“Fakamoʻoniʻi ʻOku Mou Kāinga,” Liahona, Sepitema 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Fakamoʻoniʻi ʻOku Mou Kāinga
Naʻá ku fakakaukau naʻe kole ʻe he ʻEikí ʻa e meʻa taʻe-malavá, ka naʻá ku hala.
Naʻe nofo hoku kaungāʻapi toulekeleká mo hono fohá ʻo ofi mai pē ki he fale ne u nofo ai mo hoku fāmilí. Naʻe fakaʻau ke ne mahuʻinga kiate kimautolu. Hili ʻa e pekia hono fohá, naʻá ne puke pea ne pau ai ke ne tokoto maʻu pē ʻi hono mohengá. Naʻa mau tokangaʻi ia kae ʻoua kuó ne pekia hili ha māhina ʻe tolu mei ai.
Hili ʻena pekiá, naʻá ku fie maʻu ke fakahoko ʻa e ngaahi ouau fakatemipalé maʻá e fāmili ko ʻení. Ka koeʻuhí naʻe ʻikai ke mau kāinga, naʻe ʻikai ko ha meʻa ia ke u fili ke fakahoko. Naʻe haʻu ha fakakaukau mahino ʻi ha ʻaho ʻe taha ki heʻeku fakakaukaú: “Fakamoʻoniʻi ʻoku mou kāinga, pea te ke lava ʻo fai ʻa e ngāue fakatemipalé maʻanaua.”1 Naʻá ku pehē ʻe au naʻe kole ʻe he ʻEikí ʻa e meʻa ʻoku ʻikai malava ke hokó, ka naʻe toutou haʻu pē ki heʻeku fakakaukaú ʻa e foʻi lea ko e fakamoʻoniʻí .
Naʻe kamata ke liliu ʻe he kāinga ʻo hoku kaungāʻapí ʻa e tokotaha ʻoku ʻaʻana ʻa hono ʻapi nofoʻangá, ka naʻe ʻikai haʻanau lekooti ke fakamoʻoniʻi ʻaki honau vā fetuʻutakí, ʻo aʻu pē ki he ʻosi ʻemau fekumi ki he ngaahi ʻākaivi ʻa e puleʻangá.
Naʻe talamai ʻe he Laumālié ʻoku ʻi ai ʻa e meʻa ʻoku ʻikai ke mau maʻu. ʻI he fakangofua mei he kāinga ko ʻení, naʻá ku fekumi ʻi hono fale nofoʻangá ki ha ngaahi fakamatala fakapepa. Naʻá ku maʻu ha fanga kiʻi tangai naʻe fonu ʻi he ngaahi pepa motuʻa, ʻi ha tuliki ʻo e falé. Naʻá ku ongoʻi naʻe mahuʻinga ʻa e ʻū kató.
Naʻá ku fakasio ʻi ha tangai ʻe ua pea kamata ke u sio ki he tolú. Naʻá ku meimei aʻu ki he takele ʻo e kató mo ʻeku ongoʻi ʻa e takafi ʻo ha kiʻi pepa. Naʻá ku maʻu ʻi loto ʻi he kato ʻo e takafi ʻo e pepá ha ngaahi tohi fakamoʻoni mahuʻinga ʻe nima: tohi fāʻeleʻi ʻa e fefine ʻi hoku kaungāʻapí, tohi fakamoʻoni ʻo e mali mo e pekia ʻo ʻene faʻeé, tohi fakamoʻoni pekia ʻo ʻene kui fefiné, mo e tohi fakamoʻoni tanu ʻo ʻene tamaí.
ʻI he taimi naʻá ku vakaiʻi ai mo e kāinga homau kaungāʻapí ʻa e ngaahi fakamatala fakapepá, naʻe hā ngali mahuʻinga kiate au ha ongo foʻi lea ʻe ua: “Vahefonua Vekeisikií,” ʻi he fakahihifo ʻo Saipīliá. Fakafokifā pē, naʻá ku ongoʻi naʻe totonu ke u sio ki heʻeku fuʻu ʻakau fakafāmilí. ʻI heʻeku fai iá, ne u ʻiloʻi ai naʻe hā ʻa Vekeisikií ʻi he ngaahi vaʻa mamaʻo ʻo e fuʻu ʻakau fakafāmili ʻo ʻeku tamaí. Naʻe hā mei ha fakatotolo lahi ange ʻoku ou kāinga mo hoku kaungāʻapi kuo pekiá!
Tā naʻe ʻikai finangalo ʻa e ʻEikí ki he taʻemalavá meiate au. ʻOku ʻikai ke u lava ʻo fakahaaʻi ʻeku fiefia ke ʻiloʻi ko hoku kaungāʻapí ko e konga ia hoku fāmilí. ʻE fakaʻatā au ʻe he fehokotakiʻanga ko ʻení ke u fakapapauʻi ʻoku fakahoko hono ngaahi ouau fakatemipalé ʻi he kahaʻú.
ʻOku ʻofeina ʻe he ʻEikí ʻa ʻEne fānaú Naʻá Ne teuteuʻi ʻa e palani ʻo e fakamoʻuí maʻá e kakai kotoa pē, kau ai hoku kaungāʻapí mo hono fohá.