“Tamai, Kātaki ʻo Tokoni Mai,” Liahona, Sepitema 2022.
Fakakomipiuta Pē: Ngaahi ʻAta ʻo e Tuí
Tamai, Kātaki ʻo Tokoni Mai
ʻI he momeniti naʻa mau mamata ai ki he ʻalu hifo ʻa e tokotaha naʻá ne fakatātaaʻi ʻa Sīsū Kalaisí mei he langí, naʻá ku ʻiloʻi ko e Fakamoʻuí ʻa e tali ki hoku ngaahi faingataʻaʻiá.
ʻI Siulai 2021, ne u maʻu ai e tāpuaki ke kau ʻi he fakatokolahi ki he kau ʻeti faiva ʻo e ngaahi vitiō foʻou ʻo e Tohi ʻa Molomoná, naʻe fakafaivaʻi ʻi he ʻotu moʻunga fakahahake ʻo Sipilingivila, ʻIutā, USA. Naʻa mau fakafaivaʻi ha ngaahi meʻa naʻe hoko hili ʻa e “fuʻu fakaʻauha lahi mo fakaʻulia” (vakai, 3 Nīfai 8:11–12) ʻi he Maama Foʻoú, ʻa ia naʻe fakamoʻoni ki hono Tutuki ʻo e Fakamoʻuí ʻi he Maama Motuʻá.
Lolotonga e ʻeti faivá, naʻe tokoto falemahaki hoku tuongaʻane lahi ko Pailoní ʻi Kalefōnia, USA, kae tokoto falemahaki hoku mokopuna fefine ne toki fāʻeleʻí ʻi Sōleki Siti, ʻIutā. Naʻe ofi ke mālōlō ʻa Pailoni mei he kanisaá, pea naʻe ʻikai ʻamanaki ʻe moʻui hoku mokopuna fefiné, ʻa ia ne fāʻeleʻi mai pē mo ha palopalema lahi.
ʻI heʻema aʻu atu mo hoku husepānití ki homa mōtelé hili e ʻaho hono ua ʻo e ʻeti faivá, naʻe tā mai hoku taʻoketé naʻá ne hohaʻa fekauʻaki mo Pailoni.
Naʻá ne pehē, “ʻOku ʻikai ke u ʻilo pe ko e hā e meʻa ʻoku hokó. ʻOku ʻikai tali ʻe Pailoni ʻene telefoní pe ngaahi tohi ʻoku fakahoko ki aí.”
Naʻá ku vāofi taha mo Pailoni ʻi hoku ngaahi tokoua mo e tuongaʻane ʻe toko nimá. Ko ia naʻe fika uá, pea ko au naʻe siʻisiʻi tahá. Naʻá ne faʻa tokangaʻi au ʻi heʻeku kei siʻí. Ne mau tupu hake ʻi ha ngaahi ʻātakai masiva ʻi Kuatemala. Naʻe ʻikai haʻamau televīsone, ka naʻa mau fetokoniʻaki. Naʻa mau masiva, ka naʻa mau fiefia.
Naʻá ku ʻofa kia Pailoni ʻi heʻene hiki ki he ʻIunaiteti Siteití, mo e fakaʻamu ke tokoni fakapaʻanga mai ki homau fāmilí. Naʻá ne maʻu ha ngāue ko ha fakaʻuli pasi ki ha kautaha takimamata. Hili ha ngaahi taʻu lahi mei ai, naʻá ku hiki ki he ʻIunaiteti Siteití, mali pea kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Hili hoku papitaisó, naʻe kau foki mo ʻeku ongomātuʻá ki he Siasí. ʻI heʻeku nofo mo hoku husepānití ʻi he fakatonga ʻo ʻIutaá, naʻá ku fetaulaki mo Pailoni ʻi he taimi kotoa pē naʻá ne ʻomi ai ha kau folau ʻeveʻeva ki he ngaahi senitā takimamata ʻi he Temipale St. George Utah mo e Temipale Salt Lake.
“Ko ha Meʻa Mātuʻaki Makehe”
ʻI heʻeku talanoa kia Pailoni fekauʻaki mo e Siasí, naʻá ne talamai, “ʻOku maʻu ʻe he Kau Māʻoniʻoni ʻi he Ngaahi ʻAho Kimui Ní ha meʻa mātuʻaki makehe. ʻI he taimi ʻoku ou talanoa ai mo e kakai ʻi he ngaahi senitā takimamatá, ʻoku ou ʻilo ai ko ha kakai lelei mo anga fakakaumeʻa kinautolu.” Naʻá ne loto lelei ke talanoa mo e ongo faifekau taimi kakató, ka naʻá ne ngāue maʻu pē pea ʻikai ke faʻa ʻi ʻapi.
Ne tuʻo ua e ola lelei ʻa e faitoʻo ʻo Pailoni ʻi he kanisā ʻa e tiupi meʻakaí. Ka ʻi he 2020, naʻá ne toe puke ʻi he kanisaá. ʻI Sune ʻo e 2021, ne mālō pē ʻene sai feʻunga ke fononga ki Kuatemala ʻi ha fakataha fakafāmili naʻe feʻunga mo ha māhina ʻe taha. Naʻe mālōlō ʻemau tangataʻeikí he konga kimuʻa ʻo e taʻu ko iá, pea ne mālōlō ʻemau faʻeé ʻi he 2015, hili ia ha taʻu ʻe fā ʻena sila ʻi he Temipale Guatemala City Guatemalá. Naʻe fakaʻamu ʻa Pailoni ʻi he faʻa lotu ke sio fakaʻosi ki hono ngaahi tokouá mo e tuofāfiné.
