“Meʻa ʻe Taha ʻi he Taimi,” Liahona, Sepitema 2022.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Meʻa ʻe Taha ʻi he Taimi
ʻOku mau fakamālō ki he kāingalotu fakaʻofoʻofa ʻo homau uōtí, ʻa ia naʻa nau tokoniʻi kimautolu ʻi heʻemau kiʻi tamasiʻi ʻoku ʻotīsimí.
Ko Siua lolotonga haʻane ʻaʻahi kimuí ni ki he temipalé.
Laʻitā ʻo Sōsiua ne maʻu ʻi he angalelei ʻa e tokotaha faʻu tohí
ʻI he māhina 18 homa foha ko Sōsiuá, naʻá ma fakatokangaʻi ha ngaahi meʻa ngali kehe ʻi hono ʻulungāngá. Naʻe lava ʻa Siua ʻo maʻuloto ʻa e meimei foʻi lea kotoa pē ʻo e foʻi hiva takitaha ʻi he polokalama televīsoné naʻá ne sio aí, ka naʻe tōmui ʻene ako ke leá. ʻI ha ʻaho ʻe taha naʻe pehē ʻe heʻeku faʻē ʻi he fonó naʻe fakahaaʻi ʻe Siua ʻa e ngaahi fakaʻilonga ʻo e ʻotīsimí. Naʻe talamai ʻe he kau mataotaó ʻa e meʻa tatau kiate kimaua.
Naʻe laukonga lahi hoku uaifi, ko ʻIlisapetí, ʻi ha ngaahi tohi fekauʻaki mo e ʻotīsimí. Naʻá ne lesisita foki ʻa Siua ʻi ha ngaahi polokalama ke tokoni kiate ia. Naʻá ne fakapapauʻi ke maʻu [ʻe Siua] ʻa e kamata lelei taha ʻi he moʻuí te ma ala lava ʻo foaki kiate iá.
ʻI he ngaahi ʻaho naʻá ku mafasia ai ʻi he fakakaukau ki he kahaʻú, ne fakafiemālieʻi au ʻe ʻIlisapeti. Naʻá ne talamai naʻe fie maʻu ke ma tokanga ki he meʻa pē ʻe taha ʻi he taimi.
Naʻá ne pehē, “ʻOku fie maʻu ke ta fakahoungaʻi ʻa e meʻa foʻou kotoa pē ʻoku ako ʻe Siuá kae ʻikai tokanga taha ki he ngaahi meʻa taʻeʻiloa ʻo e kahaʻú.”
ʻI heʻene tupu haké, naʻe kamata ke ʻikai lava ʻo mapuleʻi ʻa Siua ʻi he lotú. Ke taʻofi ia mei hono fakahohaʻasi ʻo e Palaimelí pe fakamamahiʻi ʻa e fānaú, naʻá ku huki ia ʻi hoku fungá. Naʻá ne fute, vaku, mo fefaʻuhi mo au ʻi he houa kotoa ʻe tolu ʻo e lotú. Naʻá ku faʻa foki mai ki ʻapi kuó u lavelavea mo helaʻia.
“ʻE hā ka ta tuku pē ia ʻi ʻapi ʻi he lotú peá ta taufetongi pē ʻi he nofo mo iá?” Ne u fokotuʻu ange.
Naʻe tali mai ʻe ʻIlisapeti, “Kapau he ʻikai ke ta hokohoko atu hono ʻave iá, te ne ako kapau ʻe fai hono angá, ʻe nofo leva mei he lotú.” Ne u ʻilo naʻá ne moʻoni.
ʻI ha ʻaho ʻe taha naʻe talamai ʻe ha faʻē ʻo ha fāmili ʻe taha ʻoku ʻi ai haʻanau kiʻi tamasiʻi ʻotīsimi, “ʻI he taimi ʻe hoko ai e taʻu valu ʻo Siuá peá ne maʻu ʻa e Laumālie Māʻoniʻoní, te ne angamalū ange!”
Naʻe ʻikai ke u tui ki heʻene ngaahi leá, ka ʻi he hoko hono taʻu valú, naʻá ne maʻu ʻa e Laumālie Māʻoniʻoní pea naʻá ne angamalū ange—siʻisiʻi pē.
ʻI he lahi ange ʻa Sōsiuá, naʻá ne maʻu ʻa e lakanga fakataulaʻeikí. Naʻá ne tufa ʻa e sākalamēnití, peá ne ako ʻa e mahuʻinga ʻo e ngāue tokoní. Naʻe ako ʻe he kau mēmipa ʻo ʻene kōlomu ʻo e lakanga fakataulaʻeikí ha hulohula ki ha foʻi vitiō hiva ʻo e ngaahi taʻu 80 tupú mo Siua pea nau fakaʻaliʻali ia ʻi ha paati ʻa e uōtí.
Naʻe angaʻofa homau uōtí kia Siua. Naʻe malimali ʻa e kāingalotú ʻi he taimi naʻá ne tufa ai ʻa e sākalamēnití lolotonga ʻene fai ha kiʻi koukou ʻo e ngaahi taʻu 80 tupú.
ʻOku taʻu 17 ʻa Siua ʻi he taimí ni. Ko ha tokotaha mūsika talēnitiʻia ia ʻokú ne faʻu ha ngaahi hiva. ʻOkú ne manako ʻi he ʻeti ʻi he tulamá pea ʻasi maʻu pē ʻi he fale faiva ʻa e akó mo e koló.
ʻOkú ma houngaʻia ʻi heʻema hoko ko e ongomātuʻa ʻa Siuá mo kau ʻi heʻene fonongá. ʻOku ʻikai ke ma fakapapauʻi pe ko e hā ʻe hoko ʻi he kahaʻú, ka ʻokú ma tukupā ke fiefia kakato mo ia ʻi he ʻaho takitaha ʻo e moʻuí.