Maʻá e Ngaahi Mātuʻá

Fekumi ki ha Tataki Fakalaumālie

Siʻi Ngaahi Mātuʻa,

ʻI he makasini ko ʻení, ʻoku vahevahe ai ʻe ha Kau Taki Māʻolunga ʻe toko tolu ʻa e ngaahi akonaki mo e ngaahi aʻusia fakataautaha mo fakafāmili ki he founga ke fekumi, maʻu, mo muimui ai ki he tataki fakalaumālié.

Fealēleaʻaki ʻi he Ongoongoleleí

Fakafalala ki Heʻetau Ngaahi Fakamoʻoní

ʻI he peesi 4, ʻoku vahevahe ai ʻe ʻEletā Lānolo A. Lasipeni ha talanoa mei hono hisitōlia fakafāmilí ke akoʻi ʻaki ʻa e tefitoʻi moʻoni he ʻikai liʻaki kitautolu ʻe hotau Fakamoʻuí. Lau ʻene fakamatalá pea aleaʻi e founga naʻe fakafalala ai ʻa e fuofua Kāingalotú ki heʻenau fakamoʻoni kia Sīsū Kalaisí mo e palani ʻo e fakamoʻui ʻa e Tamai Hēvaní.

Fealēleaʻaki mo e ʻEikí

ʻI he peesi 30, ʻoku fakamatalaʻi ai ʻe ʻEletā Patilisiō M. Siofolā ʻa e founga naʻá ne fili ai, ʻi heʻene ului ki he Siasí ʻi hono kei taʻu hongofulu tupú, ke ʻalu ʻo ngāue fakafaifekau mo ako ʻi he ʻunivēsití. Naʻá ne vahevahe leva ʻene tali ki he fehuʻí, Ko e hā ʻa e meʻa ʻokú ke fai ʻi he taimi ʻoku fepaki ai ʻa e fakahā fakatāutahá mo e fakakaukau fakapotopotó?

Ko hono Maʻu ʻa e Tataki mei he Laumālié

ʻE lava fēfē nai ke tau maʻu ha lelei kakato ange mei he meʻa-foaki ʻo e Laumālie Māʻoniʻoní ʻi heʻetau moʻuí? ʻOku fakamatalaʻi ʻe ʻEletā Housei A. Teiseila ʻa e kaveingá ni ʻi he peesi 40. Lau ʻene fakamatalá pea aleaʻi ʻa e founga ke maʻu ai ha tataki lahi ange mei he Laumālié.

Fiefia Fakafāmili ʻi heHaʻu, ʻo Muimui ʻIate Aú

Fakalaulauloto ki he Foungá

Lea Fakatātā 3–4

1. Fokotuʻu ha fakatātā ʻo e Fakamoʻuí ʻi he tafaʻaki ʻe taha ʻo ha feituʻu pe loki ʻatā lahi.

2. Tuʻu ʻi he tafaʻaki ʻe taha ʻo e lokí. Taufetongi ʻi hono haʻi ʻa e mata ʻo e mēmipa takitaha ʻo e fāmilí, ʻai ke nau vilo takai ʻi ha siakale, pea sio pe te nau lava ʻo lue taʻe-tokoniʻi ki he fakatātā ʻo Sīsū Kalaisí.

3. Lau ʻa e Lea Fakatātā 4:26–27.

Fealēleaʻaki: Ko e hā ha faʻahinga tokoni kuo foaki mai kiate kitautolu ʻi he moʻuí ni ke tau nofo maʻu ai ʻi ha hala ʻoku fakatau kia Sīsū Kalaisí? Ki ha toe fealēleaʻaki, lau ʻa e Lea Fakatātā 3:5–6. Ko e hā ha ngaahi ngāue ʻoku fie maʻu ke tau fai ke falala ai ki he ʻEikí ʻaki hotau lotó kotoa?

Ne fakahū mai ʻe Mitzi Schoneman

Mei he Makasini Ki Hono Fakamālohia ʻo e Toʻu Tupú

ʻOku ʻi he makasini ki he toʻu tupú ʻo e māhina ní ha ngaahi fakamatala ki he founga ʻe lava ke tokoniʻi ai kitautolu ʻe he ʻEikí ʻi he ʻaho ní, founga ne ako ai ʻe ha talavou ha ngaahi lēsoni mei heʻene ongomātuʻá, mo e ngaahi akonaki ʻa ʻEletā Soālesi fekauʻaki mo e founga ʻe lava ai ʻe Sīsū Kalaisi ʻo ueʻi fakalaumālie ʻa e niʻihi kehé ke nau tokoniʻi kitautolú.

Mei he Makasini Kaumeʻá

ʻE tokoni ʻa e Kaumeʻa ʻo e māhina ní ki hoʻo fānaú ke nau ako fekauʻaki mo e ngaahi akonaki ʻa ʻĪsaiá, mahino kiate kinautolu ʻa e ʻuhinga ʻoku tau fakaʻaongaʻi ai ʻa e ngaahi lea ʻoku maʻá, mo vakai ki he founga ne tokoni ai ʻa e fānau kehé ʻi hono faʻu ʻo e ngaahi vitiō ʻo e Tohi ʻa Molomoná.