Pagdan-ag sa Kalibutan didto sa Paris
Akong nasuta nga ang pagserbisyo nakahatag og dili mahulagway nga kalipay ug nga ang gamay nga mga buhat makapalig-on sa mga indibidwal sa dalaygon nga mga pamaagi.
Paghulagway pinaagi ni Allen Garns
Kauban sa mga walay pinuy-anan diha sa kadalanan ug sa mga bakwit nga nangatulog diha sa parke sa Paris, France, ang panginahanglan sa tabang anaa makita sa among mga mata sa matag adlaw, bisan atol sa panahon sa Pasko. Duha ka nga mga higala ug ako mihukom sa pagporma og usa ka grupo sa komunidad nga gitawag og Solidarity to Act Together [Kahiusahan sa Paglihok og Dungan] aron sa pagtabang kon asa kami makahimo.
Duyog sa suporta sa daghang mga bulontaryo sa tibuok komunidad ingon man usab sa mga Santos sa Ulahing mga Adlaw gikan sa tulo ka mga stake sa Paris, among giorganisar ang mga kalihokan nga Dan-agi ang Kalibutan aron sa pagtabang sa among mga kaigsoonan nga anaa sa panginahanglan.
Sulod sa nagsunod nga tulo ka tuig, mipahigayon kami og tapos sa tuig nga Dan-agi ang Kalibutan nga kalihokan diin ang mga artist, mga boluntaryo, ug mga bisita gikan sa nagkadaiyang mga simbahan ug mga organisasyon sa Paris miabut sa pagpasundayag ug pagdonar og mga kasangkapan ngadto sa nanginahanglan. Mikabat og mga bulan sa pagpangandam, apan ang mga boluntaryo ug mga tigpasundayag nakasinati og ingon kadako nga kalipay sa pag-apil diha sa kalihokan. Walay usa kanila nga gustong mosipyat niini. Alang sa among ikatulong kalihokan sa Dan-agi ang Kalibutan, 82 ka partisipante ang miabut bisan pa man og dunay strike sa transportasyon!
Sa wala pa ang kalihokan, miandam kami ug mipundok sa mga backpack nga puno sa mga produktong panglimpyo sa lawas aron ipang-apud-apod sa mga bakwit ug walay pinuy-anan sa Paris. Mipundok usab kami og mga habol, mga hapin sa higdaanan, mga unlan, mga gamit sa sports, mga tsinelas pangkaligo, ug gani bisikleta, nga ipanghatag ngadto sa mga bakwit.
Sa miaging tuig mipahigayon usab kami og usa ka pasundayag sa fashion atol sa kalihokan. Usa ka 22 anyos nga stylist kinsa miapil miingon nga ang suporta nga iyang nadawat nakahatag kaniya og kalig-on sa pagtuo sa iyang mga abilidad. Samtang nakigsulti siya nako, napahinumduman ko nga ang tanan nagkinahanglan nga mobati nga gikinahanglan ug nga ang tanan kanato anaa sa panginahanglan sa ubang mga paagi.
Naglantaw mi sa sunod tuig. Naglaum pa gani mi og mas daghan pang mga partisipante ug mga kalihokan. Ang uban gitanyagan og mga budiga ug mga van nga refrigerated aron matabangan kami uban sa mga ahensiya sa komunidad ug makig-alayon sa usa ka dakong internasyonal nga kompanya sa pagkaon [catering] aron sa paghatag og balanse nga mga pagkaon alang niadtong nanginahanglan. Nag-organisar usab kami og usa ka paagi sa paghatag og libre nga mga leksyon sa French alang niadtong nagkat-on og French isip ikaduha nga pinulongan.
Akong nasuta ang pagserbisyo og halangdon nga kawsa makahatag og dili matukib nga kalipay. Ang ginagmayng mga lihok makapalig-on sa mga indibidwal sa talagsaong mga paagi. Ang mga pahiyom ug pasalamat nga among nadawat nakadasig namo sa paghimo og mas daghan pa.