Mga Young Adult
Ang Reyalidad luyo Niadtong mga Profile nga Nindot Kaayong Pagkalitrato
Si Bárbara Rodríguez 25 anyos ug natawo sa Anzoátegui, Venezuela, diin nahimamat niya ang iyang bana. Kasamtangan silang nagpuyo sa Lima, Peru. Si Bárbara mapahinunguron nga naghimo og makapabayaw nga sulod sa ilang social network.
Kon kita mokompara sa atong kaugalingon diha sa social media, mas dako ang atong mataligam-an.
Mga litrato gihatag sa tagsulat
Dila pa lang dugay ang milabay, usa sa akong mga sumusunod sa Instagram mikomentaryo bahin sa usa ka litrato, nag-ingon, “Giunsa man ninyo nga maanyag man mo kaayong tan-awon uban sa duha ka anak, samtang ako naglisud na sa usa?” Nakakatawa dayon ko ug gustong motubag niya dungan sa litrato kon unsay akong hitsura nianang higayona.
Mitubag ko, “Nagtuo ko kanunay nga wala koy pakabana sa akong hitsura kon ikumpara sa ubang mga mama. Mao kana ang epekto sa social media—may kalagmitan kita nga mokumpara sa atong kaugalingon ngadto sa laing tawo, samtang kana nga tawo nagkumpara sa iyang kaugalingon sa lain. Apan ang reyalidad mao nga dili ko maanyag tan-awon karon, ug dili ko makaako og upload og litrato kon unsay akong hitsura. Kasagran mamustura lang ko ug ‘desenting’ tan-awon kon Biyernes ug sa Dominggo.”
Nagpaambit ko mahitungod sa among kinabuhi diha sa social media sulod sa pipila na ka tuig karon. Kadaghanan gyud, akong gipaningkamutan nga ipakita kon unsa ang “tinuod nga kinabuhi” sa mga miyembro sa ang Simbahan ni Jesukristo. Ug sa pagbuhat sa ingon, nakabaton ko og mga kasinatian nga nakaaghat nako sa paghunahuna mahitungod sa mga hiyas ug mga risgo sa social media.
Ang Social Media wala Nagpakita sa Tanang Butang
Dili kini ang unang higayon adunay tawo nga nangutana kanako sa pangutana nga sama niana. Ang nakaapan mao nga, ang social media nagpakita lamang og gamay kaayong bahin sa kinabuhi sa tawo. Sa akong kahimtang, bisan kon naningkamot ko nga magpakatinuod, imposible nga mapakita nako ang tanang butang. Ug dili kita angay nga mokumpara sa atong mga kaugalingon o ibase ang atong bili diha sa usa ka maanindot nga litrato. Ang pagkumpara, ilabi na sa social media, makapalisud kaayo sa pag-ila sa atong mga kalig-on nga hinatag sa Dios.
Isip mga Santos sa Ulahing mga Adlaw, maningkamot kita sa pagbuhat sa atong labing maayo nga mahimong sama ni Jesukristo. Apan ang kamatuoran mao nga walay usa kanato nga hingpit. Ug sa social media, kinahanglan maningkamot kita nga dili mohimo og sayop nga paghukom dili lamang kabahin sa atong kaugalingon apan ngadto usab sa uban. Kinahanglan mohinumdom kita nga bisan kon maghunahuna kita sa hingpit nga kinabuhi sa usa ka tawo, wala kita nakakita sa personal nga mga hagit nga ilang giatubang. Wala gayud kita masayud unsay nahitabo sa kinabuhi sa mga tawo lapas pa sa unsay ilang gipili nga ipaambit nga mainampingong gisala nga mga feed.
Ang Katinuod sa usa ka Litrato sa Pamilya
Sa kasagaran adunay daghan kaayong panghitabo luyo sa mga makita sa kada litrato sa pamilya nga inyong makita sa socila media. Ang ubang mga tawo mahimong motan-aw sa mga litrato ug mangutana sa ilang kaugalingon, “Nganong ang akong litrato sa pamilya dili man ingon niana kanindot tan-awon?” Apan wala kita nasayud kon unsay gikinahanglan aron makakuha kadtong “hingpit nga mga litrato”.
Sama pananglit, sa makausa misulay mi og palitrato nga pamilya human sa pagsimba. Mahimong komplikado kini sa dunay duha ka gagmay nga mga bata, apan ganahan gyud ko nga makuha kini nga higayon ug dayon matan-aw kon unsa na kadagko ang mga bata.
Samtang naningkamot kami nga mapahimutang ang mga bata alang sa pagpalitrato, kinahanglan pa ko nga mogahin og higayon sa pag-istorya sa akong dos anyos nga anak nga lalaki, si Alvin, kinsa ganahan magpakugos nako. Miduko ko, gipahiran ang iyang mga luha, ug dayon mihangyo kaniya sa pagbarug aron akong ipasigarbo ang among mga sinina (nga ako gayud nga gihunahua sa pagpares nianang buntaga). Ang akong tres anyos nga anak nga babaye, si Avril, mihangyo usab sa akong bana nga kuguson siya kay dili sab siya gustong mobarug. Dili gyud sila gusto nga magpalitrato.
Ang sesyon sa pagpalitrato wala gyud molampos—mao nga miundang nalang kami. Apan sa dihang nakauli na ko, nakakita ko og mas maayo. Ang akong igsoong lalaki (nga mao ang naglitrato) mikuha sa higayon sa dihang ang tanan kasamok nahitabo. Ang akong bana ug ako nag-am-am sa among mga anak diha sa litrato. Wala gyud kini nakapasigarbo sa among mga sinina, apan mao gyud kadto ang malumo—ug tinuod—nga higayon. Ganahan ko niini.
Sa dihang akong gipaambit ang litrato sa social media, gisulatan nako kini og “Ang reyalidad sa litrato sa pamilya.” Wala gyud nako mahunahuna nga daghan kaayong mga tawo nga nakasabut niini, apan nakapaamgo kini nako nga ang mga butang dili kanunayng kinahanglan nga hingpit tan-awon. OK ra nga mopadayon lang ug magpakatinuod. Apan nagtudlo usab kini kanako og mas dako nga leksyon—nga kon motuo kita nga ang usa ka tawo hingpit, wala lang gyud kita nakakita sa tanang detalye.
Ayaw Itugot nga ang Social Media Motabon sa Inyong Tinuod nga Pagkatawo
Ang mga network sa social media usa ka gamhanang himan nga atong magamit alang sa daghang kaayohan. Apan kinahanglan kita nga magmatngon nga dili mawad-an sa kadasig o mokumpara sa atong kaugalingon sa unsay atong makita diha sa social media. Sa giingon ni Elder Gary E. Stevenson sa Korum sa Napulog Duha ka mga Apostoles, “Unta, makat-unan nato ang pagkamas sa tinuod, makaplagan ang daghang kahimuot, ug makasinati og minos nga pagkawalay kadasig kon nag-atubang og mga hulagway nga nagpakita og gimithi nga reyalidad ug nga sa kasagaran modangat sa makaluya nga mga pagtandi.”1
Nasayud ko nga kon atong hinumduman ang atong balaan nga kinaiyahan isip mga anak sa Dios, dili kita magbilin og luna alang sa sakit nga mga pagkumpara o personal nga mga paghukom. Ug kon mohunong kita sa pagpaminaw sa mga pagkumpara nga mosulay sa pagsaway sa atong mga potensyal, makahimo kita sa pagpakabuhi ngabuhong nga walay kabalaka mahitungod sa tanan niadtong post nga ingon og litratong hingpit.