“ʻOku ʻI Ai [Maʻu Pē] ʻa e ʻAmanaki Leleí,” Liahona, Sepitema 2022.
ʻOku Talitali Lelei Kimoutolu ki he Makasini ko ʻEní
ʻOku ʻI Ai [Maʻu Pē] ʻa e ʻAmanaki Leleí!
Neongo pe ko e hā ʻa e ngaahi faingataʻa ʻoku tau fehangahangai mo iá, ko Sīsū Kalaisi ʻa hotau ʻamanaki leleiʻangá. ʻOku fokotuʻu ʻe ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e kaveinga ʻo e makasini ʻo e māhina ní ʻaki ʻa e foʻi moʻoni fakaʻofoʻofa ko ia ʻi heʻene fakamatala foʻou ko e, “ʻAmanaki Lelei mo e Fakafiemālie ʻia Kalaisí” (peesi 4).
Ki he mātuʻa tokolahi, ʻoku fie maʻu ʻa e pōpoaki ʻo e ʻamanaki leleí tautautefito ʻi heʻenau fai honau lelei tahá ke ohi hake ha fānau ʻi ha māmani faingataʻa. Ne akoʻi ʻe Palesiteni Lāsolo M. Nalesoni: “ʻOku fakautuutu ai pē hono ʻohofi ʻe he filí ʻa e tuí, mo kitautolu pea mo hotau ngaahi fāmilí. ʻOku fie maʻu ke tau fakafepakiʻi mo ngāue tōmuʻa leva ka tau lava ʻo hao fakalaumālie” (“Lea Fakafeʻiloakí,” Liahona, Nōvema 2018, 7). Ke poupouʻi ʻa e mātuʻá ʻi he ngāue toputapú ni, ʻoku hokohoko atu maʻu pē ʻa e Siasí ke ʻoatu ha ngaahi maʻuʻanga tokoni ʻoku fakatou ʻuhingamālie mo ʻaongá.
ʻI he makasini ʻo e māhina ní, ʻoku ou vahevahe mo hoku kaungā faʻútohí ha sīpinga ki he mātuʻá ʻokú ne fakatahatahaʻi ʻa e ngaahi tefitoʻi moʻoni ʻo e ongoongoleleí mo e ngaahi founga ngāue ʻe lava ʻo tokoni ki he mātuʻá ke fokotuʻu ha ngaahi vā fetuʻutaki mālohi mo ʻenau fānaú, tanumaki ʻenau tuí, mo fakatupulaki ʻa e uouangatahá (vakai, “Ko Ha Sīpinga Mālohi ki he Tauhi Fānaú” ʻi he peesi 10).
ʻE lava ke tataki kitautolu ʻe he Laumālie Māʻoniʻoní ki he ʻamanaki lelei mo e tokoni ʻoku tau fie maʻú. ʻOku akoʻi ʻe ʻEletā Housei A. Teiseila ʻo e Kau Fitungofulú ʻa e founga te tau lava ai ʻo maʻu ha fakahinohino lahi ange ʻo fakafou ʻi he Laumālie Māʻoniʻoní ʻi he “Fili ke Fakakaukau Fakalaumālié” (peesi 40).
ʻOku mau fakaʻamu pē ʻoku tokoni atu ʻa e makasini ko ʻení ke ke maʻu mo ho fāmilí ha ʻamanaki lelei, ongoʻi ha ʻofa lahi ange, mo aʻusia ha fiefia ʻoku lahi angé.
Fakaʻapaʻapa atu,
Maren Daines, JD
Mataotao ʻi he Tuʻutuʻuni Fakaemāmani Lahi ki he Fāmilí mo e Fakatupulaki ʻo e Polokalamá