Maisugon nga mga Ehemplo
Usa ka Gasa sa Panaghigalaay
Kini nga istorya nahitabo didto sa England wala madugay pagkahuman sa Ikaduhang Gubat sa Kalibutan.
Si Hermann Mössner gikulbaan samtang siya misulod sa chapel. Siya ug ang iyang mga higala gikan sa kampo nagsul-ob pa gihapon og mga uniporme, gimarkahan sa mga letra nga “P.O.W.” Ang tanan nasayud sa kahulugan niadto nga mga letra nga mao ang “prisoner of war [binilanggo sa gubat].” Unsa kaha ang hunahunaon sa mga miyembro sa branch? Motan-aw ba sila niya isip ilang kaaway?
Ang chapel duol ra sa Leeds, England. Apan si Hermann dili taga England. Gikan siya sa Germany. Human napugos sa pagpakig-away sa Ikaduhang Gubat sa Kalibutan, si Hermann nadakpan sa mga sundalo nga British ug gipadala ngadto sa usa ka prisohan sa English nga kampo. Mao kini ang iyang unang higayon diha sa simbahan sa dugay na nga panahon.
Si Hermann miginhawa og lawom samtang milingkod siya sa usa sa mga lingkuranan. Iyang nakita ang presidente sa branch, si George Camm, naglingkod sa atubangan. Si Presidente Camm higala ni Hermann. Ang makita siya nga mipahiyom nakapaayo sa gibati ni Hermann.
Pipila ka bulan ang milabay, si Presidente Camm miabut aron sa pagbisita ni Hermann sa kampo human makadungog nga siya lang ang miyembro sa Simbahan didto. Sa sinugdanan si Hermann medyo nabalaka. Masilag ba kaha niya si Presidente Camm? Ang ilang mga nasud nakig-away batok sa usag usa diha sa gubat, human sa tanan.
Apan sa dihang nagkahimamat si Hermann ug si Presidente Camm, mipahiyom sila ug naglamanohay. Dayon nagdungan sila sa pag-ampo. Nanganta sila ug naghisgot mahitungod sa ebanghelyo. Nagdungan pa gani sila sa pag-ambit sa sakramento.
“Gihigugma ko ikaw, akong igsoon,” miingon si Hermann sa dihang si Presidente Camm kinahanglan nang mobiya. Nakita niya ang mga luha sa mga mata ni Presidente Camm samtang miwara-wara siya sa pagpanamilit.
Human niana, si Presidente Camm mibisita ni Hermann matag Sabado. Atol sa tibuok semana, si Hermann mibuhat sa iyang labing maayo sa pagsunod sa ebanghelyo. Mipaambit siya sa iyang pagpamatuod uban sa laing mga piniriso samtang mitrabaho sila sa umahan. Mitubag siya sa ilang mga pangutana samtang naglalik sila og kahoy human sa taas nga trabaho sa adlaw. Usahay mag-ampo siya uban kanila.
“Oy, Hermann,” usa sa mga piniriso miingon usa ka gabii niana. “Mahimo ba ko nga mouban nimo ug ni Mr. Camm sa Sabado?”
Mihangad si Hermann gikan sa bloke sa kahoy nga iyang gilalik. Mipahiyum siya. “Siyempre!”
“Pwede ako sab?” laing binilanggo nangutana.
Sila si Hermann ug Presidente Camm naghinam-hinam kaayo sa pagtudlo og dugang pa nga mga piniriso. Wala madugay ang uban nila gusto pa gani nga magpabunyag!
Ug karon, samtang si Hermann mitan-aw sa palibut sa chapel sa mga pamilya nga naghulat sa pagsugod sa simbahan, mibati siya og kalinaw. Ang pipila ka mga miyembro nakulbaan diha sa palibut ni Hermann sa sinugdanan. Apan sa wala madugay ang tanan misalig na kaniya. Ang ubang mga piniriso nga gustong makat-on mahitungod sa ebanghelyo nakakuha og pagtugot sa pagbiya sa kampo aron moadto sa simbahan kuyog ni Hermann ma-Dominggo. Sa kadugayan, si Herman natawag pa gani nga mahimong presidente sa Sunday School sa branch.
Milabay ang panahon, ug ang Pasko nagkaduol na. Gusto ni Hermann nga magbuhat og usa ka butang aron mopasalamat sa mga miyembro kinsa mabination kaayo niya. Dayon nakahunahuna siya og ideya! Hapit na ang panahon sa party sa Pasko sa branch. Nagpundok si Hermann og daghang bloke sa kahoy ug misugod sa paglalik. Sa tagsa-tagsa, gihimo niya ang mga bloke ngadto sa gagmayng trak-trak, mga elepante, eroplano, tren-tren, ug mga kabayo-kabayo.
Sa katapusan miabut ang adlaw sa party. Ang tanan nangaon ug nanganta og mga awit sa Pasko. Si Hermann ug iyang mga higala gikan sa kampo mikanta og awit sa Pasko sa pinulongan nga German.
Dayon si Hermann mikuha og usa ka dakong bag. Ang sulod 40 ka mga dulaan nga kahoy! Mihatag si Hermann og usa sa matag bata sa Primary. Mao kadto ang Pasko nga dili nila mahikalimtan.