Hingpit diha kang Kristo

Ni Elder Gerrit W. Gong

Sa Korum sa Napulog Duha ka mga Apostoles

Gikan sa usa ka pakigpulong sa Oktubre 2018 nga kinatibuk-ang komperensya.

Ang espirituhanon nga kahayag ug kinabuhi moabut kon ang regular nga relihiyusong pagtahud makapaduol kanato ngadto sa atong Langitnong Amahan ug sa atong Manluluwas, si Jesukristo. Uban sa pagkamasulundon matag adlaw, makakaplag kita og mga tubag, hugot nga pagtuo, ug kalig-on sa pag-atubang sa mga hagit matag-adlaw ug mga oportunidad uban sa pagpailub sa ebanghelyo, panglantaw, ug hingpit nga kalipay.

Samtang magtinguha kita sa bag-o ug mas balaan nga mga paagi sa paghigugma sa Dios ug motabang kanato ug sa uban nga maandam sa pagsugat Kaniya, atong hinumduman nga ang pagkahingpit anaa kang Kristo, dili sa atong kaugalingon o sa pagkaperpeksyonista sa kalibutan.

Ang pagdapit sa Dios napuno sa gugma ug posibilidad tungod kay si Jesukristo mao “ang dalan, ug ang kamatuoran, ug ang kinabuhi” (Juan 14:6). Alang niadtong mibati nga nabug-atan, Siya nagdapit, “Umari kanako,” ug kadtong moduol Kaniya, Siya nagsaad, “papahulayon ko kamo” (Mateo 11:28). “Duol ngadto kang Kristo, ug paghingpit diha kaniya, … mohigugma sa Dios uban sa tibuok ninyo nga gahum, hunahuna ug kusog, niana ang iyang grasya igo alang kaninyo, nga pinaagi sa iyang grasya kamo mahimo nga hingpit diha kang Kristo” (Moroni 10:32).

Niini nga pasalig “pinaagi sa iyang grasya kamo mahimo nga hingpit diha kang Kristo” mao usab ang kahupayan, kalinaw, ug panaad nga kita makapadayon uban sa hugot nga pagtuo ug pagsalig diha sa Ginoo bisan kon ang mga butang dili mahiuyon sa atong gilauman, gipaabut, o gani sa unsay angayan, pinaagi sa dili nato sala, bisan human nato gibuhat ang labing maayo.

Sa nagkadaiyang mga panahon ug mga pamaagi, mobati kita og kakulang, dili sigurado, tingali dili takus. Apan sa atong matinud-anon nga mga paningkamot sa paghigugma sa Dios ug sa pagpangalagad sa atong mga silingan, ato tingaling bation ang gugma sa Dios ug gikinahanglan nga inspirasyon alang sa ila ug atong kinabuhi.

Uban sa kalooy, ang atong Manluluwas miawhag ug misaad nga kita mahimong “mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo”(2 Nephi 31:20). Ang doktrina ni Kristo, ang Pag-ula sa atong Manluluwas, ug ang hingpit nga pagsunod sa Iyang dalan sa pakigsaad makatabang kanato nga mahibalo sa Iyang mga kamatuoran ug makahimo natong gawasnon (tan-awa sa Juan 8:32).

Ako mopamatuod nga ang Iyang dalan sa pakigsaad modala ngadto sa labing dakong gasa nga gisaad sa atong mahigugmaong Langitnong Amahan: “Kamo makabaton og kinabuhi nga dayon” (2 Nephi 31:20).