“Taki ʻe he Kau Palōfita Moʻuí,” Liahona, Sepitema 2022.
Ngaahi Tefitoʻi Meʻa Mahuʻinga ʻo e Ongoongoleleí
Taki ʻe he Kau Palōfita Moʻuí
Ko e kau palōfitá ko ha kau tangata kuo ui ʻe he Tamai Hēvaní ke lea Maʻana. ʻOku nau fakamoʻoni kia Sīsū Kalaisi mo akoʻi ʻEne ongoongoleleí. ʻOku tui ʻa e kau Māʻoniʻoni ʻi he Ngaahi ʻAho Kimui Ní ki he kau palōfita ʻo e kuonga muʻá mo e onopōní fakatouʻosi.
ʻOku Folofola Mai ʻa e ʻOtuá ʻi Heʻene Kau Palōfitá
ʻOku maʻu ʻe he kau palōfitá ha fakahā mei he ʻOtuá. ʻI he taimi ʻoku ueʻi ai ʻa e kau palōfitá ke akoʻi kitautolú, ʻoku tatau pē ia mo e folofola mai ʻa e ʻOtuá kiate kitautolú (vakai, Tokāteline mo e Ngaahi Fuakava 1:38). Te tau lava ʻo falala ʻoku nau talamai ʻa e meʻa ʻoku finangalo ʻa e ʻOtuá ke tau ʻiló.
ʻOku Akoʻi ʻe he Kau Palōfitá ʻo kau kia Sīsū Kalaisi.
Mormon Abridging the Plates [Ko hono Fakanounouʻi ʻe Molomona ʻa e ʻŪ Lauʻi Peletí], tā ʻe Tom Lovell
ʻOku fakamoʻoni ʻa e kau palōfita kotoa pē kia Sīsū Kalaisi. ʻOku nau akoʻi kitautolu ko e ʻAlo Ia ʻo e ʻOtuá. ʻOku nau akoʻi kitautolu fekauʻaki mo ʻEne moʻuí, faʻifaʻitakiʻangá, mo e Fakaleleí. Pea ʻoku nau fakahā mai ʻa e founga ke tau muimui ai kiate Iá mo talangofua ki Heʻene ngaahi fekaú.
Ngaahi Fatongia ʻo e Kau Palōfitá
ʻOku akoʻi mai ʻe he kau palōfitá ʻa e ongoongolelei ʻo Sīsū Kalaisí. ʻOku nau fakamatalaʻi ʻa e ngaahi tāpuaki ʻoku tau maʻu ʻi he taimi ʻoku tau talangofua ai ki he ngaahi fekaú mo e ngaahi nunuʻa ʻoku tau maʻu kapau he ʻikai ke tau fai iá. ʻI he taimi ʻe niʻihi, ʻe ueʻi kinautolu ke nau fakamatala mai fekauʻaki mo e ngaahi meʻa ʻe hoko ʻi he kahaʻú.
Kau Palōfita ʻo e Kuonga Muʻá
Moses and the Tablets [Mōsese mo e Ongo Lauʻimaká], tā ʻe Jerry Harston
Kuo akoʻi ʻe he ʻOtuá ʻa e kakaí ʻo fakafou ʻi he kau palōfitá talu mei he kamataʻangá. ʻOku kau ʻi he kau palōfita naʻe moʻui ʻi he kuonga ʻo e Fuakava Motuʻá ʻa ʻĀtama, Noa, ʻĒpalahame, Mōsese, ʻĪsaia, mo ha niʻihi kehe. Naʻe ʻi ai foki mo ha kau palōfita ʻi he kakai ʻo e Tohi ʻa Molomoná. Naʻe kau ʻi he kau palōfita ko ʻení ʻa Līhai, Mōsaia, ʻAlamā, mo Molonai. Te tau lava ʻo ako ʻa e meʻa naʻa nau akoʻí ʻi heʻetau lau ʻa e folofolá.
Kau Palōfita ʻo Onopōní
Ko Siosefa Sāmita ʻa e ʻuluaki palōfita ʻi he onopōní. Naʻá Ne fakafoki mai ʻa e Siasi ʻo Sīsū Kalaisí ki he māmaní. Ko Lāsolo M. Nalesoni ʻa e palōfita mo e Palesiteni ʻo e Siasí ʻi he ʻaho ní. Ko hono ongo tokoni ʻi he Kau Palesitenisī ʻUluakí pea mo e Kau ʻAposetolo ʻe Toko Hongofulu Mā Uá ko e kau palōfita, kau tangata kikite, mo e kau tangata maʻu fakahā foki mo kinautolu.
Fakafanongo ki he Palōfitá
ʻOku lea mai ʻa e palōfitá kiate kitautolu ʻi he lolotonga ʻo e konifelenisi lahí pea ʻi he ngaahi taimi kehé. ʻOkú ne akoʻi kitautolu ki he meʻa ʻoku finangalo ʻa e ʻOtuá ke tau ʻiloʻí mo e founga ke muimui ai kia Sīsū Kalaisi ʻi he ʻaho ní. Te tau lava ʻo maʻu ʻene ngaahi akonakí ʻi he Liahoná mo e ChurchofJesusChrist.org.
Ngaahi Tāpuaki ʻo e Muimui ki he Palōfitá
ʻE tāpuekina kitautolu ʻo kapau te tau muimui ki he ngaahi akonaki ʻa e palōfitá. ʻI he taimi ʻoku tau muimui ai ki he palōfitá, te tau lava ʻo ʻiloʻi ʻoku tau fai ʻa e meʻa ʻoku finangalo ʻa e ʻOtuá ke tau faí. Te tau lava ʻo ongoʻi ʻa e melinó ʻi heʻetau moʻuí pea tau ofi ange ai kia Sīsū Kalaisi.