Lima ka tuig ang milabay, ang akong bana ug ako nakahukom nga magsugod og channel sa YouTube, diin kami nagsugod sa matinud-anong pagpaambit sa paagi nga kami nagpuyo isip mga miyembro sa ang Simbahan ni Jesukristo. Ang among ideya mao ang paghisgut kabahin sa atong mga gituohan pinaagi sa among pamaagi sa kinabuhi.
Kami adunay dako nga panalangin sa pagdawat og makadasig nga mensahe gikan sa pipila sa among mga sumusunod nga nagsulti kanamo mahitungod sa pag-adto sa simbahan sa unang higayon o gani sa pagpabunyag! Kini nga mga mensahe mipuno kanamo sa hilabihan nga kalipay.
Mapasalamaton kaayo kami alang sa mabungahon nga mga kasinatian nga gitanyag sa mga social network kanamo sa pagsangyaw sa mensahe sa gipahiuli nga ebanghelyo pinaagi sa pagpaambit lang sa among mga kinabuhi. Apan samtang ang social media makamugna og talagsaong mga kasinatian, makatabang kanato sa pagpalambo og makahuluganong mga relasyon, ug magtugot kanato sa pagpaambit sa atong pagpamatuod sa ebanghelyo, kini usab makahatag kanato og mga kasinatian nga makapahuyang kanato sa espirituhanong paagi, modala kanato sa paghukom sa uban sa dili matarung nga mga paagi, ug makalimot kon si kinsa gayud kita.
Ang seksyon sa mga young adult karong bulana maghisgut niadto nga mga hilisgutan ug uban pa. Sayon ang pagkumpara sa atong kaugalingon o sa atong mga kinabuhi sa unsay atong makita diha sa social media, apan kita makakat-on sa paggamit sa social media sa paghimo og positibo nga kahimtang diin kita makapugong sa paghukom sa atong kaugalingon o sa uban, makaangkon og pagsalig sa atong diosnong kinaiya, ug labing importante, ipasabut ngadto sa uban, pinaagi sa atong ehemplo, ang kalipay nga gidala sa ebanghelyo ni Jesukristo.