Haʻu, ʻo Muimui ʻIate Au

ʻĪsaia 13–14; 24–30; 35

Ko e Hā ʻOku Akoʻi Kiate Au ʻe he Ngaahi Tohi ʻa ʻĪsaiá fekauʻaki mo Sīsū Kalaisí?

Naʻe hiki ʻa e ngaahi lea ʻa ʻĪsaiá ʻi he taʻu ʻe 2,700 nai kuohilí, pea ʻoku hangē ʻoku taulōfuʻu pe fakapuputuʻu ia kiate kitautolu ʻi he taimi ʻe niʻihi. Ka, ko e lau mei he tohi ʻa ʻĪsaiá ko e taha ia ʻo e ngaahi founga lelei taha te tau lava ai ʻo ako lahi ange fekauʻaki mo Sīsū Kalaisí. Naʻe fakaʻaongaʻi ʻe Nīfai ʻa e lea ʻa ʻĪsaiá koeʻuhí ke ne lava ʻo “fakalotoʻi kakato ange ʻapē [ʻa e kau Nīfaí] ke nau tui ki he ʻEiki ko honau Huhuʻí” (1 Nīfai 19:23). Ke mahino lelei ange ʻa ʻĪsaiá, feinga ke tukutaha hoʻo tokangá ki hoʻo ako ʻi he ngaahi akonaki ʻa ʻĪsaia fekauʻaki mo e Fakamoʻuí.

Kumi ʻa e tali ki he ngaahi fehuʻi ko ʻení ʻi hoʻo ako ʻa e ngaahi vahe ko ʻení:

• ʻOku fakafofongaʻi fēfē nai ʻe ʻIliakimi ʻa Sīsū Kalaisí? (Vakai, ʻĪsaia 22:20–25.)

• Ko e hā ʻe fakahoko ʻe Kalaisi maʻatautolu ʻi he Toetuʻú? (Vakai, ʻĪsaia 25:8.)

• ʻOku akoʻi fēfē nai ʻe Kalaisi Hono kakaí? (Vakai, ʻĪsaia 28:10.)

• ʻOku fakamatalaʻi fēfē nai ʻe ʻĪsaia ʻa hono Fakafoki Mai ʻo e ongoongolelei ʻo Sīsū Kalaisí ʻi he ngaahi ʻaho fakaʻosí? (Vakai, ʻĪsaia 29:14.)

• ʻE fēfē nai ʻi he taimi ʻe toe hāʻele mai ai ʻa e Fakamoʻuí? (Vakai, ʻĪsaia 35:10.)

“Naʻe lea tuʻo lahi ʻa ʻĪsaia ʻo kau ki he ivi tākiekina faifakamoʻui mo fakafiemālie ʻo e ʻEikí. … ʻOku hanga ʻe Hono Laumālié ʻo fakamoʻui; fakaleleiʻi; fakafiemālieʻi; mo foaki ha moʻui foʻou ki he ngaahi loto kuo mole ʻa e ʻamanakí. ʻOku ʻi ai ʻa e mālohi ke liliu ʻa e meʻa kotoa pē naʻe palakū mo kovi mo taʻeʻaonga ʻi he moʻuí ki ha meʻa ʻoku fakaʻeiʻeiki mo nāunauʻiá. ʻOkú Ne maʻu ʻa e mālohi ke liliu ʻa e efuefu ʻo e moʻui fakamatelié ki he ngaahi meʻa fakaʻofoʻofa ʻo ʻitānití” (Tad R. Callister, The Infinite Atonement [2000], 206–7).