Pagtanda nang May Katapatan

May Gusto bang Sabihin sa Akin ang Panginoon?

Ni Delbert H. Strasser

Sa wakas, sa edad na 90, natanggap ng aking ina ang kanyang patriarchal blessing.

matandang babae

Larawang ginamitan ng modelo

Ang aking ina na si Margaret ay lumipat sa Estados Unidos mula sa Switzerland noong dalaga pa siya. Hindi nagtagal pagkatapos niyon, nagkaroon siya ng appointment upang matanggap ang kanyang patriarchal blessing. Ngunit nang makipagkita siya sa patriarch, wala ito roon. Sa anumang dahilan, nadama ng aking ina na kumpirmasyon iyon na walang gustong sabihin sa kanya ang Panginoon, kaya hindi na siya ulit nagpaiskedyul ng appointment.

Paminsan-minsan sa paglipas ng mga taon, iminumungkahi ko sa aking ina na isaalang-alang niya ulit ang pagtanggap ng kanyang basbas. Isa siya sa mga pinakamatapat na babaeng nakilala ko. Gayunpaman, masyado siyang mapagpakumbaba kaya tumugon siya na hindi siya karapat-dapat sa anumang espesyal na bagay mula sa Panginoon. Hindi niya kailangan ng basbas, sabi niya, dahil simpleng babae lamang siya. At ayos lamang iyon sa kanya.

Sa wakas, noong siya ay 90 taong gulang na, nakumbinsi namin siyang mag-iskedyul ng appointment sa kanyang patriarch. Sa kabalintunaan, nagkaroon din ng di-pagkakaintindihan sa patriarch na ito, at nang dumating si Inay, ang patriarch ay wala sa bayan. “Kita mo na?” sabi niya. “Sinabi ko na sa iyo na walang gustong sabihin sa akin na espesyal ang Panginoon.”

Mabuti na lamang, nagkita sila ng patriarch nang sumunod na linggo. Nang ibigay ang basbas, puno ito ng mga kaloob, pangako, at detalye tungkol sa kanyang buhay na sa sobrang personal ay maaari lamang magmula sa kaalaman ng Panginoon tungkol sa kanya.

“Siguro nga may gustong sabihin sa akin ang Panginoon,” sabi niya.

Malinaw sa akin na kilala ng Panginoon ang bawat isa sa atin. At ikaw man ay nasa simula ng iyong buhay o nasa dulo nito, mahal na mahal ka Niya kaya may mahalagang payo Siyang ibibigay sa iyo sa pamamagitan ng iyong patriarch.

Ang awtor ay naninirahan sa Utah, USA.

Mga Panghabambuhay na Pagpapala

Ni Christy Monson, Mga Magasin ng Simbahan

Narito ang ilan sa mga paraan na napalakas ang mga matatandang kakilala ko dahil sa kanilang mga patriarchal blessing:

• “Noong bata pa ako, napuno ako ng mga negatibong damdamin tungkol sa aking sarili. Ngunit sinabi sa akin ng aking basbas ang tungkol sa mga partikular na katangiang nakita sa akin ng Ama sa Langit. Gumawa ako ng listahan ng bawat katangian. Habang pinag-aaralan ko ang listahang ito sa paglipas ng mga taon, natutuhan kong tingnan ang aking sarili tulad ng pagtingin sa akin ng Diyos.”

• “Ipinangako sa akin ng aking basbas na kaming mag-asawa ay mamumuhay nang may paggalang at pagmamahal sa isa’t isa. Ngunit inilayo ng aking asawa ang kanyang sarili sa pamilya at nagkaroon siya ng adiksyon. Sinabi ko sa Panginoon na gagawin ko ang lahat ng aking makakaya upang matupad ang pangako sa aking basbas. Ngunit sinabi ko sa Kanya na kailangan Niya akong tulungang malaman kung ano ang dapat kong gawin. Maraming taon na ang lumipas, ngunit nalampasan naming mag-asawa ang mga problema, mas napalapit kami sa isa’t isa, at nanatili kaming tapat. Alam ko na ibinigay sa akin ng Ama sa Langit ang pangakong iyon sa aking basbas upang tulungan akong makaraos.”

• Isa pang lalaking kakilala ko ang sumapi sa Simbahan noong siya ay 89 na taong gulang. Ang kanyang katawan ay napinsala na ng kanser. Subalit ipinangako ng kanyang patriarchal blessing na pupunta siya sa templo. Sa paglipas ng panahon, naging sapat ang kanyang lakas upang maupo sa wheelchair. Siya ay na-endow at nabuklod sa kanyang asawa bago siya namatay.

Ang mga patriarchal blessing ay nagmumula sa Diyos upang turuan tayo at bigyan tayo ng kapanatagan, kapayapaan, at patnubay. Habang tayo ay tumatanda at nagbabalik-tanaw, makikita natin ang kamay ng Panginoon sa ating buhay sa pamamagitan ng ating mga patriarchal blessing.