Usa ka Tawo ang Mawala Sunod Tuig
Sa Bisperas sa Pasko, naghunahuna ko kon unsa ka dako ang akong paghigugma sa among pamilya. Dayon mibati ko og klaro nga impresyon.
Paghulagway pinaagi ni Kendra Binney
Bisperas kadto sa Pasko. Bag-ohay lang kaming nakadawat sa among bag-ong mga pajama, usa ka tradisyon sa among pamilya. Ang mga bata mopatukar og musika sa Pasko ug ang tanan magsayaw. Walay usa nga saputon; ang tanan malipayon, mapahiyomon, ug naglingaw-lingaw. Pagkasayud nga ako hapit na manganak, naghunahuna ko unsa ka dako akong gugma sa among pamilya, kabahin sa akong paghinam-hinam nga makaangkon og dugang anak nga tali-abut.
Dayon mibati ko og klaro nga impresyon. Ang Espiritu mihunghong kanako nga usa sa among sakop sa pamilya dili makauban namo sunod tuig.
Wala madugay nianang gabhiona, samtang ang akong bana, si Tim, ug ako namutang sa mga regalo ubos sa kahoy, misulti siya kanako nga mibati siya og impresyon na sa sayo pa nianang gabhiuna nga usa sa among sakop sa pamilya dili namo makauban sunod gabii sa Pasko. Gisultihan nako si Tim nga nadawat nako ang samang impresyon.
Sa wala pa kami mobiya sa usa ka liwas sa Pasko nga biyahi aron sa pagbisita sa pamilya nga tua sa gawas sa estado, nakig-istorya si Tim sa mga bata mahitungod sa siguridad samtang magbyahe kami. Nabalaka mi sa hunahuna nga mawad-an og usa ka sakop sa pamilya sa among pagbyahe, apan kami mibati og kasiguroan nga ang tanan maayo ra. Mibyahe kami, nakaangkon og talagsaong pagbisita sa mga sakop sa pamilya, ug luwas nga nakapamauli.
Sa wala madugay panahon na alang sa akong regular nga paghiling [checkup] sa dili pa manganak. Ang mga doktor mihatag sa makaguol nga balita. Usa ka ultrasound nakompirmar nga ang bata namatay na duha ka semana sa wala pa ang pagbisita.
Samtang si Tim ug ako namauli, nangahugno, nakaamgo kami nga duha ka semana sa wala pang Bespiras sa Pasko. Wala gyud mi masayud kon kanus-a ang espiritu mosulod sa lawas, apan si Tim ug ako mibati nga ang among batang masuso makauban sa among pamilya, bisan lang sa usa ka higayon, nianang Bisperas sa Pasko uban sa tanan nga nanagsayaw ug nagmalipayon. Kami mibati og tumang kalipay, ug mibati kami nga ang batang masuso nahimong kabahin niini. Sa dihang siya mibiya kanamo, nagtuo kami nga siya nahimong sakop sa among pamilya kinsa dili na namo makauban sa sunod Bisperas sa Pasko. Nagtuo ko nga ugma damlag among makita pag-usab ang among batang masuso. Mapasalamaton ko sa kalinaw nga gidala ngari kanako.