“Ko e Fakaʻofoʻofa ʻo e Fakaʻau ke Motuʻa Angé,” Liahona, Sepitema 2022.
Faivelenga ʻi he Fakaʻau ke Motuʻa Angé
Ko e Fakaʻofoʻofa ʻo e Fakaʻau ke Motuʻa Angé
ʻE sai ange ke u maʻu ha fofonga ʻoku hā ai ʻa e ngaahi laine ʻo e katá mo e loʻimatá.
ʻOku ou manatuʻi ʻi heʻeku kei siʻí ʻa ʻeku sio ki he kouʻahe mingimingi ʻo ʻeku kui fefiné. Naʻe hā ha ngaahi laine ʻi he ngaahi tuliki ʻo hono matá, pea naʻe ʻasi mo ha ngaahi laine iiki ʻi hono loungutu ʻi ʻolungá. Naʻá ku fehuʻi ange pe ʻe lava fēfē nai haʻaku taʻofi ʻa e mingimingí.
Naʻá ne pehē mai, “ʻOua ʻe malimali. Pea ʻoua ʻe tangi.”
Naʻá ku muimui ki heʻene faleʻí—ʻi ha foʻi ʻaho pē ʻe taha. Peá u foʻi leva. ʻE lava fēfē nai ke moʻui ha taha ʻo ʻikai malimali pe tangi? Naʻá ku fakakaukau ʻe sai ange ke u maʻu ha fofonga ʻoku hā ai ʻa e ngaahi laine ʻo e katá mo e loʻimatá.
Naʻe akoʻi ʻe Līhai ʻi he Tohi ʻa Molomoná, ki hono foha ko Sēkopé ʻoku tau ʻi heni ʻi he moʻui fakamatelié ke maʻu ʻa e fiefiá (vakai, 2 Nīfai 2:25). Ka naʻá ne akoʻi foki kuo pau ke tau aʻusia ʻa e mamahí, ka tau ʻilo ʻa e fiefiá (vakai, 2 Nīfai 2:22–23). Kuó u mamata ki he fakamoʻoni ʻo e fiefiá mo e mamahí fakatouʻosi, ʻi heʻene hā mai mei he fofonga ʻo kinautolu kuo nau moʻuí. ʻOku hā ʻi honau fofongá ʻa e ngaahi talanoa ʻo ʻenau moʻuí.
ʻOku ou tui tatau mo e tokotaha naʻá ne pehē, “Ko e kakai matuʻotuʻa fakaʻofoʻofá ko e ngaahi ngāue fakaʻaati.”1 ʻOku fakatupulaki ʻe ha kakai ʻe niʻihi ha ʻulungaanga ʻi he fakaʻau ke motuʻa angé ʻokú ne ʻai kinautolu ke nau fakaofo. Hangē ko ʻení, kuó u sio fakamamaʻu ki he fofonga ʻo e kau metuloni ʻulu hinā mo vala hinehina ʻi he temipalé pea naʻe ongo kiate au ʻa e maama fakaofo ʻoku malama mei honau fofongá mo malama mei honau fofonga malimalí.
ʻI heʻeku hoko ko ʻeni ko ha fefine matuʻotuʻa angé, ʻoku ou ako ai ʻoku ʻi ai ha ngaahi fiefia pau ʻoku maʻu ʻi he fakaʻau ke motuʻa angé. Hangē ko ʻení, kuó u ongoʻi fiemālie ange ʻi hoku sinó. ʻOku ou houngaʻia pē ʻi heʻene kei ʻaongá! Mahalo ʻoku ou lue māmālie ange mo lea māmālie ange ʻi he taimí ni ʻi he toe taimi kimuʻá. Mahalo ʻoku kiʻi sino ange hoku ongo vaʻé, pea molū ange hoku ongo nimá. Ka ʻoku ou saiʻia ke fakakaukau ʻoku molū ange foki mo ʻeku alá.
ʻOku ou ʻilo te u kei lava pē ʻo fakalakalaka mo ako, he “ʻilonga ha tefito ʻo e potó ʻoku tau lava ʻo maʻu ʻi he moʻui ko ʻení, te tau toe tuʻu hake pē mo ia ʻi he toetuʻú” (Tokāteline mo e Ngaahi Fuakava 130:18). Ko ia ai, ʻoku ou hanganaki fiefia atu ki he ngaahi lēsoni te u kei lava pē ʻo akó. ʻIkai ko ia pē, ka te u lava ʻo tokoni ki he niʻihi kehé—hangē ko hoku makapuná—ke ako mei he ngaahi talanoa ʻo ʻeku moʻuí te u lava ʻo vahevahe mo kinautolú.
Fakatātaaʻi ʻe ha ongo mōtolo
ʻOku ou lava ange mo hoku husepānití ʻo fepoupouʻaki mo ʻiloʻi te ma kei lava pē foki ʻo ako mo tupulaki fakataha. Kuo fakaʻau ke toe lelei ange ʻema nofo-malí koeʻuhí ko e ngaahi matangi mālohi kuó ma fehangahangai fakataha mo iá. Kuo tupu hake ʻema fānaú ke fakafiefiaʻi pe fakatupu loto-hohaʻa kiate kimaua, kae fakafalala pē ki he ʻahó. ʻOku ʻomi ʻe he makapuná ha fiefia moʻoni mo e nēkeneka.
Pea ʻi he fakalau atu ʻa e taimí, ʻoku ʻiloʻi ai ʻoku ʻikai tolonga ʻa e moʻui fakamatelié ʻo taʻengata. Ko e taimi ʻeni ke fai ai ʻa e ngaahi meʻa ne u palani ke faí. Kapau ʻoku ʻikai ko e taimí ni, ko ʻa fē nai? “ʻIo, vakai ko e ʻaho ʻo e moʻui ní ko e ʻaho ia ke fai ai ʻe he kakaí ʻa ʻenau ngaahi ngāué” (ʻAlamā 34:32). Fakatauange pē, ʻoku tau ʻiloʻi ʻi heʻetau taʻu motuʻá ko e taimi pē ʻeni ke puʻaki ai ʻa e ngaahi lea ʻoku ʻikai ke lea ʻakí, fakaleleiʻi ʻa e ngaahi vā fetuʻutakí, mo lavaʻi ʻa e toenga ʻo e ngaahi taumuʻá.
ʻI heʻeku matuʻotuʻa angé, ʻoku ou fakakaukau ki he tukufakaholo te u tuku ki hoku hakó. ʻOku ou fakatauange ko hono konga ʻe tahá ko e taimi naʻá ku aʻusia ai ʻa e fiefiá mo e mamahí, naʻá ku maʻu ai ʻa e potó. Pea koeʻuhí ko ia, naʻá ku maʻu ai ʻa e fakaʻofoʻofa ʻi he fakaʻau ke motuʻa angé.
ʻOku nofo ʻa e taha naʻá ne faʻú ʻi Kalefōnia, USA.