Fitsipika momba ny fanompoana

Afaka manampy ny hafa hahatsapa ho tiana sy hahatsapa tena ho voaray tsara isika

Niaina fandavana ny Mpamonjy ary nampianatra antsika ny fomba fanoloran-tanana.

I Sasha dia vehivavy tokan-tena ao amin’ny paroasy feno fianakaviana, izay tsy mora foana. Mahatsapa ho faly sy afa-po izy saingy matetika no dia miavaka be—ary somary miharihary—manodidina ireo mpikambana hafa ao amin’ny paroasy. Toy ny ankamaroantsika, dia maniry ny horaisina sy hanana firaisam-po izy.

I Thomas, lehilahy zokiolona iray tao amin’ny paroasy, dia notendrena ho rahalahy mpanompo azy ary nandalo niaraka tamin’ny vadiny indray andro mba hifankafantatra kokoa amin’i Sasha. Somary tsy nampahazo aina ihany ilay fitsidihana satria niompana tamin’ny maha-tokan-tena azy ny resaka. Rehefa niresaka anefa izy ireo, dia tsapan’i Sasha fa i Thomas sy ny vadiny dia niezaka ny hahatakatra ny toe-javatra iainany sy ny fomba ahafahan’izy ireo manampy azy.

Nisy fotoana nitenenan’i Thomas hoe: “Tsikaritro fa mety mila fitiavana kely ny tokotaninao. Tiako ny hanampy anao amin’izany.”

Mahatonga azy ho sahirana be ny asan’i Sasha hany ka tsy laharam-pahamehana aminy ny fikarakarana ny tokotaniny. Ary ankoatra izany, tsy tiany ny manao ilay izy. Hainy ny fomba fikarakarana tokotany, ary fantany fa ho vitany izany. Saingy izany dia tsy manova ny fankahalany ny hanao ilay izy.

Nisy fotoana mety ho nandratra ny fihetseham-pony ny fanontaniany. Saingy nilaza i Thomas fa efa tao amin’ny tafika izy ary nahatakatra ny zavatra izay matetika tsy maintsy ataon’ny vehivavy irery rehefa tsy eo ny vadiny. Fantany fa nitady fomba hanamafisana ny finamanan’izy ireo fotsiny i Thomas. Niezaka nampifangaro ny zavatra niainany tamin’ny vadiny izy ary nitady zavatra iombonana.

Samy nianatra nifankatia sy nifanaraka tamin’izay nisy azy ireo ny andaniny sy ny ankilany, ka zary nisy finamanana akaiky sy tena izy.

Ary tsy mbola tsara endrika toy izany ihany koa ny bozaka teo an-tokotanin’i Sasha.

Ohatra tonga lafatra amin’ny fandraisana ny hafa

Ao amin’ny Testamenta Taloha, i Isaia dia naminany fa i Jesoa Kristy dia hahafantatra tsara izany atao hoe miavaka amin’ny hafa izany. Niaina fanilikilihana sy fampijaliana izy. “Natao tsinontsinona sy nolavin’ny olona Izy; lehilahy ory sady zatra ny fahoriana” (Isaia 53:3). Amin’ny alalan’ny fitiavany tonga lafatra dia fantany ny zavatra tsapantsika ary fantany ny fomba hanampiany antsika (jereo ny Almà 7:12). Izy no ohatra tonga lafatra amin’ny fomba ahafahantsika manolo-tanana amim-pitiavana mba handraisana ny hafa, na inona na inona toe-javatra iainany na bika aman’endriny.

Fitsipika hodinihana

Rehefa mitady fomba hanampiana ny hafa hahatsapa ho voaray tsara ianao dia diniho ireto fitsipika nampianarin’ny Mpamonjy sy niainany ireto:

• Aoka ianao ho vonona ny hahafantatra olona ivelan’ireo izay efa fantatrao (jereo ny Matio 5:43–48).

• Aza matahotra ny hifanerasera amin’ireo izay mety miaina amin’ny fomba hafa na tsy mitovy finoana aminao raha toa ka tsy midika hoe mampandefitra ny fampianaran’ny Mpamonjy izany (jereo ny Marka 2:14–17; Lioka 7:38–50).

• Tokony hahatsapa ho ilaintsika ny olona rehetra any am-piangonana (jereo ny 3 Nefia 18:22–32). Afaka manova na iza na iza ny hoe amin’ny toerana iray izay ahafahany mianatra ny filazantsaran’ny Mpamonjy sy ahatsapany fitiavany.

• Fantatry ny Mpamonjy ny zavatra ilaintsika, amin’ny lafiny iray satria fantany ny zavatra tsapantsika (jereo ny Almà 7:11–12). Afaka maneho fitiavana isika amin’ny alalan’ny fikatsahana ny hahatakatra ny zavatra niainan’ny hafa sy ny fametrahana ny tenantsika eo amin’ny toerany.

• Ny Mpamonjy dia nanokana fotoana mba ho eo mivantana mba hamaly ny filàn’ireo manodidina Azy. Niato Izy mba hikarakara ny hafa na dia efa nikasa ny ho any amin’ny toeran-kafa aza (jereo ny Marka 5:22–43).

Inona no azontsika atao?

Aza avela hanakana anao tsy hamantatra ireo izay tompoinao ny fahasamihafana. Na inona na inona fahasamihafana misy eo amintsika dia misy zavatra iombonana mila hofantarina ihany.

Hijery misimisy kokoa

Mianara mijery ny hafa tahaka ny fijerin’ny Tompo azy, ao amin’ny “Mijery ny hafa araka izay mety ho ahatongavany” nataon’i Filoha Thomas S. Monson (Liahona, nôv. 2012, 68–71).

Ianaro ny fomba ahazoantsika firaisan-kina kokoa amin’ny alalan’ny fandraisana ny hafa sy ny fanajana ny fahasamihafana, ao amin’ny “Fo mifamihina ao amin’ny fahamarinana sy firaisan-kina” nataon’i Quentin L. Cook (Liahona, nôv. 2020, 18–22).