkaon, nga gihukad sa usa ka dapit diin anaa ang Espiritu sa Dios. Atong libutan ang atong mga lamesa og mga panag-istoryahanay sa sinserong kamabination, tinuoray nga paghigalaay, ug tinuyo nga mga paningkamot aron makakita sa usag usa sa paagi nga si Jesus nakakita kanato.
Pagtukod sa Zion
Niining tuiga kita misaulog sa ikaduhang siglo sa Unang Panan-awon, sa dihang gipahibalo ni Jesukristo nga ang Iyang ebanghelyo ipahiuli. Sunod tuig, magkat-on kita gikan sa mga ehemplo sa nag-unang mga Santos kinsa mitabang sa pagtukod sa gingharian sa Ginoo dinhi sa yuta sa kini nga dispensasyon. Kining nag-unang mga Santos nagkinahanglan nga makakita og paagi aron magtambayayong ug maghiusa, bisan tuod og sila gikan sa lain-laing mga nasud, kanhing relihiyusong mga tinuohan, ug sosyal-ekonomikanhong mga kahimtang.
Nag-atubang kita og susama nga oportunidad karon. Kinahanglan makakaplag kita og paagi unsaon nga magkahiusa sa atong pagtuo, bisan pa sa kultural ug politikal nga mga kalahian nga nagsulay sa pagbulag kanato. Mahitabo lamang kini kon atong tugutan ang Manluluwas nga mahimong atong giya. Siya hingpit nga nakasabut sa atong mga kahuyang ug makahimo sa huyang nga mga butang nga malig-on (tan-awa sa Ether 12:27). Siya hingpit nga nakasabut sa atong mga kasakit ug makatabang kanato nga mamaayo (tan-awa sa Alma 7:11–12). Siya hingpit nga nakasabut sa atong mga kalainan ug nagsaad gihapon nga kita—sama sa gihulagway sa Doktrina ug mga Pakigsaad 49:25—mouswag ug maglipay sa Zion. Magkauban.