“Ko ʻEku Tali mei he Tohi ʻa Molomoná,” Liahona, Sepitema 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ʻEku Tali Mei He Tohi ʻa Molomoná
Naʻá ku feinga mālohi ke “fakaleleiʻi” ʻa Mama Uongi, ka ko e meʻa pē naʻá ne fie maʻú ko e folofola mahinongofua, mo mālohi ʻa e ʻOtuá.
Mama Uongi mo ʻEni
Laʻitā ne maʻu ʻi he angalelei ʻa e tokotaha naʻá ne faʻú
Hili hono papitaiso au ʻi Sune 2002, ne u vahevahe ʻeku tuí mo ʻeku faʻeé. Neongo naʻá ku faʻa maʻulotu fakataha mo Mama Uongi, ka naʻe ʻikai ke ne fie ako lahi ange.
Ne faifai, pea fili ʻa Mama Uongi ʻi ha hili ha taʻu ʻe 10 mei ai ke ne papitaiso. Ne u fiefia ʻaupito. Ko e meʻa fakamamahí, ʻi he hili ha ngaahi taʻu siʻi mei ai, naʻe tuku ʻene fakamālohia ʻene fakamoʻoní peá ne kumi ʻuhinga ʻi he ʻikai ke ne ʻalu ki he lotú.
Naʻá ku tapou kiate ia ke haʻu ki he lotú, ka ko e meʻa pē ne fakatupu aí ko e fakakikihí. Ne faifai, pea tuku ʻeku teke iá ke ʻoua naʻá ku maumauʻi homa vā fetuʻutakí.
ʻI he lolotonga ʻo e konifelenisi lahi ʻo ʻOkatopa 2019, naʻe fakaafeʻi ʻe Palesiteni Lāsolo M. Nalesoni ʻa e kāingalotu ʻo e Siasí ke nau “fokotuʻutuʻu [haʻatau] palani pē [ʻatautolu]” ke fakamālohia ʻetau fakamoʻoni ki hono Fakafoki Mai ʻo e Ongoongoleleí.1 ʻI heʻeku fakakaukau ki heʻene fakaafé, naʻá ku ongoʻi mālohi ʻoku totonu ke u fai ha meʻa ke toe lelei ange ai hoku vā fetuʻutaki mo Mama Uongí.
ʻI heʻeku tukupā ki he Taʻu Foʻoú, naʻá ku fakatukupaaʻi au ke u lau ʻa e Tohi ʻa Molomoná mo Mama Uongi. ʻI he taimi kotoa pē naʻá ne pehē ai ʻoku mamahi hono matá, naʻá ku talaange, “Te ke lava pē ʻo fanongo.” ʻI he taimi naʻá ne talamai ai ʻoku fie maʻu ke ne fufulu ʻa e ʻū peletí, naʻá ku muimui kiate ia ki peito mo hoko atu pē ʻeku lau leʻolahí.
Tā ko ē naʻe fakafanongo lelei pē ki ai ʻa Mama Uongi mo manatuʻi ʻa e meʻa naʻá ku laú. Naʻe ʻalu pē taimí, naʻá ne fili ke laukonga ʻiate ia pē. Naʻá ne toki talamai kimui ange naʻe ʻikai mei lava ʻe ha tangata angamaheni ʻo hiki ʻa e Tohi ʻa Molomoná. Naʻe ʻikai haʻane toe veiveiua ko e tohí ko e folofola ia ʻa e ʻOtuá. Kiate aú, ʻi heʻeku vakai ki heʻene hiki mei he ʻikai tokangá ki he lau mo fai ʻene fakamoʻoni ki he Tohi ʻa Molomoná, ko ha mana ia.
Hili hono papitaiso ʻo Mama Uongí, naʻá ku hohaʻa naʻá ne kau ki he Siasí koeʻuhí pē ko au. Ka ʻokú ne maʻu ʻi he taimí ni haʻane fakamoʻoni pē ʻaʻana. Naʻá ku feinga ʻi ha ngaahi taʻu lahi ke “fakaleleiʻi” ia, ka ko e meʻa pē naʻá ne fie maʻú ko e folofola mahinongofua mo mālohi ʻa e ʻOtuá.
ʻOku ou fakamālō ki ha palōfita moʻui ʻokú ne ʻomi maʻu pē ha fakahinohino taimi totonu kiate kitautolu. Kapau te tau ngāueʻi ʻa e meʻa ʻokú ne akoʻí, ʻe muiaki mai ai ha ngaahi tāpuaki maʻongoʻonga. Naʻe fakahā mai ʻe he aʻusia ko ʻení ʻa e finangalo lahi ʻa e ʻEikí ke tāpuakiʻi kitautolú. Ko e meʻa pē naʻá ku faí ko hono lau ha ngaahi vahe ki heʻeku faʻeé mei he Tohi ʻa Molomoná. Pea toki hoko atu leva ia ʻe he ʻEikí!