Para sa mga Magulang

Gawaing Misyonero sa mga Huling Araw

Minamahal na mga Magulang,

Sa kabila ng kaguluhan ng mundo, patuloy na sumusulong ang gawain ng Panginoon. Nasasaksihan natin ang gawain ng Panginoon habang ibinabalita at itinatayo ang mga templo, habang masigasig na naglilingkod ang mga miyembro sa buong mundo, at habang nagboboluntaryo ang mga missionary na ibigay ang kanilang oras upang maibahagi ang ebanghelyo ni Jesucristo. Hiniling din sa atin ng Panginoon na maglingkod sa isang tao. Miyembro man siya ng Simbahan o bagong kaibigan na nagpakita ng interes sa ating mga paniniwala, kilala siya ng Panginoon, at kilala Niya kayo.

Mga Talakayan tungkol sa Ebanghelyo

Mga Tipan at ang Pagtitipon ng Israel

Ibahagi sa inyong pamilya ang ilang sipi mula sa nagbibigay-inspirasyong artikulo ni Pangulong Russell M. Nelson sa pahina 4 at talakayin kung paano tayo tinutulungan ng pagtupad sa ating mga tipan na “[magkaroon] ng lakas na labanan ang palagiang impluwensya ng mundo.” Kung may mga anak kayo na naghahandang magmisyon, ibahagi ang kanyang mga turo tungkol sa mga missionary na gumagawa ng “pinakamahalagang gawain sa mundo ngayon.”

Kilala ng Diyos ang Bawat Isa sa Atin

Tayong lahat ay mga anak ng Ama sa Langit, at mahal Niya tayo. Dahil dito, nagmamalasakit din Siya sa ating personal na pagbabalik-loob. Basahin ang mensahe ni Elder Jorge T. Becerra sa pahina 40 tungkol sa karanasan ng kanyang lolo sa personal na pagbabalik-loob at talakayin kung paano ninyo nalalaman na kilala at mahal kayo ng Panginoon.

Pagkakaroon ng Tamang Pokus sa Pagsasabuhay ng Ebanghelyo

Upang matulungan ang inyong mga anak na mas maunawaan kung ano ang pagtutuunan ng pansin habang sinisikap nilang isabuhay ang ebanghelyo, basahin ang artikulo sa pahina 30 upang malaman kung paano binago ng isang young adult ang kanyang pag-iisip upang makita ang layunin ng bawat kautusan at alituntunin ng ebanghelyo.

Katuwaan ng Pamilya sa Pumarito Ka, Sumunod Ka sa Akin

Mga Kawing ng Pagmamahal

Isaias 52

Sa Isaias 52:7, sinabi sa atin ng propeta na bibigyan tayo ni Cristo ng kapayapaan, ebanghelyo, at kaligtasan.

1. Talakayin ang mga paraan na maibabahagi ninyo ang mga dakilang pagpapalang ito sa pamamagitan ng gawaing misyonero. Ilista ang lahat ng maiisip ng inyong pamilya. (Mga halimbawa: ibahagi ang ebanghelyo sa inyong mga kaibigan, dalhin ang pangalan ng inyong mga ninuno sa templo upang maisagawa ang kanilang mga ordenansa.)

2. Maglagay ng Aklat ni Mormon sa isang panig ng silid. Patayuin ang isang tao sa kabilang panig at, nang hindi iginagalaw ang kanyang mga paa, ipaabot ang aklat. (Tiyaking hindi maaabot ang aklat.)

3. Papilahin ang bawat miyembro ng inyong pamilya sa pagitan ng taong nasa kabilang panig ng silid at ng Aklat ni Mormon. Magkapit-bisig, lumilikha ng isang tanikala ng mga tao, at ipasa ang Aklat ni Mormon sa unang tao. (Sa pag-alam kung gaano karami ang tao sa inyong grupo, matatantiya ninyo kung gaano kalayo dapat magsimula ang unang tao.)

Talakayan: Anong uri ng mga kilos sa ating mga buhay ang maaaring lumikha ng “mga kawing” na makatutulong sa iba na makilala ang mga pagpapala ng ebanghelyo?

Narito ang ilang mensahe sa kumperensya na maaaring basahin o pakinggan ng inyong pamilya tungkol sa paksang ito:

• Dieter F. Uchtdorf, “Ang Diyos ay Gagawa ng Isang Bagay na Hindi Mailalarawan sa Isip,” Liahona, Nob. 2020, 51–54.

• Ahmad S. Corbitt, “Magagawa Ninyong Tipunin ang Israel!” Liahona, Mayo 2021, 61–64.

Isinumite ni Brenda Slade

Mula sa Magasing Para sa Lakas ng mga Kabataan

Tinitipon ng Panginoon ang Kanyang mga Tao at Inaakay Niya Sila Mula sa Pagkaalipin

Itinuro ni Elder Quentin L. Cook kung paano natin maiiwasan ang pagkaalipin sa pamamagitan ng pagtitipon kasama ng mga tao ng Panginoon at pagsunod sa Kanya. At dapat din nating paliwanagin ang ating ilaw at akayin ang iba patungo kay Cristo.

Teknolohiya at ang Pagtitipon

Nagbahagi si President Bonnie H. Cordon ng limang paraan na magagamit ang teknolohiya upang tipunin ang Israel.

Mabuting Katatawanan

Magbasa ng ilang ideya tungkol sa mabuting katatawanan at sa positibong epekto na maaari nitong idulot sa ating buhay.

Mula sa Magasing Kaibigan

Manatiling Matalino sa Paggamit ng Media

Magbasa ng isang kuwento tungkol kay Nathan, na natutong magtakda ng mabubuting limitasyon sa kanyang oras ng paglalaro ng video game. Pagkatapos ay maghanap ng iba pang mga positibong tip tungkol sa media sa bahaging Para sa Mas Nakatatandang mga Bata.

Tulong sa Pumarito Ka, Sumunod Ka sa Akin

Maghanap ng mga lingguhang aktibidad na makatutulong na maging masaya ang pag-aaral ng mga banal na kasulatan ng inyong pamilya.

Magasin sa Family History

Alamin kung paano gumawa sina Liv at Melanie mula sa Taiwan ng kanilang sariling magasin upang maidokumento ang kanilang family history.

Pagtulong Tulad ni Jesus

Kilalanin si Edrick mula sa Guatemala at alamin kung paano siya tumutulong sa iba, tulad ng ginawa ni Jesus. Pagkatapos ay tulungan ang inyong anak na gawin ang Hamon sa mga Matulunging Kamay sa buwang ito.

Para sa Maliliit na Kaibigan

Maghanap ng mga kuwento at aktibidad sa bahaging ito na sadyang ginawa para sa ating mga pinakabatang mambabasa.