Welcome Niini nga Isyu

Pagtinguha ni Kristo Panahon sa Pasko

Behold the Lamb of God [Tan-awa ang Kordero sa Dios], ni Walter Rane

Ganahan kami sa panahon sa Pasko uban sa halangdon nga mga sinugdanan niini. Si Presidente Russell M. Nelson nagpahinumdom kanato nga “kinahanglang lig-on kitang nakatutok sa Manluluwas,” kansang pagkatawo atong gisaulog (“Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 40).

Niini nga isyu, ang mensahe ni Presidente Henry B. Eyring nga “Ang Gisaad nga Mesiyas,” nagdapit kanatong tanan sa pagpangita kang Kristo diha sa atong mga kasaulogan sa Pasko: “Taliwala sa atong paghunahuna, magpasalamat kita sa Dios alang sa mahimayaon nga gasa nga ‘[ginganlan og] ‘Maalamong Magtatambag,’ ‘Dios nga Gamhanan,’ ‘Amahan Hangtod sa Kahangtoran,’ ‘Prinsipe sa Pakigdait’ (Isaias 9:6)” (tan-awa sa pahina 4).

Ang mga pagtuon sa Daang Tugon karong tuiga nakapadasig usab kanato sa pagtinguha kang Kristo sa tanan nga atong buhaton. Giila nato ang mga simbolo sa atong Manluluwas gikan sa Daang Tugon samtang milantaw ug naminaw kita uban sa espirituhanong mga mata ug mga dalunggan. Unsa nga matahom nga mga simbolo sa atong Manluluwas ang inyong nakit-an sa inyong mga pagtuon?

Nagtuo kita nga ang pagtinguha ni Kristo diha sa atong mga kustombre, mga tradisyon, ug mga kasaulogan mohimo og malungtaron nga mga pagpamatuod ug malahutayon nga mga handomanan. Makatabang kini kanato nga makasinati sa hingpit nga diwa sa kalipay ug gugma nga makita diha sa Pasko. Naglaom kami nga ang mga panabot sa Pasko nga among gipaambit sa mga pahina 8–9 makatabang sa paglig-on sa inyong pagtutok kang Jesukristo. Hinaot nga kitang tanan magtinguha og mga pagpamatuod sa gisaad nga Mesiyas diha sa mga talan-awon, mga tingog, ug mga kasaulogan sa Pasko niining tuiga ug sa kanunay.

Maayong Pasko, minahal nga mga higala!

Larry ug Lisa Laycock, Utah, USA