Fakakomipiuta Pē
Ko Hono ʻIloʻi ʻEku Kui Tangata Hono Tolú ʻi Heʻeku Ngāue Fakafaifekaú
Lolotonga ʻeku ngāue fakafaifekau ʻi ha feituʻu fakahisitōlia, naʻe tokoni ha ueʻi fakalaumālie ke u ongoʻi ofi ki heʻeku kuí.
Faitā ʻa Valerie Ann Anderson
ʻI ha pongipongi Sāpate ʻe taha, naʻá ku maʻu ai ha tohi ʻi he ʻīmeilí mei he FamilySearch. Naʻe lave ai ʻo kau ki heʻeku kui tangata hono tolú, ʻa Tōmasi Sefasoni Teasoni. Naʻá ku ʻilo ai naʻe tanu ia ʻi Seni Siaosi, ʻIutā, USA, ʻa ia naʻá ku hoko ai ko ha faifekau ʻi he feituʻu fakahisitōlia ko iá. ʻI heʻeku toe vakavakai holo ʻi heʻeku fuʻu ʻakau fakafāmilí, ne u ʻilo ai naʻe hiki ʻa Tōmasi ki Seni Siaosi ʻi he 1880 ʻi hono taʻu 75 ke ofi ki he Temipale St. George Utah. Naʻá ku toe ʻilo foki naʻe langa ʻe Tōmasi ha taha ʻo e ngaahi fuofua fale paini ʻi Seni Siaosí. Naʻá ku fiefia mo mālieʻia koeʻuhí he naʻe foʻou kotoa e ngaahi fakaikiiki ko ʻení kiate au he naʻe pē ʻeku ʻiló ʻi he hingoa ʻo Tōmasí.
Naʻá ku fie kumi hono maka fakamanatú ʻi he ʻaho hono hokó. ʻI he kamataʻanga ʻo e ʻahó naʻá ku pehē ai, “Ta tali ke ta toki ʻalu hili ʻeta ngāue ʻi he Fale ʻo Sēkope Hemiliní” (ko e taha ʻo e ngaahi feituʻu fakahisitōlia ne u ngāue aí). Hili ha taimi nounou mei ai naʻá ku ongoʻi naʻe ueʻi au ke u pehē, “Ta ō he taimí ni.”
ʻI he vakai ki ha fakatātā ʻo e maka fakamanatu ʻo Tōmasí ʻi he FamilySearch.org, naʻe fakaʻohovale ʻa e faingofua ke maʻu ʻa e maka fakamanatú. Lolotonga ʻeku tuʻu ʻi he tafaʻaki ʻo e maka fakamanatú, ne u fakatokangaʻi atu ha fefine naʻá ne fakavave mai kiate au. Naʻá ma ʻilo ai ʻi he maka fakamanatu ʻo ʻema kuí, naʻá ma kāinga. Naʻá ma fāʻofua, kakata, mo faitā fakataha. Naʻá ku ongoʻi naʻe tataki au ʻe he Laumālie Māʻoniʻoní, tautautefito ʻi he taimí, ke u aʻu ki he faʻitoká kimuʻa pea mavahe hoku kāinga foʻou ko Sūsaná mei he faʻitoká.
Naʻá ku mavahe mei he faʻitoká ʻi he loto-vēkeveke ke ʻalu hangatonu ki he tuʻasila ne lisi ʻi he FamilySearch ʻa ia ne nofo ai ʻeku kui tangata hono tolú. Naʻe tuʻu ai hono ʻapí. Ko e taʻu ʻaki ʻeni ʻe 140 mei heʻene kamata langa ʻa e ʻapí. ʻI heʻeku sio ki hono falé, naʻá ku maʻu ha ongo māfana mo e ʻofa taʻeʻamanekina ki heʻeku kui tangata hono tolú.
Naʻe fakapapauʻi ʻe ha tātongitongi ʻi muʻa ʻi he konga ʻapí ko e ʻapi ʻeni naʻá ne langá. Lolotonga ʻeku lau e tātongitongí, naʻe fakaʻuli mai e tokotaha ʻaʻana e ʻapí mei he tauʻanga meʻalelé. Naʻá ne tuʻu peá u talaange ko e mokopuna tolu au ʻo e tokotaha naʻá ne langa e ʻapi ko ʻení. Naʻe angaʻofa mai e tangatá ke fakaʻaliʻali mai e ʻapí. Ne u lava ʻo sio mo ala ki he ʻapi ʻo ʻeku kui tangata hono tolú ʻa ia naʻe fāʻeleʻi ʻi he 1805.
Naʻá ku lue ʻi he faliki paini motuʻa ʻi he loto falé. Naʻá ku sio atu ʻi he ngaahi matapā sioʻata totonú. Naʻá ku kaka hake ʻi ha ngaahi sitepu fakahisitōlia māʻolunga ki he fungavaka hono uá. ʻI he lōngonoá, ne u fakakaukauloto atu ki he maʻu meʻatokoni, mohe, mo e ako ʻe heʻeku ngaahi kuí e ongoongoleleí ʻi he ʻapi ko ʻení. Kapau naʻá ku aʻu tōmui atu ʻi ha ngaahi miniti, naʻe ʻikai ke mei fakaafeʻi au ki he ʻapi naʻe nofo ai ʻa Tōmasí. Ne tāpuekina au ʻe heʻeku Tamai Hēvaní ʻi ha ngaahi founga lahi ʻi heʻeku ʻaʻahi ki he ʻapi ʻo ʻeku kui tangata hono tolú pea ne u ongoʻi vāofi ange mo ia ʻo laka ange ʻi ha toe meʻa ne u ʻamanaki ki ai.
Naʻá ku fakakaukau ki he ngaahi lea ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku fakaafeʻi mo tokoniʻi kitautolu ʻe heʻetau loto-holí, faivelengá, pea mo ʻetau talangofuá ke tau ʻiloʻi ʻa ʻEne ngaahi ʻaloʻofa ongongofuá ʻi heʻetau moʻuí. … Te tau lava ke maʻu ha mata ke ʻiloʻi lelei mo ha telinga ke ongoʻi e ngaahi ʻaloʻofa ongongofua ʻa e ʻEikí ʻi heʻenau fakamālohia mo tokoniʻi kitautolu he ngaahi ʻaho fakaʻosí ni.”1
ʻI ha houa pē ʻe 24, naʻá ku fakafehokotaki ai mo ʻeku kui tangata hono tolu ko Teasoní. Naʻá ku ako ʻo ʻilo ki heʻene talangofuá, ngaahi feilaulaú, mo ʻene ngaahi lavameʻá. Naʻe hoko ʻa e FamilySearch ko ʻeku maʻuʻanga tokoni ke ako ai fekauʻaki mo iá, ka naʻe fakafehokotaki au ʻe he fanafana ʻa e Laumālié ki hoku tukufakaholó. Naʻe fakamālohia au ʻe he ʻofa naʻe fakahaaʻi mai ʻe heʻeku Tamai Hēvaní pea ʻe nofo ia ʻi heʻeku manatú ʻo taʻengata. ʻOku ou ʻilo ko e ngaahi meʻa ne hokó mo e fakaikiiki hoku ʻahó ko ha ngaahi tāpuaki ia mei he ʻEikí.