Hili ha uike ʻe ua mei heʻene foki ki Kalefōniá, naʻá ne tokoto falemahaki. ʻOkú ne tokoni he taimi ní, teʻeki ke toe ake.
Naʻe pau ke u nofo mei he fakataha fakafāmilí he naʻe fiemaʻu ʻe hoku ʻofefine ko ʻEnisií ʻeku tokoní mo e poupoú. ʻI he ʻaho 3 ʻo Suné, naʻe fāʻeleʻi ai ʻene fuofua pēpē ko ʻĀfiná, mo e diaphragmatic hernia (ava e uoua ʻoku tokoni ki he mānavá). Naʻe tafa ia ʻe he kau toketā faitafá ʻi he ʻosi ha ʻaho ʻe tolu mei ai. Naʻe ʻikai ke nau ʻamanaki te ne moʻui.
Meʻamālié, naʻá ku ofi ai mo hoku husepānití lolotonga e taimi faingataʻa ko ʻení. ʻI he ʻosi ʻeku ngāue ki he vitiō ʻo e Tohi ʻa Molomoná ʻi he hoʻatā kotoa pē, naʻe mālōlō mai ʻa ʻEnisī mei heʻene tauhi ʻi falemahakí ʻo kau fakataha mo kimaua ʻi he mōtelé, peá ma fakafiemālieʻi mo lotua ia mo ʻĀfina.
“ʻOku Sai Pē e Meʻa Kotoa”
ʻI heʻeku aʻu atu ki he feituʻu faiʻanga faivá ʻi he ʻaho hili ʻa e tā telefoni mai hoku taʻoketé, naʻá ku ongosia mo loto-mamahi. Naʻá ku lotu ʻo pehē, “Tamai, fakamolemole ʻo tokoniʻi au. ʻOku lahi ha ngaahi meʻa faingataʻa ʻoku hoko ʻi heʻeku moʻuí.”
Kimuʻa pea fakatahataha ʻa e kau ʻeti faivá mo e kau fakatokolahí ke fakatātaaʻi ʻa e konga ne hāʻele hifo ai ʻa e Fakamoʻui ne toetuʻú mei he langí (vakai, 3 Nīfai 11:8), ne talamai ke mau fakakaukau kiate Ia mo ʻEne mahuʻinga kiate kimautolú. ʻI heʻeku feinga ke tukutaha ʻeku tokangá ki he Fakamoʻuí lolotonga e meʻa naʻe hokó, naʻe taki ʻeku fakakaukaú ki hoku fāmilí. Naʻá ku sioloto atu ki heʻeku tamaí, faʻeé, mo Pailoni. ʻI he momeniti pē ko iá, ne u fanongo ki he leʻo ʻo Pailoní.
Naʻá ne pehē mai, “Oku sai pē e meʻa kotoa. ʻOku ou sai pē.”
Ne u ongoʻi ha ʻamanaki lelei mo ha fakafiemālie moʻoni, ʻo hangē ne u ʻi ai tonu he fonua ko Mahú ʻi he hāʻele mai ʻa Sīsū ke akoʻi mo fakamoʻui e kakaí, ʻo fakahā ange Hono sinó. Naʻá ku ʻiloʻi ko Ia ʻa e tali ki hoku ngaahi faingataʻaʻiá, naʻá Ne ʻi ai mo e Tamaí ke tokoniʻi au, pea ʻoku ʻi ai e ʻuhinga ʻoku hoko ai e ngaahi meʻá.
ʻI he pō ko iá, naʻá ku ʻilo ai kuo ʻave ʻe he ʻOtuá ʻa Pailoni ki ʻapi. ʻOku ou houngaʻia ʻi he tui ʻoku ou maʻu te u toe feʻiloaki ai mo ia mo ʻeku ongomātuʻá. ʻOku ou houngaʻia foki ʻi he fanongo mai ʻa e ʻOtuá ki heʻemau ngaahi lotu maʻa ʻĀfiná. Hili haʻane fakaakeake ʻi ha ʻaho ʻe 88 ʻi he loki vakaiʻi ʻo e fānau toki fāʻeleʻí, ne faifai pea mau ʻomi ia ki ʻapi.
Ko homau tokolahi ne kau ʻi he ngaahi vitiō foʻou ʻo e Tohi ʻa Molomoná, ne mau ongoʻi ʻa e Laumālié mo ha fakamālohia ʻo ʻemau fakamoʻoní. ʻI heʻeku fakakaukau ki he aʻusia ko iá mo vakai ki he kahaʻú, ʻoku ou fehuʻi loto pē, “ʻOku ou fai nai ʻa e meʻa kotoa pē te u lavá ke teuteu ki he Hāʻele ʻAngaua Mai ʻa e Fakamoʻuí pea mo taau ke ʻi Hono ʻaó?”
Naʻe hoko ʻeku kau ʻi he ngaahi vitioó ko ha tāpuaki maʻongoʻonga ʻi heʻeku moʻuí. ʻOku ou ʻilo ʻe faitāpuekina foki mo e niʻihi kehé ʻi heʻenau lau e Tohi ʻa Molomoná mo mamata ʻi he ngaahi vitiō ʻo e Tohi ʻa Molomoná.