“Ang Gasa sa Pasko nga Dili Nako Gustong Ihatag,” Liahona, Dis. 2022.
Mga Tingog sa mga Santos sa Ulahing mga Adlaw
Ang Gasa sa Pasko nga Dili Nako Gustong Ihatag
Ang lalaki tingali dili ganahang makakita kanamo, apan bisan pa nakahukom kami nga magbilin og gasa.
Atol sa akong misyon didto sa North Carolina, USA, gibisita namo ang usa ka lalaki kinsa ingon og buotan sa sinugdanan apan dayon nagmagahi nga kuno sayop ang Basahon ni Mormon. Mipahayag usab siya og ubang negatibo nga mga panglantaw mahitungod sa Simbahan. Dili gayod nindot ang among leksiyon. Militok kami og panapos nga pag-ampo ug mibiya.
Sulod sa usa ka panahon, negatibo ang akong gibati alang niini nga lalaki nga dili kaayo angay isip misyonaryo, apan sa kataposan nakalimot ako kaniya. Labing menos hangtod miabot ang Pasko.
Sa Pasko, mihatag kanamo ang pipila ka miyembro sa Simbahan og duha ka dagkong putos sa tinemplahan nga popcorn. Giablihan namo ang una ug misugod sa pagkaon, apan dayon nagsugod kami sa paghunahuna mahitungod sa lalaki nga among gibisita.
Samtang gitan-aw namo ang among ikaduhang putos, nakahinumdom kami nga kini nga lalaki nag-inusara lang sa pagpuyo. Nakahunahuna kami nga tingali ganahan usab siya og popcorn, apan nakahinumdom kami kon unsa siya ka negatibo. Basin milakaw siya aron sa pagbisita og pamilya, ug dili siya ganahan makakita kanamo bisan kon anaa pa siya sa panimalay. Gawas pa, amoa kini nga popcorn.
Apan, dili mawala kanang una nga impresyon. Gibaliwala namo ang mga pasumangil ug mihukom sa paghatag kaniya sa among ikaduhang putos sa popcorn.
Human sa pagsimba niana nga Dominggo, mihunong kami sa iyang balay ug nanuktok sa pultahan. Nagsugod ko sa pagduhaduha, apan miabli dayon ang pultahan.
“Maayong Pasko!” miingon kami. Mipakita ang kinadak-an nga ngisi sa iyang nawong, ug giabiabi kami niya pasulod.
“Brother, kami adunay gasa alang kanimo,” miingon kami. Dayon gihatag namo kaniya ang dako nga putos sa popcorn. Mas mipahiyom pa gayod siya og dako ug mihangyo kanamo sa paglingkod diha sa iyang sopa. Samtang nag-istorya kami, nakaamgo ako nga talagsa ra kaayo kong nakakita kaniadto og tawo nga malipayon kaayo.
Nahibaloan namo nga wala siyay pamilya sa duol. Nagplano siyang saulogon ang Pasko nga nag-inusara lang. Ang giputos nga mga regalo nga akong nakita ilawom sa iyang gamay nga Christmas tree mga kahon ra diay nga walay sulod nga giputos aron mahimong dayan-dayan.
“Wala ko maghunahuna nga aduna diay nagpakabana kanako,” miingon siya. “Wala ko maghunahuna nga makakuha ko og regalo karong tuiga.”
Sa among pagbiya, mibati ko og dako kaayo nga kalipay nga wala ko makahibalo kon unsaon sa pagpugong niini. Dili gani ko ganahan niining tawhana, apan karon mibati ako og tinud-anay nga gugma alang kaniya.
Ang Pasko dili kabahin kaninyo o kanako. Kini kabahin kang Jesukristo, ang labing mahinungdanong gasa sa tanan, ug kabahin sa pagpaambit sa Iyang gugma ngadto sa uban. Kon kita mohigugma ug motabang sa uban, mabati nato ang kalipay tungod kay nahimuot ang Langitnong Amahan sa atong pagpili nga mosunod sa Iyang Anak.