Mga Alituntunin ng Ministering

Matutulungan Natin ang Iba na Madamang Kabilang Sila

Matutulungan tayo ng Espiritu Santo na gawing kabilang ang iba kung sisikapin nating tumulong.

larawan ni Ioana Schifirnet

Nang sumapi si Ioana Schifirnet sa Simbahan noong tinedyer pa siya sa Romania, malugod siyang tinanggap ng mga young adult sa kanyang branch at isinama siya sa kanilang mga klase at aktibidad. “Sila ang naging matatalik kong kaibigan,” sabi niya. “Ipinadama nila sa akin na kabilang ako.”

Nang maging young adult na siya, gusto rin ni Ioana na gawin ang gayon at tulungan ang iba na madama na malugod silang tinatanggap sa Simbahan ng Tagapagligtas. Bagama’t kinabahan siya sa pagtulong sa mga taong hindi niya kilala, natuto siyang makinig sa Espiritu Santo at magtiwala sa mga pahiwatig na natanggap niya.

Nang sumapi ang isa pang dalagita, nagkaroon si Ioana ng lakas-ng-loob na kausapin siya. Natuklasan nila na pareho silang mahilig sa musika, at nag-alok si Ioana na turuan siyang kumumpas. Hindi nagtagal, nagkakasama na sila, naglilingkod bilang branch pianist at music leader.

“Habang inihahanda ko ang aking sarili na tumanggap ng patnubay ng Espiritu Santo, nagsimula kong mapansin na inilalagay Niya ang mga ideya sa isipan ko, sinasagot Niya ang mga tanong ko, nagpapahiwatig sa akin,” sabi ni Ioana. “May mga pagkakataon na hindi ko alam kung ano ang sasabihin, at pagkatapos ay may darating na isang ideya. Naramdaman kong tama ito nang sabihin ko ito. Natututo akong magtiwala sa Espiritu Santo.”

Nalaman niya na kadalasan ang mga bagay na tumutulong sa iba na madama na sila ay kabilang ay hindi malalaking bagay. Para sa kanya, kabilang dito ang pagsali sa Sunday School o mga aktibidad, paglalaro ng isports o nakakabaliw na laro, paggawa ng cookies, at pagsasayawan sa gabi. “Hindi ito kailangang maging magara. Kailangan lang na nagkakasiyahan kayo o nakakapag-usap. At kapag ito ay konektado sa isang bagay na espirituwal, nagiging mas espesyal ito.”

Napagtibay ni Ioana, “Kung magbabalik-tanaw ako, sumapi ako sa Simbahan ni Jesucristo nang wala ang mga young single adult na iyon. Ngunit nakatulong sila na palakasin ako sa mga paraang kailangan ko.”

babaeng young adult na nakikipag-usap

Matutulungan Natin ang Diyos na Tipunin ang Kanyang mga Anak

Ang pagtulong sa iba ay maaaring mahirap, lalo na kung ito ay isang taong hindi natin gaanong kilala o maaaring iba ang paniniwala sa atin.

Sa loob ng mahigit 40 taon, sinikap ni Jeremias na tulungan ang mga tao na lumapit sa Tagapagligtas, na karamihan ay hindi interesado sa kanyang tulong. Binalewala nila ang mga propeta. Ang kanilang mga puso ay hindi talaga nakatuon sa Panginoon. (Tingnan sa Jeremias 2–3; 5; 7; 11.)

Alam ni Jeremias na ikakalat ang sambahayan ni Israel. Ngunit nagpropesiya siya tungkol sa isang malaking pagtitipon sa ating panahon, kung kailan titipunin ng Panginoon ang Israel sa Sion, nagpadala ng mga mangingisda at mangangaso upang hanapin ang sila (tingnan sa Jeremias 16:16).

Inanyayahan tayo ni Pangulong Russell M. Nelson na makibahagi sa pagtipong ito: “Kapag sinasabi nating pagtitipon ng Israel sa magkabilang panig ng tabing, ibig sabihin ay gawaing misyonero, gawain sa templo at family history. Ito rin ang pagpapatatag ng pananampalataya at patotoo sa puso ng mga taong kasama natin sa buhay, katrabaho, at pinaglilingkuran natin. Sa tuwing gumagawa tayo ng kahit ano na makatutulong sa kahit sino—sa magkabilang panig ng tabing—para gawin at tuparin ang kanilang mga tipan sa Diyos, tumutulong tayo na tipunin ang Israel.”¹

mga lalaking naghahagis ng lambat sa dagat

Mga Alituntuning Dapat Pag-isipan

Habang iniisip mo kung paano mo matutulungan at malugod na tatanggapin ang iba, isipin ang mga ideyang ito mula sa karanasan ni Ioana:

• Magagabayan ng Espiritu Santo ang ating mga salita at kilos, at magagawa rin Niyang makabuluhan ang pagsisikap natin nang husto (tingnan sa Moises 6:32–34).

• Maghanap ng mga interes na magkapareho kayo.²

• Anyayahan ang iba na sumama sa iyo sa mga aktibidad na pinlano mong makibahagi.³

• Inanyayahan tayo ni Pangulong Nelson na tipunin ang iba sa pamamagitan ng pagiging liwanag at pagtatakda ng isang pamantayan na nagpapakita kung paano namumuhay ang mga tunay na disipulo.⁴

Ano ang Magagawa Natin?

Magtiwala na gagabayan ng Espiritu ang iyong mga pagsisikap na makilala ang isang tao o anyayahan silang sumama sa iyo.

Tuklasin ang Iba Pa

Alamin kung paano tayo maaaring magtipon sa Tagapagligtas at isama ang iba sa “Ang Walang Hanggang Tipan” ni Pangulong Russell M. Nelson, na nasa isyung ito ng Liahona.

Mga Tala

1. Russell M. Nelson, “Hayaang Manaig ang Diyos,” Liahona, Nob. 2020, 92–93.

2. Tingnan sa Russell M. Nelson, “Paglilingkod nang may Kapangyarihan at Awtoridad ng Diyos,” Liahona, Mayo 2018, 69–70.

3. Tingnan sa Richard Neitzel Holzapfel, “Paglilingkod sa Lahat,” Liahona, Dis. 2020, 21.

4. Tingnan sa Russell M. Nelson, “Pag-asa ng Israel” (pandaigdigang debosyonal para sa mga kabataan, Hunyo 3, 2018), HopeofIsrael.ChurchofJesusChrist.org.