Avia, hanaraka Ahy

Isaia 40–49

Inona no nampianarin’i Isaia momba ny maha-mpanompon’ny Tompo?

Matetika ny Tompo no miantso ny mpanara-dia Azy ho mpanompony na vavolombelony. Ireo teny ireo dia fahita manerana ny soratra masina, ary tsy maningana ny bokin’i Isaia. Tamin’ny andron’ny Testamenta Taloha, ary koa ankehitriny, dia nanome fahafahana ny olona hanompo Azy sy ho vavolombelony ny Tompo.

• Rehefa mamaky ny Isaia toko 40–49 ianao dia tadiavo ireo fotoana nilazan’ny Tompo hoe “mpanompo” na “vavolombelona.” Iza no tiany holazaina amin’izany? Mitadiava andininy izay mampianatra ny fomba ahafahanao ho vavolombelona sy ho mpanompon’ny Tompo, toy ny Isaia 44:2.

  

  Joseph Smith Preaching [I Joseph Smith mitory teny], nataon’i Sam Lawlor © 2001

• Avy eo, eo am-pamakianao ny toko 41–44, dia azonao atao ny mieritreritra hoe inona avy ireo andininy azo ampiharina amin’ny antsonao na ny fanompoanao. Inona no angatahin’ny Tompo hataonao, ary ahoana no hanampiany anao?

  

• Inona no fahafahana nomena anao mba ho mpanompo na ho vavolombelon’ny Tompo? Mety ho ohatra amin’izany ny antso, ny asa fitoriana, ny fampianarana ny fianakavianao, na asa fanompoana hafa. Azonao atao ny mitanisa ireo zavatra niainana ireo ao amin’ny diarinao. Inona no nianaranao avy tamin’izy ireo? Ahoana no nanampian’ny Tompo anao?

  

Mivavaha mba hahalalanao ny fomba hanampiana

“Mivavaha mba hanana fahafahana hihaona amin’ireo olona mahatsapa fa mety hisy zavatra tsara kokoa eo amin’ny fiainany. Mivavaha mba hahafantarana izay tokony hataonao mba hanampiana azy ireo. Ho voavaly ny vavaka ataonao.”

Filoha Henry B. Eyring, Mpanolotsaina Faharoa ao amin’ny Fiadidiana Voalohany, “A Child and a Disciple [Zanaka sy mpianatra],” Liahona, mey 2003, 32.

Fifanakalozan-kevitra

Inona no fanampiana sy fitahiana avy any an-danitra azon’ireo mpanompo mahatoky? (jereo ny Isaia 41:10).