Dali, Sunod Kanako
Unsay anaa sa Imong Lista?
Hunong sa paglista sa unsay inyong gusto, ug sugdi sa pag-angkon kon unsay inyong gikinahanglan.
Unsa gayud inyong gusto alang sa Pasko karong tuiga? Naghisgot kita mahitungod og labaw pa kay sa mga regalo lamang—unsa man gayud ang inyong gikinahanglan?
Ang usa ka panginahanglan mao ang usa ka butang nga gikinahanglan nga anaa kaninyo aron mabuhi. Sa panahon sa Pasko, mahimong sayon ang pag-focus lamang sa atong pisikal nga mga gusto, apan sa atong espirituhanong mga panginahanglan diay?
Gikinahanglan nga mga Gasa
Kita nasayud nga ang atong mga espiritu aduna kanunay mga panginahanglan, nga ang mga gasa sama sa pagtuon sa kasulatan ug pag-ampo makatabang sa pagtuman niini, apan ang atong mga espiritu usab adunay ubang mga panginahanglan, depende sa atong mga kahimtang. Nagpundok kami og pipila ka mga istorya gikan sa kabatan-onan sa tibuok kalibutan kinsa nakadiskubre unsa ang ubang “mga gasa” nga gikinahanglan sa ilang mga espiritu. Samtang magbasa kamo, paghunahuna mahitungod kon unsa nga mga gasa ang tingali gikinahanglan sa inyong kaugalingong espiritu.
Ang Gasa sa mga Higala
Rhoeta M., 15 anyos, gikan sa Idaho, USA, nakadiskubre nga siya nagkinahanglan og maayong mga higala samtang siya nagpakisusi sa Simbahan. “Sa dihang nagsugod ko sa pagtambong sa miting sa sakramento, mga klase, ug Young Women, giabi-abi ko dayon sa daghang mahigalaon nga mga nawong ug sa usa ka maamumahon nga komunidad. Giapil ko sa tanang mga kalihokan, ug ang akong bag-ong nahimong mga higala miawhag kanako sa pagsunod sa plano sa Dios. Sila mitabang kanako sa paghimo ug pagtuman sa akong espirituhanong mga tumong.” Human sa pagkat-on og dugang gikan sa mga misyonaryo ug pagpakigdait sa iyang mga higala sa simbahan, si Rhoeta mihukom nga magpabunyag. “Mapasalamaton kaayo ko nga nakakaplag sa maong maayo nga mga tawo,” miingon siya, “ug ako napanalanginan nga nakabaton og usa ka maayo kaayo nga pagbalhin ngadto sa Simbahan!”
Ang Gasa sa Seminary
Juan R., 16 anyos, gikan sa Chile nakadiskubre nga ang seminary usa ka butang nga iyang gikinahanglan. “Sa seminary ako makakat-on sa kamatuoran, ug ang Espiritu maghatag kanako og kaalam. Sa bisan unsang higayon nga ako mobati sa Espiritu, nasayud ko nga anaa ko sa dapit diin mao ang gusto sa Dios nga maanaa ko nianang higayuna. Mao kini ang akong pagbati kon naa ko sa seminary, mao nga nasayud ko nga kini importante alang kanako nga moadto didto. Nasayud ko kanunay nga ang pag-adto sa seminary mohatag kanako og mga tubag sa akong mga pangutana o pagduha-duha.”
Ang Gasa sa Pagserbisyo
Julie S., 16 anyos, gikan sa Texas, USA, nakadiskubre nga siya nagkinahanglan og usa ka calling. “Bag-ohay lang ko gitawag isip chorister sa akong ward, ug kini nagpasabut nga kinahanglan gayud nga dili ko ma-late sa simbahan! Kanunayng lisud gayud kini sa akong pamilya, ug kini nga calling dili lamang maghatag kanako og dakong kalipay tungod kay ganahan ko og musika, apan kini naghimo usab sa mga Dominggo sa akong pamilya nga dili na kaayo magdali-dali ug mas naka-iskedyul na.”
Ang Gasa sa Ebanghelyo
Sam D., 19 anyos, gikan sa Turkey nakadiskubre nga ang butang nga wala sa iyang kinabuhi mao ang Simbahan. “Nabunyagan ko sa edad nga 16, ug human niana, misugod ko sa tinouray nga pagpakabuhi sa akong kinabuhi. Mas klaro ang tanan. Aduna koy katuyoan sa pagpakabuhi.”
Unsa nga mga Gasa ang Inyong Gikinahanglan?
Kini nga kabatan-onan nakakaplag unsay ilang gikinahanglan aron sa pagpalambo sa ilang mga pagpamatuod, mahimong mas malipayon, ug mas magpaduol sa Dios. Human mabasa ang ilang mga kasinatian, unsay inyong namatikdan nga mao ang pipila sa mga panginahanglan sa inyong espiritu? Paghimo og usa ka lista aron matabangan kamo sa pagsubay niini.
Paghatag ug Pagdawat
Karon nga inyo nang natino ang mga panginahanglan sa inyong espiritu, unsaon ninyo sa pagtubag niini?
Sugdi pinaagi sa pagtakda og mga tumong aron makab-ut ang unsay inyong gikinahanglan. Ang pagtakda og mga tumong mao ang usa ka talagsaong paagi sa pagtuman sa bag-o nga mga butang, ug ang programa sa Kabataan ug Kabatan-onan makatabang kaninyo nga makasugod.
Ang inyong pamilya mahimong laing maayong dapit aron sa pagpangita og tabang sa pagtubag sa inyong mga panginahanglan—inyong direkta nga pamilya ug ang inyong pamilya sa ward o branch. Bisan sa panahon ni Moroni, usa ka nag-unang rason alang sa pagpahigayon og mga miting sa Simbahan mao ang “pagpakigsulti sa usag usa mahitungod sa kaayohan sa ilang mga kalag” (Moroni 6:5).
Ug siyempre, gusto motabang ang Langitnong Amahan kaninyo sa pagtubag sa inyong espirituhanon nga mga panginahanglan ug sa pagpalambo sa inyong hugot nga pagtuo diha Kaniya. Kon kamo mag-ampo ngadto Kaniya, Siya makatabang kaninyo sa pagtino kon unsay inyong gikinahanglan ug unsa nga mga tumong ang inyong matakda.
Karong Pasko, ayaw paghulat sa usa ka tawo sa pagtagna unsay anaa sa inyong listahan sa pangandoy sa espirituhanon nga mga panginahanglan—pagtakda og mga tumong ug ihatag kadtong gikinahanglan nga mga gasa sa inyong kaugalingon! Apan usab, ayaw pagpanuko sa pagpangayo og tabang aron sa pagkab-ot sa inyong mga tumong. Ug, tungod kay kini mao ang panahon sa paghatag, pangita og mga paagi nga kamo makatabang sa pagtubag usab sa espirituhanon nga mga panginahanglan sa uban.
Ayaw kalimti ang mga Rhoeta ug mga Sam sa kalibutan. Ang mga tawo nga naglibut kaninyo tingali dili gayud masayud kon unsa ang wala nila—unsay ilang gikinahanglan aron mahimong malipayon ug makakaplag sa ilang katuyoan—gawas kon kamo mopaambit sa mensahe sa ebanghelyo ngadto kanila. Mao kana ang labing maayong gasa nga makuha ni bisan kinsa alang sa Pasko!